توركیا : لەماوەی یەك مانگدا 40 ژن كوژراون

رۆژ نییە میدیاكانی توركیا هەواڵی كوشتنی ئافرەت نەكەنە مانشێت، بەڵام لەبری ئەوەی كوشتنی ئافرەت لە توركیا كەم ببێتەوە، كەچی روو لە زیادبوون دەكات و تەنیا لە مانگی١٠ی ٢٠١٩دا لەو توركیا 41 ئافرەت بە دەستی پیاو كوژراون.

ماڵپەڕی (بیانەت)ی توركی بە پشتبەستن بە بەدواداچوونی چەند ماڵپەڕ و رۆژنامەیەكی توركیا، بڵاوی كردووەتەوە تەنیا لە مانگی١٠ لە توركیا 41 ئافرەت بە دەستی پیاو كوژراون.

هاوکات دوو ئافرەت دەستدرێژیی سێكیان كراوەتە سەر و ئافرەتێكی تەمەن ٨٥ ساڵیش ناچار كراوە كاری لەشفرۆشی بكات و دەستدرێژی سێكیش كراوتە سەر ٣٣ منداڵی خوار تەمەن ١٨ ساڵ.

ئەو شارانەی ٤١ ئافرەتی تێدا كوژراوە هیچیان لە باكووری كوردستان نین و هەموویان كەوتوونەتە شارە توركییەكانی وەكوو (ئیستەنبۆڵ، قۆنیا، ئەنتاڵیا، ئایدن، بورسا، ئەنكەرا، كۆجەیلا و هاتای).

ماڵپەری (T24)ی توركی بڵاوی كردووەتەوە، پیاوێكی تورك لە ئەڵمانیا كە هاوسەرەكەی لە ئیستەنبۆڵ بووە، پارەی داوەتە كەسێك لە ئیستەنبۆڵ تا هاوسەرەكەی بكوژێت و كوشتوویەتی، هەروەها بەشێك لەو ئافرەتانەی كوژراون، تاكوو ئێستا بكەرەكانیان دەستگیر نەكراون.

كوشتنی ئافرەت لە توركیا دیاردەیەكی قێزەونە و هەیە، بەڵام لە زنجیرە دراماكانیاندا وەكوو سووكایەتییەك بۆ كورد، زۆر جار پیاوی كورد لە باكوور نیشان دەدەن كە ئافرەت دەكوژێت و رۆڵی دڕندەیان پێ دەدەن.

پێشتریش لە ئاژانسەكانی هەواڵی توركیا بڵاو كرایەوە، كە لە ماوەی 15 ساڵی رابردوودا لە تەواوی توركیا ١٥ هەزار ئافرەت كوژراون.

Hits: 43
Category: