سەرۆكی یوێفا گاڵتە بە پێرێز دەكات، باس لە چارەنووسی یارییەكەی ریال مەدرید و چێلسیش دەكات

سەرۆکی یوفا گاڵتە به فلۆرێنتینۆ پێرێزی سەرۆکی یانەی ریال مەدرید دەکات و باسی  چارەنووسی یارییەکەی ریال مەدرید بەرامبەر چێلسی لە قۆناخی پێشکۆتایی چامپیۆنزلیگ دەکات.

ئەلیکساندەر چێفرین، سەرۆکی یۆفا هێرشی کرده سەر سەرۆکی یانەی ریال مەدرید و رووی قسەکانی لەو کرد و گوتی "تۆ سەرۆکێکی وەک منت ناوێ؟ ئەمە گەورەترین هاندەری منە بۆ مانەوەم لە شوێنەکەم".

پیاوە سلۆڤینییەکە، گوتیشی "پێرێز سەرۆکێکی دەوێت بە گوێی بکات و لە قسەی دەرنەچێت، هەر شتێکی بوێت بۆی بکات، لە کاتێکدا من هەوڵدەدەم ئەوەی کە پێمباشە بۆ تۆپی پێی ئەوروپا و نێودەوڵەتی ئەنجامی بدەم".

کاتێک پرسیاری ئەوەیان لێکرد کە ئەگەری هەیە ئەو یانانە سزا بدەن کە چوونەتە نێو پڕۆژەی سوپەرلیگ؟ چێفرین گوتی "من لە هەموو یانەکانی ئەوروپاوە پەیامی پشتگیریم پێگەیشتووە، بۆیە ئێستا هیوادارین هەست بە هەڵەکەیان بکەن و بەرگەی دەرئەنجامەکانی بکەن، هەفتەی داهاتوو گفتوگۆی لەسەر ئەو بابەتە دەکەین".

لەسەر ئەگەری ئەوەی رێگە بە ریال مەدرید دەدرێت رووبەڕووی چێڵسی ببێتەوە، لە  قۆناخی پێشکۆتایی چامپیۆنزلیگدا؟ چێفرین لە وەڵامدا گوتی "تازە وەرزەکە  دەستیپێکردووە و ئەو کەناڵە تەلەڤزیۆنانەی یارییەکانی چامپیۆنزلیگ دەگوازنەوە داوای قەرەبوومان لێدەکەن ئەگەر یاریی پێشکۆتایی نەکرێت، بۆیە ئەگەری ئەنجامنەدانی ئەو یارییە زۆر کەمە، بەڵام لە داهاتوودا جیاوازی دەبێت".

سەرۆکی یۆفا ئەو قسانەی سەرۆکی ریال مەدریدی رەتکردەوە، کە گوتبووی چێفرین بەڵێنی بە یانەکانی ئینگلتەرا داوە قازانجێکی دارایی زیاتریان پێبدات بۆ رازیکردنیان بە کشانەوە لە سوپەرلیگ و گوتی "راست نییە، شتی وا نییە". هەروەها گوتیشی "ئەگەر  ملیاران یۆرۆم پێشکەشی ئەو یانانە کردبا داوای لێبوردنیان نەدەکرد، دەچوونە بەرەی دیکە".

چێفرین لە کۆتایی قسەکانیدا، گوتی "ئەو یانانە بۆیان دەرکەوت کە بەڕاستی هەڵەیان کردووە، پەیوەندیان بە منەوە کردووە، من زۆر رێزیان لێدەگرم، من زیاتر لەوانەی ئەو قسانە دووبارە دەکەنەوە کە بوونیان نییە رێزیان لێدەگرم".

 

z.s

هەموو شتێک لەبارەی خولی سوپەری ئەوروپا (سوپەرلیگ)

 

خولی سوپەری ئەوروپا چییە؟ شێوەی پێشبڕکێکە و یانە بەشدارەکان و سزا چاوەڕوانکراوەکان چین؟ لەم راپۆرتەدا وەڵامی ئەم پرسیارانە وەربگرە و هەموو شتێک لەسەر ئەو پاڵەوانێتییە نوێیە بزانە.

لێرەدا بۆت دەردەکەوێت کە خولی سوپەری ئەوروپا، کە بە "سوپەرلیگ" ناودەبرێت، چۆن و چییە و چاوەڕوانی بەشداری لە چ یانەیەک دەکرێت و فیدراسیۆنە ناوخۆییەکان چ سزایەک دەسەپێنن؟.

هەواڵی بەربڵاوی ئەگەری دامەزراندنی خولی سوپەری ئەوروپا بە بەشداری یانە گەورەکانی ئەوروپا تۆڕە کۆمەڵایەتییەکانی تەنییەوە، کە دەکرێت کاریگەرییەکی گەورەی بەسەر جیهانی تۆپی پێ بە گشتی هەبێت.

بڕیاربوو رۆژی دووشەممە یوفا شێوەی نوێی خولی یانە پاڵەوانەکانی ئەوروپا رابگەیەنێت، بەڵام ئەو هەواڵەی لەبارەی خولی سوپەری ئەوروپاوە بڵاوبووەوە، نائارامی و قەیرانێکی راستەقینەی هێنایە ئاراوە.

 

 

چەند یانە بەشداری لە خولەکەدا دەکەن؟

 

بە پێی بەیاننامەی ئەنجوومەنی بەڕێوەبردنی پاڵەوانێتییەکە، ئەم پێشبڕکێ نوێیەی تۆپی پێ بە بەشداری 20 یانە بەڕێوەدەچێت، کە 15 لەو یانانە بە دامەزرێنەر پۆلێنکراون و 5ـی دیکەش لە رێگەی بانگهێشتنامەوە بەشدار دەبن.

ئەو 5 یانانەی بانگهێشت دەکرێن لەسەر بنەمای ئاستی وەرزییان لە خولەکانی ناوخۆیاندا بانگهێشت دەکرێن و لەگەڵ ئەوەشدا تاوەکو ئێستا نادیار و نا روونە چۆن دەستنیشان دەکرێن یان بەشێوەیەکی گشتی بانگهێشت دەکرێن.

 

شێوەی خولی سوپەری ئەوروپا چۆنە؟

 

بەپێی ئەوەی تاوەکو ئێستا لەبارەی خولەکەوە راگەیێنراوە، ئەو 20 یانەی بەشداری لە خولی سوپەری ئەوروپادا دەکەن، بەسەر دوو کۆمەڵەدا دابەشدەکرێن، کە هەر کۆمەڵەیەک 10 تیپ لەخۆی دەگرێت.

چوار یانە پلە بەرزەکەی هەر کۆمەڵەیەک بۆ قۆناخی چارەکی کۆتایی یان قۆناخی 8 سەردەکەون، کە ئەو قۆناخە لەگەڵ قۆناخی پێشکۆتایی بەشێوەی دوو یاریی چوون و گەڕانەوەی یەکلاکەرەوە بەڕێوەدەچن لەگەڵ یەک یاریی کۆتایی، رێک وەک چامپیۆنزلیگ.

 

کام یانە بەشداری لە خولی سوپەری ئەوروپادا دەکەن؟

 

6 یانەی پرێمەرلیگ لە خولی سوپەری ئەوروپا بەشداریی دەکەن، کە بریتین لە مانچێستەر یونایتد، مانچێستەر سیتی، چێڵسی، تۆتێنهام، ئارسیناڵ و لیڤەرپوول.

هەروەها 3 یانەی لالیگاش بەشداری تێدا دەکەن، ئەوانیش ریال مەدرید، ئاتلێتیکۆ مەدرید و بارسێلۆنا دەبن.

لە سێریا ئەیش بەهەمانشێوە 3 یانە بەشداری دەکەن، ئەوانیش هەریەک لە یوڤێنتوس، میلان و ئینتەرمیلانن.

هەروەها بڕیاربوو یانەکانی بایرن میونشن و پاریس سانجێرمانیش بەشداربوونی خۆیان رابگەینن، بەڵام تاوەکو ئێستا یانەکانی ئەڵمانیا و فەرەنسا رەتیانکردووتەوە بەشداری لەو پاڵەوانێتییەدا بکەن، وڵاتەکانیشیان دژی بیرۆکەی بەڕێوەچوونی ئەو پاڵەوانێتییەن، کە ئیمانوێل ماكرۆنی سەرۆکی فەرەنسا، هەر زوو پێشوازی لە ھەنگاوی یانەكانی وڵاتەکەی کرد بۆ رەتكردنەوەی بیرۆكەی خولی سوپەری ئەوروپا و پاڵپشتی خۆی بۆ فیفا و یوفا دووپاتكردەوە.

تەنانەت بۆریس جۆنسۆن، سەرۆكوەزیرانی بەریتانیا، رایگەیاند کە پلانی خولی سوپەری ئەوروپا زیانی زۆر بە تۆپی پێ دەگەیێنێت و گوتی "پاڵپشتێ دەستەڵاتداران دەكەین بۆ گرتنەبەری رێكارەكان، ھاندەران لەو بڕیارە نیگەرانن".

بەم جۆره 12 یانەی دامەزرێنەری پاڵەوانێتییەکە لە کۆی 20 یانەی بەشدار لە خولەکەدا، بوونیان مسۆگەر دەبێت.

 

تیپ و یاریزانە بەشداربووەکان چ سزایەک وەردەگرن؟

 

یوفا سزای تووندی دژ بە هەموو ئەو یانانە راگەیاند کە لە خولی سوپەری ئەوروپادا بەشداری دەکەن، هەروەها یاریزانەکانیش بێبەش نابن لەو سزایانە.

یوفا لە بڵاوکراوەیەکی فەرمیدا، لەو بارەیەوە دەڵێت "ئەو یانانەی بەشداری لە سوپەرلیگدا دەکەن، رێگەیان پێنادرێت بەشداری لە هەر خول و پاڵەوانێتییەکی دیکە لەسەر ئاستی ناوخۆیی یان ئەوروپی یان نێودەوڵەتی بکەن، لەوانەشە رێگە بە یاریزانەکانیشیان نەدرێت درێسی هەڵبژاردەی نیشتیمانیی وڵاتەکانیان لەبەربکەن.

هەروەها وەک پێشتر یەکێتیی ئەوروپا رایگەیاندبوو، دەکرێت رێگە لەو یاریزانانە بگیرێت بەشداری لە گەورەترین پاڵەوانێتی تۆپی پێ لەسەر ئاستی جیهاندا بکەن، کە مۆندیالە.

ئەوەی جێگەی سەرنج و زۆریش گرنگە، ئەوەیە کە یەکێتیی خولەکانی ئینگلتەرا، ئیسپانیا و ئیتالیا و هەروەها دەستەی بەڕێوەبردنی ئەو خولانەش بە بڵاوکراوەی فەرمی پشتگیریی خۆیان بۆ یەکێتیی تۆپی پێی ئەوروپا دووپاتکردووەتەوە و هەموویان بیرۆکەی خولی سوپەری ئەوروپا رەتدەکەنەوە.

 

کێ ئەم کارەی کردووە؟

 

بیرۆکە و پلانی ئەم پاڵەوانێتییە لەلایەن فلۆرێنتیۆ پێرێزی سەرۆکی یانەی ریال مەدرید و ئاندریا ئانێلیی سەرۆکی یانەی یوڤێنتوسەوە دانراون، کە ئەو دوو پیاوە لەپشت گۆرانكارییە گەورەكەی تۆپی پێوەن.

ئەگەر ئەم پلانە سەریگرت فلۆرێنتینۆ پێرێز دەبێتە سەرۆکی پاڵەوانێتییەکە، ئاندریا ئانێلی سەرۆكی یوڤێنتوسیش دەبێت واز لە پۆستەكەی لە لیژنەی جێبەجێكاری یوفا و سەرۆكی دەستەی یانەكانی ئەوروپا بھێنێت، بەھۆی بەشداریكردنی یانەكەی لە خولی سوپەری ئەوروپا.

فلۆرێنتینۆ پێرێز، لەبارەی خولی سوپەری ئەوروپاوە، رایگەیاند "ئێمە لە ھەموو لایەكەوە ھاوكاریی تۆپی پێ دەكەین و دەمانەوێت لەسەر رێگەی راست بێت".

 

پارەیەکی خەیاڵی

 

ئەوەی وایکردووە یانە گەورەکانی ئەوروپا رازی بن بەشداری لەم پاڵەوانێتییەدا بکەن، ئەو پارە خەیاڵییەیە کە لەبری بەشداریکردن پێیان دەدرێت، بە جۆرێک کە ھەر تیپێک رازی بێت بەشداری لە سوپەرلیگدا بکات، بڕی 425 ملیۆن یۆرۆی پێدەدرێت وەک پاداشت، بێجگە لەوەی پاڵەوانی خولەکەش 19 ملیۆن یۆرۆی دیکەش وەردەگرێت.

 

لێکەوتەکانی ئەم پاڵەوانێتییە

 

ئەگەر فیفا و یوفا بە یارمەتی چەند وڵاتێکی ئەوروپا، نەیانتوانی رێگە لە ئەنجامدانی ئەم پاڵەوانێتییە بگرن، بێگومان لێکەوتەی زۆری دەبێت، کە ئەمانە هەندێک لەو ئەگەرانەن:

* بە ئەگەرێکی زۆر یارییەکانی چامپیۆنزلیگ و یۆرۆپالیگی ئەم وەرزە دوادەخرێن تا ئەو بابەتە یەکلادەبێتەوە.

* دەنگۆ ھەیە یانەی پاریس سانجێرمان راستەوخۆ وەک پاڵەوانی چامپیۆنزلیگی ئەم وەرزە دیاریبکرێت، چونکە سێ یانەکەی دیکەی گەیشتوو بە قۆناخی پێشکۆتایی، بەفەرمی بەشداری خۆیان لە سوپەرلیگدا راگەیاندووە و بەدڵنیاییەوە لەلایەن یوفاوە دووردەخرێنەوە و سزا دەدرێن.

* ئەگەر ھەیە فایناڵی یۆرۆپالیگ لە نێوان رۆما و ڤیاریال بکرێت.

* بی بی سی: قۆناخی پێشكۆتایی ئەم وەرزەی چامپیۆنزلیگ و یۆرۆپالیگ ھەڵدەوەشێتەوە.

* چاوەڕواندەكرێت پاڵەوانێتییەكی تایبەت بە خانمانیش دوای سوپەرلیگ رێكبخرێت.

* یارییەکانی سوپەرلیگ لە ناوەڕاستی ھەفتەدا دەکرێن و کێشە بۆ یارییەکانی خول دروستناکەن.

* کۆی پارەی دەستکەوتوو لە خولەکە 10 ملیار دۆلار دەبێت.

* ھەر 12 یانە بەشدارەکە، کە بە یانەی دامەزرێنەر ناسراون دەبێت بەفەرمی یوفا جێبھێڵن.

* ھەموو ئەو یانانەی بەشداری دەکەن لەلایەن یوفاوە بلۆک دەکرێن، ئەگەر بیانەوێت بگەڕێنەوە دەبێت لە خولی پلە پێنجی وڵاتەکانیانەوە دەستپێبکەنەوە.

* ئەی ئێس: ئەمە دوایین وەرزی ریال مەدریدە لە چامپیۆنزلیگدا.

* دەستەی گشتیی یانەكانی ئەوروپا پاڵپشتی خۆی بۆ فیدراسیۆنی تۆپی پێی ئەوروپا دووپاتكردەوە بۆ دژایەتیكردنی خولی سوپەری ئەوروپا.

* لالیگا و بوندێسلیگا بەفەرمی دژایەتیی خۆیان بۆ بیرۆكەی بەڕێوەبردنی خولی سوپەری ئەوروپا پێشاندا.

* سەرچاوەکان: ئەگەر سوپەرلیگ ئەنجامیش نەدرێت، ئەوا ریال مەدرید بۆی نییە بەشداری لە خولی یانە پاڵەوانەکانی ئەوروپادا بکاتەوە تاوەکو فلۆرێنتینۆ پێرێز سەرۆکی یانەکە بێت، چونکە ئەو سەرۆکی سوپەرلیگە.

* ئەنجوومەنی خولی ئیسپانیا بیر لەوە دەکەنەوە کە ئەگەر ئاتلێتیکۆ مەدرید یان ریال مەدرید یان بارسێلۆنا نازناوی لالیگا مسۆگەر بکەن، جامەکەیان پێنەدەن و راستەوخۆ یانەی پلەی چوارەم ببێتە پاڵەوان، واتا سێڤییا.

* ئەی ئێس: ئیسپانیا، ئینگلتەرا و ئیتالیا بیر لە ھەڵوەشاندنەوەی یارییەكانی ئەم وەرزەی خولی ناوخۆیان دەكەنەوە و نایانەوێت پاڵەوانی خول بە بردنەوەی نازناو بگاتە سوپەرلیگ.

 

* ئەنجوومەنی بەڕێوەبردنی خولی سوپەری ئەوروپا، بەمشێوەیە دەبێت:

فلۆرێنتینۆ پێرێز - سەرۆك
ستان كرۆنكی - جێگری سەرۆك
ئاندریا ئانێلی - ئەندام
جۆن دەبلیۆ ھێنری - ئەندام
جۆیل جلیزەر - ئەندام.

 

 

z.s

 

یۆرۆپالیگ... ئەمشەو 4 یانە بلیتەکانی چوارگۆشەی زێڕین وەردەگرن

 

ئەمشەو هەر چوار یاری گەڕانەوەی قۆناخی 8ـی یۆرۆپالیگ لە یەک کاتدا، کاتژمێر10:00 بەڕێوەدەچن، کە هەموویان پڕ دەبن لە گیانی رکابەری، بەو پێیەی ئەنجامەکانی یارییەکانی چوون، هیچ کامێکیان بەشێوەیەکی یەکلاکەرەوە نەبووە و هەر هەموو تیپەکان بواریان بۆ ئەوە ماوە بلیتی سەرکەوتن لە بەرژەوەندی خۆیاندا یەکلابکەنەوە.

لەوانەیە مانچێستەر یونایتد باشترین هەڵوێستی هەبێت، کە لە یاری چووندا لە دەرەوەی یاریگەی خۆیدا، بە دوو گۆڵی بێبەرامبەر لە گرانادای ئیسپانی بردووەتەوە و ئەمشەو لەنێو یاریگەی ئۆڵترافۆرددا میوانداری گرانادا دەکات.

شەیتانە سوورەکان بەپشتبەستن بە ئەنجامی باشی یاری یەکەمیان و بەو سەرکەوتنە گەورەیەی لە پرێمەرلیگیشدا بەسەر تۆتێنهامدا بەدەستیانهێنا، ورەبەرزن و بە متمانەیەکی زۆرەوە بەرامبەر ئیسپانییەکان یاری دەکەن، بەڵام بە وریاییش، چونکە سۆلشایەر هەر زوو هۆشداری ئەوەی داوەتە یاریزانەکانی کە نابێت بە ئەنجامی یاریی چون هەڵبخەڵەتێن و پێویستە رێز لە گرانادا بگرن، کە لەبارەیەوە گوتی "ئێمە گرانادامان بەرامبەر بارسێلۆنا و ریال مەدرید بینیوە، دەزانین کە تیپێکی چەند بەهێزن".

ئارسیناڵ، یانە ئینگلیزییەکەی دیکەی ئەم پاڵەوانێتییە، ئەرکی ئاسان نییە و ئەمشەو یاریزانەکانی ئارتێتا دوور لە یاریگەی خۆیان پێویستییان بەوەیە ئاستێکی نموونەیی پێشکەش بکەن بۆ ئەوەی بلیتی پێشکۆتایی لە قورگی سلاڤیا پراگ دەربێنن، کە لە یاریی چووندا لە لەندەن ئاستێکی بەرزیان پێشکەشکرد و بە گۆڵێک لەگەڵ ئارسیناڵ یەکسانبوون.

مایکل ئارتێتای راهێنەر، پێویستە ئەمشەو یاری وەرز بکات لەپێناو رزگارکردنی داهاتووی خۆی و وەرزی ئارسیناڵ، چونکە ئەگەر دەربکرێن هەم چارەنووسی خۆی دەکەوێتە مەترسییەوە و هەم هیوای ئارسیناڵ بە گەیشتنەوە بە چامپیۆنزلیگ کۆتایی دێت، کە بەردەوام بوون لە یۆرۆپالیگ و بردنەوەی نازناوەکە تاکە رێگەیە بەرەو ئەو ئامانجە، کە لەوەتەی وەرزی 2016 - 2017 نەیتوانیوە یاری لە چامپیۆنزلیگدا بکات.

رۆما و ئایاکس لەسەر یاریگەی ئۆڵیمپیکۆ لە پایتەختی ئیتالیا، یارییە پڕ لە رکابەرییەکەی ئەمشەو ئەنجام دەدەن، کە سەرەڕای ئەوەی ئیتالییەکان لە هۆڵەندا 2 - 1 لە ئایاکسیان بردووەتەوە، بەڵام پاڵەوانی هۆڵەندا ئەو تیپە نییە کە بە ئاسانی خۆی بەدەستەوە بدات و بەدڵنیاییەوە یاریزانەکانی هێشتا لەپێناو پێچەوانە کردنەوەی ئەنجامی یاریی چوون تێدەکۆشن و هەوڵدەدەن ئەرکە زەحمەتەکە جێبەجێبکەن و بلیتەکە لە رۆماوە ببەنە ئەمستردام.

لەوانەیە ئەرکی ڤیاڕیالی ئیسپانیش زۆر زەحمەت نەبێت، کاتێک میوانداری دینامۆ زاگریبی کرواتی دەکات، بەو پێیەی لەنێو زاگریبدا بە گۆڵێکی بێبەرامبەر لێیبردووەتەوە، بەڵام سەرەڕای ئەوەش ئەو ئەنجامە دڵنیاکەر نییە و کرواتییەکان دەکرێت لەنێو یاریگەی ڤیاڕیالدا ئاستێکی بەرزتر پێشکەش بکەن و کێشە بۆ ئیسپانییەکان دروست بکەن.

 

یارییەکانی ئەمشەو:

مانچێستەر یونایتد - گرانادا
سلاڤیا پراگ - ئارسیناڵ
رۆما - ئایاکس
ڤیاڕیال - دینامۆ زاگریب

 

 

z.s

 

پۆچیتینۆ: نامەوێت مباپێ بە درێسی ڕیاڵ مەدریدەوە ببینم

 

پۆچیتینۆ دوپاتیکردەوە دەجەنگێت لە پێناو مانەوەی مباپێ لە یانەکەیدا و نایەوێت بە درێسی ڕیاڵ مەدریدەوە بیبینێت

لە لێدوانێکیدا بۆ کەناڵی کواترۆ، ماوریسیۆ پۆچیتینۆی راهێنەری یانەی پاریس سان جێرمان ڕایگەیاند، خۆی و یانەکەشی دەجەنگن لە پێناو رازیکردنی کیلیان مباپێ بۆ مانەوە لە ڕیزەکانیاندا.

پۆچیتینۆ وتی: هیچ ئازارێک نابینم کاتێک یاریزانێکی یانەکەم لە یانەیەکی تر ببینم بەڵام دوای تەنها سێ مانگ کار کردن لەگەڵ مباپێ دەڵێم نامەوێت بە درێسی ڕیاڵ مەدریدەوە بیبینم و بەهەموو هێزی خۆمەوە هەوڵی مانەوەی دەدەم.

سەبارەت بە ئەگەری گواستنەوەی ڕامۆس بۆ پاریس، پۆچیتینۆ دەڵێت: نامەوێت باسی یاریزانێک بکەم کە لە یانەیەکی تر یاریدەکات و دەبێت ڕێزی یانەکانی تر بگرین و باسی یاریزانەکانیان نەکەین.

وتیشی: زۆر پڕوپاگەندە هەیە لەسەر بازاڕی گواستنەوە بەدڵنیاییشەوە ئێمە یانەیەکین کار دەکەین بۆ باشترکردن و بەهێزترکردنی پێکهاتەکەمان بۆ وەرزی داهاتوو.

لە کۆتایشدا لەسەر میسی وتی: لەماوەیەکی نزیکدا داهاتووی میسی ڕوون و ئاشکرا دەبێت لەگەڵ بەرشەلۆنەدا.

لوکاس ڤازکێز ئەم وەرزە ناتوانێت یاری بکاتەوە

 

لوکاس ڤازکێز، یاریزانی یانەی ریال مەدریدی ئیسپانیا بەهۆی ئەو پێکانەی لە یاری یانەکەی بەرامبەر بارسێلۆنا تووشی بووە، تاوەکو کۆتایی ئەم وەرزە ناتوانێت بەشداری یارییەکانی یانەکەی بکاتەوە.

ماڵپەری فەرمی یانەی ریال مەدریدی ئیسپانیا بەیاننامەیەکی فەرمی لەسەر پێکانی لوکاس ڤازکێز یاریزانی یانەکەیان بڵاوکردووە و لە بەیاننامەکەدا هاتووە، دوای ئەنجامدانی پشکنینە پزیشکیەکان، دەرکەوتووە ئەو یاریزانە لە ئەژنۆیدا تووشی پێکان بووە، بۆیە ماوەیەک لە یاریگاکان دوور دەکەوێتەوە.

سەرچاوەکە باسی لە وادەی دوورکەوتنەوەی نەکردووە، بەڵام رۆژنامەی وەرزشی مارکای نزیک لەم یانەیە ئاشکرای کردووە ڤازکێز تاوەکو کۆتایی ئەم وەرزە ناگەڕێتەوە یاریگاکان.