نرخی بەنزین هەرزان دەبێت

هۆشیار ئیسماعیل جێگری سەرۆكی لیژنەی پیشەسازی و وزە لە ئەنجومەنی پارێزگای سلێمانی  راگەیاند "وەك ئەندامێك لە لیژنەكەدا پێشنیازێكم پێشكەش بە لیژنەكەمان كردووە بۆئەوەی لەسەر نرخی بەنزین و سوتەمەنی بەگشتی لەگەڵ پارێزگاری سلێمانی دانیشتنێك ئەنجام بدەین ، بۆ ئەو مەبەستەش لەگەڵ پارێزگار قسەم كردووە و ڕەزامەندی بۆ كۆبونەوەكە دەربڕیووە".

جێگری سەرۆكی لیژنەی پیشەسازی و وزە لە ئەنجومەنی پارێزگای ئاماژەی بەوەشدا ، ئێمە وەك ئەنجومەنی پارێزگای سلێمانی ناتوانین نرخ دیاری بكەین ، بەڵام دەتوانین كێبڕكێ لەنێوان كۆمپانیاكان دروست بكەین بۆ كەمكردنەوەی نرخی بەنزین و باشتركردنی كوالێتییەكەی.

حەشدی شەعبی ڕێگە بە ئاوارەكانی خورماتوو نادات بگەڕێنەوە شارۆچكەكە

گوتەبێژی فەرمی حەشدی شەعبی لە خورماتوو ئاشكرای دەكات كە ڕێگە بە گەڕانەوەی ئاوارەكانی خورماتوو نادات بگەڕێنەوە نێو سەنتەری شارۆچكەكە.

عەلی هاشم ئەلحسێنی گوتەبێژی حەشدی شەعبی بە (ئێستا نیوز)ی ڕاگەیاند:- كە ئەوان وەكو حەشدی توركمانی نایانەوێت لە گەڵ لایەنی كوردی دانیشن بەمەبەستی چارەسەركردنی كێشەكانی نێوانیان وڕێگەش نادەن لە ئێستادا ئاوارەكانی خورماتوو بگەڕێنەوە سەر ماڵ وحاڵی خۆیان.

گوتیشی:- كلیلی چارەسەركردنی كێشەی خورماتوو لە لای سەركردە كوردەكانە گەر بیانەوێت چارەسەری بكەن ، لە گەڵ ئەوەشدا تاكو چەكدارە خۆبەخشەكان مابن ئەوا ڕێگە بە گەڕانەوەی ئاوارەكان نادەین.

پەیامنێری ئێستا نیوز/عومەرئاوارە

ئه‌مریكا بڕیاریی یه‌كلاكه‌ره‌وه‌ له‌باره‌ی‌ ئێرانه‌وه‌ ده‌دات

ئه‌مریكا رایگه‌یاند كه‌ رۆژی هه‌ینی بڕیارده‌دات له‌سه‌ر به‌رده‌وام بوون و بەردەوام نه‌بوونی رێككه‌وتننامه‌ی ئه‌تۆمی كه‌ له‌گه‌ڵ ئێران واژووكراوە.

راوێژكار لە وه‌زاره‌تی ده‌ره‌وه‌ی ئه‌مریكا، ستیڤ گۆڵدستین سه‌باره‌ت به‌ بابه‌ته‌كه‌ بۆ راگه‌یاندنه‌كان دوا.

له‌ وه‌ڵامی پرسیارێكدا له‌باره‌ی به‌رده‌وام بوون و بەردەوام نه‌بوون له‌سه‌ر ئه‌و رێككه‌وتنه‌ ئه‌تۆمییه‌ی ساڵی 2015 له‌گه‌ڵ ئێران واژووكرا ستیڤ گۆڵدستین گوتی: "چاوه‌ڕوانین رۆژی هه‌ینی بڕیاره‌كه‌ بده‌ین. مشتومڕه‌كان له‌باره‌ی بابه‌ته‌كه‌ به‌رده‌وامه‌".

ستیڤ گۆڵدستین ئه‌وه‌یشی خسته‌ڕوو كه‌ له‌م هه‌فته‌یه‌دا سه‌رۆكی ئه‌مریكا، دۆناڵد تره‌مپ له‌گه‌ڵ وه‌زیری ده‌ره‌وه‌، رێكس تیله‌رسن و وه‌زیری به‌رگری، جێمس ماتیس كۆده‌بێته‌وه‌.

نرخی نەوت گەیشتە بەرزترین ئاست لە ماوەی سێ ساڵی ڕابردوو

ئەمڕۆ، نرخی نەوت لە بازاڕەکانی وزە لە جیهاندا بەشێوەیەکی بەرچاو ڕووی لە بەرز بوونەوە کرد بەبەراورد لەگەڵ نرخەکەی دوێنێ.

پێگەی (oilprice)ی جیهانی بڵاوی کردەوە، ئەمڕۆ چوارشەممە (2018/1/10)، لە کاتژمێر (5:05) خولەکی ئێوارە بە کاتی کوردستان، نرخی یەک بەرمیل نەوتی برێنت بە (68) دۆلار و (03) سەنت مامەڵەی پێوەکرا و نرخی یەک بەرمیل نەوتی خاوی ئەمریکیش بە (62) دۆلار (08) سەنت مامەڵەی پێوەکرا، کە لەماوەی سێ ساڵی ڕابردوو یەکەم جارە نرخی نەوت بەوشێوەیە بەرز ببێتەوە.

ئەمە لەکاتێکدایە دوێنێ نرخی یەک بەرمیل نەوتی برێنت بە (68) دۆلار و (03) سەنت و نرخی یەک بەرمیل نەوتی خاوی ئەمریکیش بە (62) دۆلار (08) سەنت مامەڵەی پێوەکرا.

شارەزایانی بواری ئابووری هۆکاری ئەم بەرز بوونەوەی نرخی نەوت بەم شێوەیە بۆ خۆپیشاندانەکانی ئێران دەگەڕێننەوە، کە بەهۆیەوە هەناردەی نەوتی ئێران بۆ بازاڕەکانی وزە لە جیهاندا کەم بووەتەوە.

 

جێگری پارێزگاری مووسل: دۆخی دەشتی نەینەوا ئەوەندە خراپە كە خراپتری لێ نایەت

دوای ئازادكردنەوەی مووسڵ لە داعش دۆخی شارەكە تا ئێستەیش نەهاتووەتە سەر خۆی لە سایەی باڵادەستیی حەشدی شەعبی بەتایبەتی لە دەشتی نەینەوا، كە حەشدەكانی كلدانی و شەبەك و هیتریشی لێ دامەزراوە، جێگری پارێزگاری مووسل لەو بارەوە دەڵیت، دۆخی دەشتی نەینەوا بە تایبەت شنگال و زومار و رەبیعە زۆر خراپە و خراپتر لێی نایەت.

ئەمڕۆ ١٠ی كانوونی دووەمی 2018، عەلی عومەر، جێگری پارێزگاری مووسڵ بە ''وشە'' راگەیاند، ئێسە دۆخی دەشتی نەینەوا بەتایبەت ناوچەكانی شنگال و زومار و رەبیعە زۆر خراپە و لەوە خراپتری لێی نایەت، چونكە هیچ خزمەتگوزارییەك لە ناوچەكەدا نییە و خەڵك لە بێ خزمەتگوزاری دەناڵینن.

جیگر پارێزگاری مووسل ئاماژەی بەوەیش كرد، ئەگەر دۆخەكە بەم شێوەیە بێت ئازارەكانی خەڵك زیاتری لێ دێت، چونكە خەڵكی ئەم ناوچانە زیاتر لە هەمووان پێویستیان بە خزمەتگوزارییە.

روونی كردەوە، ئێزدییان چاویان بە تەلەعفەر هەڵنایەت، چونكە لە تەلەعفەر بوو داعش ستەمی لە خەڵكی شنگال كرد و هەر لەبەر ئەمەیش ئێزدییان ناتوانن بچنە مووسل و تەلەعفەر، بەڵام حەشدی شەعبی ئەوان ناچاریان دەكات بەو رێگەیانەدا تێپەڕبن بۆ ناوچەكانی تری.