پۆلیسی راپەڕین: 41 کەس لەسەر کەیسی سلێمان هەڵشۆیی دەستگیرکراون

گوتەبێژی پۆلیسی ئیدارەی راپەڕین رایگەیاند، تاوەکو ئەمڕۆ دووشەممە 41 کەس لەسەر کەیسی سلێمان هەڵشۆیی دەستگیرکراون.

شۆڕش ئیسماعیل، گوتەبێژی پۆلیسی ئیدارەی راپەڕین ئاشكرایكرد، تاوەکو ئێستا کەیسی سلێمان هەڵشۆیی بە کراوەیی ماوەتەوە و ئێستاش خەڵک هەیە کە سكاڵا لە دژی تۆماردەکەن و لێکۆڵینەوەش لە رووداوەکە بەردەوامە.

بەگوتەی شۆڕش ئیسماعیل، پێشتر چەند کەسێک کە لەگەڵ سلێمان هەڵشۆیی هاوبەش بوون و مامەڵەیان لەگەڵ خەڵکدا کردبوو دەستگیرکرابوون، بەڵام ئێستا ژمارەی دەستگیرکراوان کە تۆمەتبارن بەوەی لەگەڵ سلێمان هەڵشۆیی مامەڵەیان لەگەڵ خەڵکی دیکەدا کردبێت گەیشتووەتە 41 کەس.

سلێمان هەڵشۆیی، کە خۆی بە بازرگان و سەرمایەدار لە سنووری ئیدارەی راپەڕین دەزانی، رۆژی 20ی مانگی 12ی ساڵی رابردوو مایەپووچبوونی خۆی راگەیاند و دواتر پۆلیسی ئیدارەی راپەڕین دەستگیری کرد و تاوەکو ئێستاش لە زیندانەوە و ئازادنەکراوە. ئەوانەیشی پارەیان لای سلێمان هەڵشۆییە بەردەوام سکاڵا تۆماردەکەن و هەندێک رۆژێیش گردبوونەوە دەکەن و داوای مافی خۆیان دەکەن.

لە دوایین کاردانەوەکان سەبارەت بە کەیسی سلێمان هەڵشۆیی، شەوی رابردوو مامۆستایەکی ئایینی بەناوی ئیسماعیل تووەسوورانی لە سنووری قەزای پشدەر رایگەیاند، پێش ئەوەی کتێبەکەی چاپ و بڵاوبکاتەوە، سلێمان هەڵشۆیی لەگەڵ مامۆستایەکی دیکەی ئایینی سەردانی ماڵەکەی کردووە و بڕی 2000 هەزار دۆلاری بۆ چاپکردنی کتێبەکەی پێداوە و ئەویش وەریگرتووە. بەڵام دواتر کوڕێکی ئەو مامۆستا ئایینییە چووەتە لای سلێمان هەڵشۆیی و بڕی 11 هەزار دۆلاری پێداوە و تاوەکو ئێستا پارەکەی نەداوەتەوە.

 

 

z.s

Hits: 64
Category: