ئەنجومەنی وەزیران بۆ پەسەندکردنی پڕۆژەیاسای بودجە کۆدەبێتەوە

ئەنجومەنی وەزیرانی هەرێمی کوردستان رۆژی چوارشەممە بەمەبەستی پەسەندکردنی پڕۆژەیاسای بودجەی ساڵی 2021 کۆدەبێتەوە و دواتریش پڕۆژەکە رەوانەی پەرلەمان دەکرێت.

بەگوێرەی زانیارییەکان دوای نزیکەی 6 مانگ لە گفتوگۆکردن و راسپاردنی هەردو وەزارەتی دارایی و پلاندانان بۆ ئامادەکردنی رەشنوسی پڕۆژەیاسای بودجەی ساڵی 2021ی هەرێم، بڕیارە رۆژی چوارشەممە بۆ پەسەندکردنی پڕۆژەکە کۆببێتەوە.

دوای پەسەندکردنی پڕۆژەیاسای بودجەی ساڵی 2021 لەلایەن ئەنجومەنی وەزیرانەوە، پڕۆژەکە رەوانەی پەرلەمانی کوردستان دەکرێت، بەگوێرەی زانیارییەکانیش لەبودجەی ئەمساڵی هەرێمدا لەپاڵ پێدانی کاری لەپێشینە بۆ دابینکردنی موچەی فەرمانبەران، بودجەش بۆ تەواوکردنی پڕۆژە بەردەوامەکان تەرخانکراوە، لەئەگەری رەوانەکردنی پشکی هەرێمیش لەبەغدا پڕۆژەی نوێ بەگوێرەی پلانی وەزارەتی پلاندانان جێبەجێ دەکرێن.

پێشوتر ئەرشەد حسێن، ئەندامی لیژنەی دارایی لەپەرلەمانی کوردستان راگەیاندبو، ئەنجومەنی وەزیرانی هەرێمی کوردستان وەزارەتی دارایی و وەزارەتی پلاندانانی راسپاردوە بۆ نوسینەوەو ئامادەکردنی پڕۆژەیاسای بودجەی ساڵی 2021ی هەرێم و لەئێستادا حکومەت سەرقاڵی ئامادەکردنی رەشنوسی پڕۆژەکەیە.

ئاماژەی بەوەشکرد، دوای پەسەندکردنی لەئەنجومەنی وەزیران پڕۆژەی بودجە رەوانەی پەرلەمانی کوردستان دەکرێت، پەرلەمانیش لە خولی بەهارەیدا گفتوگۆکردن لەسەر پڕۆژەی بودجەی خستوەتە لەپێشێنەی کارەکانی.

 

z.s

گوژمەیەکى دیکەى ڤاکسینى فایزەر گەیشتە عێراق

وەزارەتی تەندروستی عێراق رایگەیاند، بڕێكی دیكە لە ڤاكسینی كۆرۆنای فایزەر گەیشتوەتە وڵاتەكە و پشكی هەرێمی كوردستانیشی تێدایە.

كۆمپانیای گشتیی بە بازاڕكردنی دەرمان و كەرەستەی پزیشكی سەر بە وەزارەتی تەندروستی عێراق رایگەیاند، بڕێكی دیكە لە ڤاكسینی كۆرۆنا كە لە لایەن كۆمپانیای فایزەرەوە بەرهەمهێنراوە گەیشتوەتە وڵاتەكە.
باسی لەوەشكردووە، گەیشتنی ئەو بڕە لە چوارچێوەی گرێبەستەكەیانە لەگەڵ كۆمپانیاكە، كە بڕیارە هەفتانە بڕێكی دیاریكرایان رادەست بكات.

راشیگەیاندووە، لە رێگەی ئامێری تایبەت كە ساردكەرەوەیان هەیە، ئەو بڕە ڤاكسینە بەسەر پارێزگانی عێراق بە هەرێمی كوردستانیشەوە دابەشدەكرێت.

عێراق تائێستا سێ جۆر ڤاكسینی فایزەر، ئەسترازینكا و سینۆفارمی هاوردەكردووە و پرۆسەی كوتان بەو ڤاكسینانە بەردەوامە.

 

 

z.s

ئیداره‌ی بایدن: به‌نیازین گرتووخانه‌ی گوانتانامۆ دابخه‌ین

وەزیری دەرەوەی ئەمریکا رایگەیاند داخستنی بنکەی گوانتانامۆ ئامانجێكی یەکلابووەوەی سەرۆک بایدنە.

لە چاوپێکەوتنێكی تەلەفزیۆنیدا، ئەنتۆنی بلینکن، وەزیری دەرەوەی ئەمریکا رایگەیاند، ئیدارەی بایدن گەیشتووەتە ئەو باوەڕە کە بنکەی گوانتانامۆ دەبێت دابخرێت، بەڵام بەگوتەی بلینکن ئەو کارە پێویستی بەوەیە پێشوەختە کاری بۆ بکرێت.

بنکەی گوانتانامۆ لە دوای هێرشەکانی 11ی سێپتەمبەری ساڵی 2001 بۆ سەر هەردوو باڵەخانەی بازرگانیی جیهانی لە نیویۆرک و وەزارەتی بەرگریی ئەمریکا لە سەردەمی سەرۆکایەتیی جۆرج بوشی کوڕدا دامەزرا، بنکەکە لانیکەم 780 زیندانیکراوی رێکخراوی قاعیدەی تێدا بوو، کە لە ئەفغانستان لەلایەن هێزەکانی ئەمریکا دەستگیرکرابوون.

لە ماوەی 20 ساڵی رابردوودا 731 بەندکراوی بەندیخانەکە بۆ شوێنی دیکە گوزراونەتەوە، نۆ بەندکراو لە بنکەکە مردوون، هەروەها چەند بەندکراوێکیش دوای تەواوکردنی ماوەی حوکمەکەیان ئازادکراون، ئێستا بنکەکە تەنیا 40 بەندکراوی تێداماوە، کە بە بەندکراوی "زۆر مەترسیدار" پۆلێن کراون.

لێدوانەکانی بلینکن جەختکردنەوەیە لە لێدوانەکانی بایدن لە کاتی بانگەشەی هەڵبژاردنی سەرۆکایەتیی ئەمریکا، کە داخستنی بنکەی گوانتانامۆی کردە یەکێك لە ئامانجە سەرەکییەکانی.

لە سەرەتای مانگی نیسانی ئەمساڵدا، فەرماندەی هێزەکانی باشووری ئەمریکا رایگەیاند، کامپی ژمارەی 7ی نێو گوانتانامۆ, کە زیندانییە مەترسیدارەکانی قاعیدەی تێدابوون داخراوە و سەرجەمیان گواستراونەتەوە بۆ  کەمپێكی دیکە.

لە 22ی مانگی کانوونی دووەمی ساڵی 2009، باراک ئۆباما، سەرۆکی پیشووتری ئەمریکا بڕیاری جێبەجێکاری ژمارە 13492ی تایبەت بە داخستنی بنکەی گوانتانامۆی واژۆکرد، بەڵام بڕیارەکەی ئۆباما لەلایەن کۆمارییەکانی نێو کۆنگرێس رەتکرایەوە، کە دژی دابینکردنی پارەی پێویست بە داخستنی بنکەکە بوون.

دۆناڵد ترەمپ، سەرۆکی پێشووی ئەمریکاش بڕیارێکی جێبەجێکاری واژۆکرد و تێیدا بڕیارەکەی ئۆبامای هەڵوەشاندەوە و بنکەی گوانتانامۆی بۆ ماوەیەکی نادیار بەکراوەیی هێشتەوە.

 

z.s

هەپەگە: لە نۆ رۆژی رابردوودا ١٥٨ سەربازی تورکیا کوژراون

هەپەگە ئاماری نۆ رۆژی رابردووی شەڕ و پێکدادانی لەگەڵ سوپای تورکیا بڵاوکردەوە و رایگەیاند، ١٥٨ سەربازی تورکیا کوژراون.

ناوەندی راگەیاندن و چاپەمەنی هێزەکانی پاراستنی گەل (هەپەگە) لە راگەیەندراوێکدا ئەوەی خستووەتەڕوو، لە روبەڕوبوونەوەیان لەگەڵ سوپای تورکیا لە ناوچە سنورییەکانی هەرێمی کوردستان، ١١٠ چالاکییان ئەنجامداوە و بەهۆیەوە ١٥٨ سەربازی تورکیا کوژراون و دەیانی دیکەش برینداربوون.

هەپەگە دەشڵێت، سوپای تورکیا لە ٢٣ی نیسان دەستی بە هێرشی کردووە و لەبەرامبەردا ئەوانیش چالاکییەکانیان بەرفراوانترکرد.

دوێنێش، خولوسی ئاکار وەزیری بەرگریی تورکیا هاتە هەرێمی کوردستان تەنیا بۆ بینینی سەربازانی وڵاتەکەی و رایگەیاند، "لە ئۆپراسیۆنەکانی چەند رۆژی رابردوودا، ٤٤ گەریلای پەکەکەمان کوشتووە."

خلوسی ئاکار ئەوەشی خستەڕوو، "ئێمە پێداگرین لەسەر کۆتاییهێنان بە پەکەکە، دەتوانین ئەوەش ئەنجامبدەین لە پێناو فەراهەم کردنی ئاشتی و ئارامی لە نزیکترین کاتدا."

لە ٢٣ی نیسانەوە سوپای تورکیا بە بیانوی هەبوونی بنکە و بارەگای پارتی کارێکارانی کوردستان (پەکەکە) لە چەند ناوچەیەکی هەرێمی کوردستان دەستپێکردووە بە ئۆپراسیۆنی چنگی بروسکە و چنگی هەورە تریشقە، هاوکات، پەکەکە و تورکیا ژمارەی جیاواز لەبارەی کوشتنی سەربازانی یەکترییەوە بڵاودەکەنەوە.

 

 

z.s

دۆخی هیندستان "زۆر خراپە" مردن بە کۆرۆنا ژمارەیەکی پێوانەیی تۆمارکرد

دوازدە رۆژی لەسەریەکە رۆژانە زیاتر لە 300 هەزار کەس لە هیندستان تووشی کۆرۆنا دەبن، بەمەش کۆی ژمارەی تووشبووانی کۆرۆنا لە 20 ملیۆن کەس نزیکدەبیتەوە. لە 24 کاتژمێری رابردووشدا مردنی 3417 کەس بەو ڤایرۆسە راگەیێندراوە.

لە ماوەی 24 کاتژمێری رابردوودا هیندستان تووشبوونی 368 هەزار و 147 کەسی بە کۆرۆنا راگەیاند، ئێستا ژمارەی تووشبووان لەو وڵاتە 19 ملیۆن و 925 هەزار کەسی تێپەڕاندووە، ژمارەی تەواوی مردووانیش گەیشتووەتە 219 هەزار کەس.

بەپێی ئەو ئامارانەبێت لەوانەیە لە هەفتەکانی داهاتوودا هیندستان رۆژانە زیاتر لە 30 هەزار کەیسی مردن بەخۆیەوە ببینێت، بەهۆی ئەو پشێویەی کە لە وڵاتەکە دروستبووە، تاوەکو ئێستا بڵاوبوونەوەی ئاماری راستەقینە دیارنییە، بەڵام هەندێک پزیشکی کەرتی تەندروستیی وڵاتەکە ئاماژە بەوە دەکەن کە ئاماری راستەقینە 10 هێندەی ئەو ئامارانەن کە ئەمڕۆ بەردەستن.

لەپشت پەردەی دیمەنی سامناکی سووتاندنی قوربانیانی کۆرۆنا، بازاڕێکی رەشی گەرموگوڕی بازرگانیکردن بە بوتڵی ئۆکسجین هەیە، پزیشکان دەڵێن، کێشەکە ئەوەیە بەشی زۆری ئەو بوتڵانە ساختەن و وەکو پێویست بەهانای ئەو تووشبووانەوە ناڕۆن کە تووشی هەناسەتەنگی بوون.

نرخی یەک بوتڵی ئۆکسجین لە هیندستان لە 110 دۆلارەوە گەیشتووەتە 1381 دۆلار بەراورد بە پێش خراپبوونی دۆخەكە هەڵکشانەی ژمارەی تووشبووانی کۆرۆنا.

هەروەها یەک دەستە حەبی ریمسیسیڤەر کە دەگوترێت شەڕی کۆرۆنا دەکات، لە 27 دۆلارەوە گەیشتووەتە سەرووی 600 دۆلارەوە.

 

z.s