فریای ئاسایشی کۆمەڵایەتی بکەون 

محەمەد گۆمەشینی

بڵاو کردنەوەی ئامارەکانی کوشتن و خۆکوشتن و هەڕەشەکردن و تەقەکردن لەساڵی ٢٠٢٠ لەلایەن پۆلیسی هەرێمەوە ئاماژەیەکی ڕوون ومەترسیدارە بۆ سەرتاک و کۆمەڵگاو ئاسایشی خێزان ،ئەوە دەرخەی ئەو ڕاستیەن کە پلانی حکومەت لە دابین کردنی ئاسایش و کونتڕۆڵ کردنی چەک و گروپی مافیایی لاوازەو هێشتا چەک لای هاوڵاتیەو لەماڵ و شەقامەو لەدەست گروپ و عەشیرەتە ، هەرکات کەسێک بیەوێ کێشەکانی یەکلابکاتەوە لەجیاتی هانا بۆ دادگا بەچەکەکەی خۆی کارەکە دەکات و برا خوشک دەکوژی و کوڕ باوک و خزم لەسەر ئەرزو گەنج لەکافتریاو پیاو ژنەکەی و ئیتر گرنگ کوشتن ، ئاخر تەنها لەیەک ساڵ ٢٥٠ کەس کوژرابن و خۆیان کوشتبی و زیاتر لە ٣٠٠٠ هەزار حاڵەتی هەڕەشەکردن و تەقەکردن چیمان پێ دەڵێ !

لە سێ ملیۆن هاوڵاتی هەرێم ئەو ژمارانە بەپێ ی هەموو پێوەرێک ژمارەیەکی بەرزەو نزیکە لەهێڵی سوور ، ئەدی ئەگەر ئەو ژمارانە مەترسیدار نەبن ئەی چی ترمان پێ دەڵێن ، بۆیه ڕەنگە بمانەوێ هۆکارو دەرەنجامەکان بڵێین زۆری بوێ و یان هەرووتمان گوێیان بۆ نەگرتین ، بەڵام خۆ هەر دەبێ پەنجە لەسەر بڕینەکان دابنێین و هیچ نەبێ دوو قسەی لەسەربکرێ ، ئاخر ئەگەر ئەو بابەتەو گیان و ڕۆحی خەڵک و ژن کوشتن و خوشک و کچ کوشتن و مرۆڤ کوشتن شایستەی هەڵوەستە نەبن و شایستەی دیاری کردنی هۆکارو چارەسەری ڕێگری نەبن ئەی چی تر هەیە لەوە کارەساتر بێت و شایستەی کۆڕو سیمیناو چای و قاوە خواردنەوە بێت .

پێویستە بەجدی خەمێ لەو پرسه بخۆن و فریای بکەون و فریای ئاسایشی تاک و کۆمەڵ و خێزان بکەون دەنا کۆمەڵگەیەک ، کە نەوەی دووەمی ئەو کۆمەڵگەیە کە پێشتر چەکداربوو ژنکوژ بوو ئێستا بەفۆڕم و ناونیشانێکی تر هاتۆتەوە مەیدانەکەو لەسەردەمی قەیران بەردەوامە، دوایش کەسێک حاڵیم بکا دەرەنجامی ئەو هەموو کۆڕو سیمینارو بەیاننامەو پڕۆژە بەناوی پارێزگاری لەمرۆڤ لەمافی ژن و دژی ژن کوشتن و داکۆکی لەگەنج گەیشتە کوێ و بەرهەمەکەی چی بوو.

*کۆمەڵناس وڕاوێژکاری خێزانی

Hits: 19
Category: