ژووری ئۆپەراسیۆنی هەولێر داوادەکات نوێژی جەژنی قوربان ئەنجامنەدرێت

ژووری ئۆپەراسیۆنی پارێزگای هەولێر داوا لە مامۆستایانی ئایینی دەکات لە یەکەم رۆژی جەژنی قورباندا نوێژی جەژن ئەنجامنەدەن.

ژووری ئۆپەراسیۆنی پارێزگای هەولێر داوا لە هاونیشتمانیان دەکات بۆ خۆپارێزی لە ڤایرۆسی کۆرۆنا و پاراستنی تەندروستیی شارەکە و سه‌لامه‌تیی خزم و کەسوکار، خۆیان بەدووربگرن لە ‌سه‌ردان و هاتووچۆکردن و به‌ریه‌ككه‌وتن و هەموو جۆرە گردبوونەوە و قه‌ره‌باڵغییەک.

هەروەها رێگە بە ئەنجامدانی هەندێک مەراسیم و کردنەوەی هەندێک شوێن نادرێت کە بریتین لە: مەراسیمی سەر قەبران، دانانی پرسە لە (هۆڵ، ماڵ، لەژێر خێوەت) لە گەڕەک و شوێنە گشتییەکان، هۆڵه‌كانی ئاهه‌نگگێران، هۆڵه‌كانی بووك گواستنه‌وه‌، یانه‌ی شه‌وانه‌، نێرگه‌له‌كێشان، هۆڵ و سه‌نته‌ره‌كانی له‌شجوانی، هۆڵه‌كانی وه‌رزشی، مه‌له‌وانگه‌، ئاهه‌نگی شه‌وانه‌، یانه‌كانی مه‌ی خواردنه‌وه‌ (باڕ)، گه‌رماو (حه‌مام) و سه‌نته‌ره‌كانی مه‌ساج.

ژووری ئۆپەراسیۆنی پارێزگای هەولێر جەخت لە پابەندبوون بە بڕیار و راسپاردەکانی بەیانی ژمارە (44)ی وەزارەتی ناوخۆی حکومەتی هەرێمی کوردستان دەکاتەوە، داواش لە سەرجەم هاونیشتمانیانی سنووری پارێزگای هەولێر دەکات له‌ رۆژانی جه‌ژنی قورباندا لەپێناو بەرژەوەندیی گشتی و بۆ خۆپارێزی لە ڤایرۆسی کۆرۆنا، خۆیان بەدووربگرن لە ‌سه‌ردان و هاتووچۆکردن و به‌ریه‌ككه‌وتن و هەموو جۆرە گردبوونەوە و قه‌ره‌باڵخییەک.

لە سنووری پارێزگای هەولێر تاوەکو ئێستا سێ هەزار و 903 تووشبووی ڤایرۆسی کۆرۆنا دەستنیشانکراون، لەو ژمارەیەش دوو هەزار و 792 تووشبوویان چاکبوونەتەوە و 113 تووشبووش گیانیان لەدەستداوە.

لە هەرێمی کوردستان تاوەکو ئێستا 13 هەزار و 246 تووشبووی ڤایرۆسی کۆرۆنا دەستنیشانکراون، لەو ژمارەیەش هەشت هەزار و 896 تووشبوو چاکبوونەتەوە و 517 تووشبوو گیانیان لەدەستداوە.

 

 

ز.س

Hits: 19
Category: