تووشبووانی ڤایرۆسی كۆرۆنا لە جیهاندا گەیشتە 39 ملیۆن و 959 هەزار و 651 حاڵەت

بە گوێرەی دواین ئامار، تووشبووانی ڤایرۆسی كۆرۆنا لە جیهاندا گەیشتە 39 ملیۆن و 959 هەزار و 651 حاڵەت.

بە گوێرەی ئامارە جیهانییەكان، تاكو كاتژمێر 9:30ی ئەمڕۆ یەك شەممە ژمارەی تووشبووانی كۆرۆنا لە جیهاندا گەیشتە 39 ملیۆن و 959 هەزار و 651 حاڵەت، لەو ژمارەیەش ملیۆنێك و 114 هەزار و 636 حاڵەتی گیانلەدەستدانیش هەبووە.

لەسەر ئاستی وڵاتانی جیهان، ئەمریكا زۆرترین ڕێژەی تووشبوون بە پەتاكەی تێدا تۆماركراوە و گەیشتووەتە هەشت ملیۆن و 342 هەزار و 665 كەس و 224 هەزار و 282 كەسیش گیانیان لەدەستداوە.

ڤایرۆسی كۆرۆنا نەخۆشییەكی كوشندەیە و مانگی 12ی ساڵی ڕابردوو لەشاری وۆهانی وڵاتی چین سەریهەڵداو لەئێستاشدا لە زیاتر لە 210 وڵات و ناوچەی جیهان بڵاوبووەتەوە.

ك-س

بەڵێن عبدوڵڵا : سوتاندنی ئاڵای كوردستان و هەڵكوتانە سەر بارەگای پارتی دیموكراتی كوردستان لە بەغدا مەحكوم دەكەین

سوتاندنی ئاڵای كوردستان و هەڵكوتانە سەر بارەگای پارتی دیموكراتی كوردستان لە بەغدا مەحكوم دەكەین

چەند ساڵێكە سیاسەتی هەندێ لەهێزە باڵا دەست‌و دەست رۆیشتوەكانی عێراق دژ بە هەرێمی كوردستان‌و مافە رەواكانی لەبەغدا بە راشكاوی ‌و بە ئاشكرا پەیڕەو دەكرێ،

بەردەوام لەنێو دامودەزگاكانی حكومەتی عێراق‌و لە میدیاكان‌و لە كۆڕو كۆبوونەوە‌و بۆنەكانیان خەریكی هاندان‌و گۆشكردنی خەڵكی عێراقن، دژ بە هەرێم‌و گەلی كوردستان. دواجار گەیشتە ئەوەی بە بەرچاوی هێزەكانی پۆلیس‌و ئاسایش لەبەغدا پەلاماری بارەگای پارتی  دیموكراتی كوردستانیاندا و سوتاندیان، بەمەش نەوەستان، رق‌و كینەیان گەیشتە ئەوپەڕی شۆڤێنیەت‌و ئاڵای كوردستانیان سوتاند.

ئەم كارە قێزەونە سیاسەتێك لەپشتیەوەیەو هەڵیدەسوڕێنێ ‌و ئاراستەی دەكات ‌و بۆتە بەشێك لە نەهجیان، ئەگەر دەسەڵاتیان هەبێ زۆر لەوە خراپتر دەكەن، بۆیە ئێمە لە حزبی زەحمەتكێشانی كوردستان جارێكی تریش جەخت دەكەینەوەو روی دەممان دەكەینە سەرجەم حزب‌و لایەنە كوردستانیەكان‌و پێیان دەڵێین ناوچەكە‌و عێراق‌و كوردستان بەهەلومەرجێكی سەخت‌و دژوارو هەستیار تێدەپەڕێ.

بۆیە پێویست دەكات لەبەرامبەر ئەو پلان‌و سیاسەتە دوژمنكاریەی بەرامبەر كوردستان پەیڕەوی دەكرێت، نێوماڵی كوردستانی رێك بخرێتەوە. دەبێ ئەم روداوە ترسناكە بەجدی وەربگرین‌و بچوك نەكرێتەوە لە هەڵسوكەوتی چەند كەسێكی سەرەرۆ‌و لە یاسا دەرچوو. باشترین وەڵام بۆ ئەو سیاسەتە دوژمنكاریە چارەسەری كێشە ناوخۆیەكانمان‌و خزمەتكردنی خەڵكی كوردستان‌و یەكڕیزی نیشتمانیە.

بەڵێن عەبدوڵڵا-سكرتێری حزبی زەحمەتكێشانی كوردستان

17/10/2020

كازمی بۆ لێكۆڵینه‌وه‌ له‌گوله‌بارانكردنی هه‌شت گه‌نج گه‌یشته‌ سه‌ڵاحه‌دین

به‌مه‌به‌ستی به‌دواداچون بۆ تاوانی رفاندنی 12 هاووڵاتی دانیشتوی گوندی فه‌رحاتیه‌ی قه‌زای به‌له‌د له‌ پارێزگای سه‌ڵاحه‌دین و كوشتنی 8 كه‌سیان، به‌ره‌به‌یانی ئه‌مڕۆ مسته‌فا كازمی سه‌رۆك وه‌زیران و تیمێكی هاوڕێی گه‌یشتنه‌ پارێزگاكه‌.

مسته‌فا كازمی له‌گه‌ڵ گه‌یشتنی به‌ پارێزگای سه‌ڵاحه‌دین، له‌گه‌ڵ سه‌ركرده‌ ئه‌منی و سه‌ربازییه‌كانی پارێزگاكه‌ كۆبۆوه‌ و دوپاتیكرده‌وه‌، هیچ بوارێك نییه‌ بۆ گه‌ڕانه‌وه‌ی تیرۆر له‌ژێر هه‌ر ناونیشان یاخود ناوێكدا بێت. وتیشی "بڕوای هێزه‌ چه‌كداره‌كان خۆی له‌ خۆشه‌ویستی بۆ نیشتمان و یاسا ده‌بینێته‌وه‌ نه‌ك تاكه‌كان یاخود ناوه‌كانی دیكه‌"

.
له‌و كۆبونه‌وه‌یه‌دا، به‌رپرسانی ئه‌منی و سه‌ربازیی سه‌ڵاحه‌دین، ورده‌كاری لێكۆڵینه‌وه‌ و به‌دواداچونه‌كانیان له‌باره‌ی تاوانه‌كه‌ی گوندی فه‌رحاتیه‌ بۆ مسته‌فا كازمی و وه‌زیرانی ناوخۆ و به‌رگری و سه‌رۆكی ده‌سته‌ی حه‌شدی شه‌عبی و سه‌رۆكی ئه‌ركانی سوپا و جێگری فه‌رمانده‌ی پرۆسه‌ هاوبه‌شه‌كان رونكرده‌وه‌.

له‌ به‌رانبه‌ریشدا، سه‌رۆك وه‌زیران په‌یامێكی بۆ خه‌ڵكی سه‌ڵاحه‌دین هه‌بو و وتی "ده‌وڵه‌ت ده‌تانپارێزێت، تیرۆر و كرده‌ تاوانكارییه‌كانیان ته‌نها به‌ یاسا و سزادان وه‌ڵامده‌درێنه‌وه‌، هیچ بوارێكیش نییه‌ بۆ گه‌ڕانه‌وه‌ی تیرۆر له‌ژێر هه‌ر ناونیشان و ناوێكدا بێت".

له‌باره‌ی تاوانه‌كه‌شه‌وه‌، لیوا قه‌ندیل جبوری فه‌رمانده‌ی پۆلیسی پارێزگای سه‌ڵاحه‌دین رایگه‌یاند، پۆلیسی فریاكه‌وتن ته‌رمی 8 هاووڵاتی گوندی فه‌رحاتیه‌یان دۆزیوه‌ته‌وه‌ و تائێستاش چاره‌نوسی 4 رفێندراوه‌كه‌ی دیكه‌ دیارنییه‌.

karwan

مەزڵوم عەبدی :هه‌زاران رۆڵه‌ی گه‌له‌كه‌مان له‌ هه‌رێمی كوردستان شه‌هیدبون بۆ به‌رزكردنه‌وه‌ی ئاڵای كوردستان

مه‌زڵوم عه‌بدی فه‌رمانده‌ی گشتی هێزه‌كانی سوریای دیموكرات "هه‌سه‌ده‌" ده‌ڵێت "سوتاندنی ئاڵا و ره‌مزه‌كان و باره‌گا شێوازێكی شارستانی نییه‌ و سه‌دان هه‌زار رۆڵه‌ی گه‌له‌كه‌مان له‌ هه‌رێمی كوردستان شه‌هیدبون بۆ به‌رزكردنه‌وه‌ی ئاڵای كوردستان".

سوتاندنی ئاڵای كوردستان له‌ كاتی هه‌ڵكوتانه‌سه‌ر باره‌گای پارتی له‌ به‌غدا له‌لایه‌ن حه‌شدی شه‌عبییه‌وه‌، كاردانه‌وه‌ی زۆری لێكه‌وتوه‌ته‌وه‌ و مه‌زڵوم عه‌بدی-یش له‌ تویتێكدا له‌ تویته‌ر نوسیویه‌تی "سه‌دان هه‌زار له‌ رۆڵه‌كانی گه‌لی كوردمان له‌ هه‌رێمی كوردستان شه‌هیدبون بۆ چه‌سپاندنی ئاشتی و به‌رزكردنه‌وه‌ی ئاڵاكه‌یان و ئازادكردنی زه‌ویه‌كانیان له‌ دیكتاتۆریه‌ت و تیرۆر".

هه‌روه‌ها جه‌ختده‌كاته‌وه‌، سوتاندنی ئاڵا و ره‌مزه‌كان و باره‌گاكان شێوازێكی شارستانی نییه‌ بۆ ده‌ربڕینی ناكۆكییه‌ سیاسییه‌كان.
فه‌رمانده‌ی گشتی هه‌سه‌ده‌ به‌پێویستی ده‌زانێت پیرۆزییه‌كان و ره‌مزه‌كان بپارێزرێن و لێپرسینه‌وه‌ له‌وانه‌ش بكرێت، كه‌ بنه‌مای ژیانی هاوبه‌ش تێكده‌ده‌ن.

ك-س

عێراق: بەهۆی كۆرۆناوە ١٠ ملیۆن منداڵ لە خوێندن بێبەش بوون

بە پێی راپۆرتێكی نێودەوڵەتی، كۆرۆنا كەرتی پەروەردەی لە عێراق پەكخستووە و ١٠ ملیۆن منداڵی عێراقی لە خوێندن دابڕیوه‌.

ئەنجومەنی نەرویژی بۆ پەنابەران له‌ راپۆرتێكدا ڕایگه‌یاند: لە سەرەتای سەرهەڵدانی ڤایرۆسی كۆرۆناوە هەزاران خوێندنگە لە عێراق داخراون، بەم هۆیەشه‌وە ١٠ ملیۆن منداڵ كە تەمەنیان لە نێوان ٦ بۆ ١٧ ساڵدایە له‌ خوێندن دابڕاون.

ڕیشانا حەنیفە، بەڕێوەبەری لقی عێراق لە ئەنجومەنی نەرویژی بۆ پەنابەران دەڵێت: كەرتی پەروەردە لە هەموو وڵاتان دووچاری چارەنووسێكی نادیار بووەتەوە، بەڵام لە عێراق واقیعەكە جیاوازترە و هەڕەشە لەسەر پەروەردەی ئەو چەندین ملیۆن منداڵەش دروست دەبێت كە ساڵانێكە بەهۆی تیرۆریستانی داعشەوە لە خوێندن بێبەش بوون.

بە پێی ڕاپرسییەكیش كە ئەو ئەنجومەنە ئەنجامی داوە، لە كۆی دوو منداڵی عێراقی یه‌كێكیان بەهۆی كۆرۆناوە دووچاری بێزاری و بێتاقەتی بووەتەوە، لە دەستدانی دەرفەتی خوێندنیش یەكێكە لە دیارترین نیگەرانییەكانی منداڵانی عێراق لە ئێستادا.