وەزارەتی كشتوكاڵ: 9 بەنداوی ستراتیژی گەورە دروست دەكرێن

وەزارەتی كشتوكاڵ و سەرچاوەكانی ئاوی هەرێم رایگەیاند، لە چوارچێوەی پلانی روبەڕوبونەوەی وشكەساڵیدا، نۆ بەنداوی گەورەی ستراتیژی لە هەرێمی كوردستان دروست دەكرێن.

بەپێی راگەیەندراوێكی وەزارەتەكە، لەكۆبونەوەیەكی تایبەتی نێوان هەردو وەزارەتی كشتوكاڵ و سەرچاوەكانی ئاو و وەزارەتی پلاندانان و نوێنەری سەرۆكایەتی دیوانی ئەنجومەنی وەزیراندا، دروستكردنی ئەو بەنداوە ستراتیژییانە لە رێگەی سیستەمی PPP تاوتوێكراوە.

هەرلە كۆبونەوەكەدا بڕیاردراوە دەرگای وەزارەتی كشتوكاڵ و سەرچاوەكانی ئاوی حكومەتی هەرێمی كوردستان واڵابكرێت بەڕوی ئەو كۆمپانیایانەی كە دەیانەوێت لەم بوارەدا پرۆپۆزەلی تایبەتی خۆیان پێشكەشی وەزارەت بكەن بەمەبەستی دروستكردنی بەنداوەكان و پرۆژە ئاودێرییە گەورەكان كە بەشێكە لەو هەڵمەتەی وەزارەتی كشتوكاڵ و سەرچاوەكانی ئاو بەهەماهەنگی لەگەڵ وەزارەتەكانی تر وەك پلانی روبەڕوبونەوەی وشكەساڵی لەهەرێمی كوردستان دەستی پێكردوە.

بەپێی خشتەی بەنداوە ستراتیژییە پێشنیاركراوەكان، سیانیان لە پارێزگای هەولێر، سیانیان لە پارێزگای سلێمانی و سیانەكەی دیكەیان لە پارێزگای دهۆك دروست دەكرێن.

 

Z.s

هەپەگە: سوپای تورکیا گازی کیمیایی بەکارهێناوە

وەزارەتی بەرگریی تورکیا گیانلەدەستدانی 2 گەریلای پارتی کرێکارانی کوردستان (پەکەکە)ی لە ناوچەی چیای گارەی باشووری کوردستان راگەیاند، هێزەکانی پاراستنی گەل-هەپەگەش دەڵێ، سوپای تورکیا گازی کیمیایی بەکارهێناوە. بەگوێرەی راگەیێنراوێک، کە لەلایەن وەزارەتی بەرگریی تورکیا بڵاوکراوەتەوە، رۆژی شەممە 8ی ئایاری 2021 لە ئەنجامی ئۆپەراسیۆنێکدا کە بە هاوبەشی لەگەڵ دەزگای هەواڵگری-میت لە ناوچەی چیای گارە لە باکووری عێراق کراوە 2 گەریلای پەکەکە دەستنیشانکراون و لە هێرشێكی ئاسمانیدا کراونەتە ئامانج. لەلایەکی دیکەوە، هێزەکانی پاراستنی گەل-هەپەگە کە باڵی سەربازی پەکەکەیە ئاماری نوێی بڵاوکردووەتەوە و رایگەیاند، رۆژی 7ی ئایار لە ناوچەی مەتین دوو جار هێرشیان کردووەتە سەر سەربازانی سوپای تورکیا لە چیای زەندوورا. هەپەگە هەروەها ئاماژەی بە هێرشێکی دیکە لە ناوچەی ئاڤاشین داوە و دەڵێت گەریلاکانی پەکەکە لە 3 خاڵی جیاوازدا بە چەکی قورس و لە مەودای نزیکدا هێرشیان کردووەتەسەر سەربازانی سوپای تورکیا بەگوێرەی راگەیێنراوەکەی هەپەگە: "سوپای تورکیا کاژێر 09:00ی بەیانی رۆژی 8ی ئایار، گازی ژەهراویان فڕێداوەتە نێو تونێلی شەڤاش". هەپەگە هەروەها ئاماژەی بەوەداوە، رۆژی 6ی ئایار گەریلاکانیان لە ناوچە حەفتانین لە چیایی خانتوور هێرشیان کردووەتە سەر ژمارەیەک سەربازی سوپای تورکیا کە لە گردی شەهید بەرخۆدان لە جووڵەدا بوونە و دوای هێرشەکە، تۆپخانەکانی تورکیا ناوچەکەیان بە چڕی تۆپباران کردووە. لە راگەیێنراوەکەدا ئاماژە بەوەدراوە، فڕۆکە جەنگییەکانی سوپای تورکیا لە رۆژانی 7 و 8ی ئایار لە ناوچەی مەتین، دەورووبەری گوندی کێستە، زناری کێستە، گوندی هرور و گردی زەندورا و لە چیای زاپیش ناوچەی کونیشکایان بە چڕی بۆردوومانکردووە، بەڵام گەریلا هیچ زیانێکی بەرنەکەوتووە

 

ك-س

تووشبووانی كۆرۆنا 158 ملیۆنی تێپەڕاند

بە گوێرەی دواین ئامار، تووشبووانی ڤایرۆسی كۆرۆنا لە جیهاندا گەیشتە 158 ملیۆن و 334 هەزار و 441 حاڵەت.
بە گوێرەی ئامارە جیهانییەكان، تاكو كاتژمێر 9.30ی ئەمڕۆ یەك شەممە ژمارەی تووشبووانی كۆرۆنا لە جیهاندا گەیشتە 158 ملیۆن و 334 هەزار و 441 حاڵەت، لەو ژمارەیەش 3 ملیۆن و 297 هەزار و 34 حاڵەتی گیانلەدەستدانیش هەبووە.

هەر بەپێی ئامارەكان تاكو ئێستا 135 ملیۆن و 807 هەزار و 718 تووشبووی ڤایرۆسی كۆرۆنا چاكبوونەتەوە.

لەسەر ئاستی وڵاتانی جیهان، ئەمریكا زۆرترین ڕێژەی تووشبوون بە پەتاكەی تێدا تۆماركراوە و گەیشتووەتە 33 ملیۆن و 454 هەزار و 581 كەس و 595 هەزار و 588 كەسیش گیانیان لەدەستداوە.

ڤایرۆسی كۆرۆنا نەخۆشییەكی كوشندەیە و مانگی 12ی ساڵی 2019 لەشاری وۆهانی وڵاتی چین سەریهەڵداو لەئێستاشدا لە زیاتر لە 210 وڵات و ناوچەی جیهان بڵاوبووەتەوە.

ك-س

شاندێكی ئەمنیی عێراق سەردانی هەرێمی كوردستان دەكات

قاسم ئەعرەجی ڕاوێژکاری ئاسایشی نیشتمانی، بە سەرۆكایەتیی شاندێكی ئەمنی، سەردانی هەرێمی كوردستان دەكات.

نوسینگەی ڕاوێژکاری ئاسایشی نیشتمانیی عێراق لە تویتەرەوە بڵاویكردەوە، شاندێکی باڵای ئەمنیی عێراق بە سەرۆکایەتیی قاسم ئەعرەجی، راوێژکاری ئاسایشی نیشتمانی سەردانی هەرێمی کوردستان دەکات، هەریەكە لە بەڕێوەبەرانی هەواڵگری و دژە تیرۆر لە وەزارەتی ناوخۆ و هەروەها جێگری فەرماندەی هێزە هاوبەشەکانی عێراق ئەندامی شاندە عێراقییەكەن.

سەردانەكە هاوكاتە لەگەڵ زیاتربوونی هەڕەشەكانی داعش لەناوچە دابڕێنراوەكان و هێرشكردنە سەر پێشمەرگە و سوپا و هێزە ئەمنییەكانی عێراق، كە هەرێمی كوردستان بۆ ئەو بۆشاییە ئەمنییەی دەگەڕێنێتەوە، لەناوچەكە لەنێوان هەردوولادا دروستبووە.

پێشتریش شاندێكی وەزارەتی پێشمەرگە بەسەرۆكایەتیی جەبار یاوەر ئەمینداری وەزارەتەكە سەردانی بەغدادی كرد و لەگەڵ مستەفا كازمی سەرۆك وەزیرانی عێراق، هەمان پرسیان تاوتوێكرد.

نوسینگەی ڕاوێژکاری ئاسایشی نیشتمانیی عێراق هیچ ئاماژەیەكی بە مەبەستی سەردانەكەی ئەعرەجی نەداوە، بەڵام دوور نییە مەبەستێكی دیكەی سەردانەكە باسكردنی جێبەجێكردنی ڕێككەوتنەكەی شنگال بێت.

ك-س

چالاکوانێکی مەدەنی لە هێرشێکی چەکداریدا لە عێراق کوژرا

شانەی راگەیاندنەکانی ئەمنی عێراق رایگەیاند، بەرەبەیانی ئەمڕۆ چالاکوانێکی مەدەنی لە هێرشێکی چەکداریدا لە کەربەلا کوژرا

شانەی راگەیاندنەکانی ئەمنی عێراق ئەمڕۆ یەکشەممە لە بەیاننامەیەکیدا بڵاویکردەوە، بەرەبەیانی ئەمڕۆ یەکشەممە ژمارەیەک چەکدار کە ماتۆڕسکیلیان پێ بوە هێرشیان کردە سەر ئیهاب جەواد وەزنی، چالاکوانی خۆپیشاندانەکانی مانگی تشرینی یەکەم لە کەربەلا و بەهۆیەوە کوژرا

ئاماژەی بەوەشکردوە، پۆلیسی پارێزگای کەربەلا، هەوڵەکانی دەستپێکردوە بۆ گەڕان بەدوای ئەو کەسانەی دەستڕێژی کوللەیان لە ئیهاب جەواد وەزنی چالاکوانی مەدەنیان کردوە و تیرۆریان کردوە

شانەی راگەیاندنەکانی ئەمنی عێراق باسی لەوەشکردوە، روداوەکە لە شەقامی کەربەلا لە کەربەلا رویداوە و پۆلیسی پارێزگاکە هەمو هەوڵەکانی بۆ دەستگیرکردنی ئەو تیرۆریستانەی هێرشەکەیان ئەنجامداوە، دەستپێکردوە
دوای خۆپیشاندانەکانی مانگی (تشرینی یەکەم/10)ی ساڵی 2019 کە زیاتر لە 600 خۆپیشاندەر کوژران و سەدانی دیکەش برینداربون، کوشتنی چالاکوانان و هەوڵەکانی کوشتنیان لە پارێزگاکانی عێراق لەلایەن چەکدارانی نەناسراوەوە شێوەیەکی رێکخراوی وەرگرتوە، ئاماری رێکخراو و چالاکاڤانانی مەدەنی ئاماژە بۆ کوژرانی 29 چالاکڤان دەکەن لە چوار مانگی کۆتایی ساڵی رابردو، جگە لە 30 هەوڵی دیکەی کوشتن