گه‌ر ڤۆڵتێرێكمان هه‌بوایه‌!

شوان مه‌مه‌ندی

ڤۆڵتێر فه‌یله‌سوفی‌ فه‌رنسی ( 1694- 1778) پیاوێكی‌ زۆر ده‌وڵه‌مه‌ندبو، ده‌یتوانی‌ به‌ئاسوده‌یی بۆ خۆیی بژیت وده‌رباسیی‌ هه‌یچیش نه‌بێت، به‌ڵام ئه‌وها وێنای‌ ڕۆشنبیری‌ ده‌كرد(( ئه‌وه‌ی‌ ڕۆشنبیر له‌كه‌سانی‌ تر جیا ده‌كاته‌وه‌، داكۆكیردنه‌ له‌كێشه‌كانی‌ هه‌ق‌و عه‌داله‌ت)). باشوری‌ كوردستان به‌دۆخێكی‌ دژوار گوزه‌ر ئه‌كات كه‌ نه‌ك ته‌نیا سیاسییه‌كان ده‌سته‌وه‌ستاون، به‌ڵكو ئه‌مه‌ درێژبۆته‌وه‌ بۆ چینی‌ قه‌ڵه‌م به‌ده‌سته‌كان، پیاوانی‌ ئاینی‌ (كه‌دابه‌ش بوونه‌ بۆ سه‌ر دووبه‌ره‌( به‌ره‌ی‌ داكۆكی كه‌ری‌ له‌ماف خوران‌و به‌ره‌ی‌ به‌رخۆریزم)، مامۆستایان، ئه‌ندام په‌رله‌مانه‌ بێ باكه‌كان‌و بیریاره‌كان، كه‌ زۆرینه‌یان ته‌نها له‌سنورێكی‌ جوگرافی دیاری كراو خۆیان قه‌تیس كردووه‌و ئاره‌زوی‌ ئه‌وه‌ش ناكه‌ن، مه‌ودای‌ كاریگه‌رییه‌كه‌یان سنوره‌ دیاری‌ كراوه‌كه‌ تێپه‌رێنێت.  سه‌رباری‌ ئه‌مه‌ش قه‌ڵه‌م به‌ده‌سته‌كانی دیاسپۆراش كه‌ به‌شێكی‌ زۆریان موچه‌ی‌ بندیواریان هه‌یه‌ په‌یوه‌ستن به‌حزبه‌كانییان، كه‌ ڕێگاخۆشكه‌رن له‌پشتگیری‌ كردنه‌وه‌ی‌ گه‌نده‌ڵكاران‌و كه‌سانی‌ خۆهه‌ڵواس به‌دامه‌زراوه‌كانی‌ حكومه‌ت، كه‌ له‌ئیداره‌دانی‌ ناوه‌خۆ جگه‌ له‌پاشه‌كشه‌كردن له‌به‌ره‌وپێشوه‌چوونی‌ دۆخی پێداویستییه‌ هه‌نوكه‌ییه‌كانی‌ خه‌ڵك‌و بێ به‌رهه‌می‌ چیتریان له‌هه‌گبه‌ دانه‌بووه‌، كه‌چی‌ ئه‌م حزبانه‌ به‌ربژێریان كردوون بۆ هه‌ڵبژاردنه‌كان، بۆ ئه‌وه‌ی‌ زیاترو دووباره‌ش له‌سه‌ر پشتی‌ خه‌ڵكی‌ ڕه‌شوررووته‌كان خۆیان زیاتر ده‌وڵه‌مه‌ند بكه‌ن وجوانكاری‌ ده‌مووچاویان‌و قژیان لێبنێنه‌وه‌، چه‌ندین ساڵ هه‌موو پێداویستییه‌كانی‌ ئیداره‌ دانییان له‌به‌ر ده‌ست دابوو كه‌چی ته‌نها له‌بیری‌ خزمه‌تی‌ گیرفانی‌ خۆیان بون وه‌ك:

1- كاری‌ بازرگانی‌ ناوه‌خۆ  ده‌روه‌ له‌ژێر ناوی‌ جیاجیاو وه‌همی.2- دروست كردنی‌ مه‌زره‌عه‌ و داگیركردنی گردوو ته‌پۆلكه‌.3- دروست كردنی‌ شار و گوند، له‌ژێر چه‌ندین ناوی‌ بیانی‌.4- قوتابخانه‌و زانستگایی  بێ شوماری‌ بێ به‌رهه‌م.5- مۆڵ‌ و ماركێته‌گه‌وره‌كان…كه‌ ئه‌مانه‌ نموونه‌یه‌كی زۆر بچوكن، له‌م چه‌ند ساڵانه‌ كه‌ پێگه‌كانی‌ خۆیان به‌كارهێناوه‌ بۆ به‌رژه‌وه‌ندییه‌ حزبی‌‌و كه‌سییه‌كانییان، بێ ئه‌وه‌ی‌ ڕۆژگارێك كه‌سێك هه‌بێت پێیان بڵێت پشتی‌ چاوتان برۆیه‌.ئه‌وقه‌ڵه‌م به‌ده‌ستانه‌شی، كه‌ خۆیان له‌ به‌ره‌ی‌ چینی‌ مافخوراوان، هه‌ژمار ئه‌كه‌ن. وه‌ك پێویست نه‌یان توانیووه‌ كاریگه‌ری ئه‌وتۆ جێبهێڵن له‌سه‌ر جڤاكی‌ كوردی‌ هه‌م له‌ تاراوگه‌و هه‌م لێره‌ش، ئه‌مه‌ش له‌لایه‌كه‌وه‌ به‌هۆی‌ دووریان له‌ ڕووداوه‌كانی‌ ئێره‌و هه‌ڵسه‌نگاندنه‌كانییان وه‌ك پێویست نییه‌. له‌باره‌ی‌ دۆخی ژیانی‌ وڵاتییان كه‌ رۆژ به‌دوای‌ ڕۆژ سه‌ختر ئه‌بێت .

سه‌رده‌مێك به‌سه‌دان كه‌سی داهێنه‌ریان خه‌ڵات كردن، ئه‌بێت ئه‌م هه‌موو داهێنه‌ره‌ ئێستا بۆ گیریان خواردبێت. ولاتێك ئه‌وه‌نده‌ داهێنه‌ره‌ی‌ هه‌بێت مایه‌یی نه‌نگیه‌ ئێستا ئه‌مه‌ حاڵی‌ بێت! زۆرێك له‌وانه‌ كه‌ به‌ساڵ له‌وڵاتانی‌ خاوه‌ن فكرو داهێنان له‌سه‌ر قوتی‌ خه‌ڵكی‌ خێر له‌ خۆ نه‌دیو، نه‌ك نه‌یان توانی دیمه‌نی‌ پێشكه‌وتنی‌ ئه‌وان بقۆزنه‌وه‌ به‌ڵكو بگره‌ پێشكه‌وتنه‌كانی‌ ئێره‌یان هاوشان ئه‌كرد به‌و وڵاته‌ سیسته‌ماتیكانه‌، ڤۆڵتێر له‌ساته‌وه‌ختی‌ مل ملانێی‌ له‌گه‌ڵ فێنده‌مێنتالیزمی‌ مه‌سیحیدا ئه‌ی‌ وت(( پێنج شه‌ش فه‌یله‌سوف‌و چاپخانه‌یه‌كم به‌سه‌، دڵنیاش بن له‌وه‌ی‌ ئه‌توانین له‌م دووسێ ساڵه‌دا شۆڕشێكی‌ گه‌وره‌ له‌ئه‌قڵی‌ خه‌ڵكیدا به‌رپابكه‌ین)).

به‌شێك له‌جۆرنالیست‌و خاوه‌ن بڕوانامه‌ زانكۆییه‌كان كه‌ ئێستا به‌ملیۆنان  دینار خانه‌نشین كراون و به‌شێكی‌ تریشیان دووباره‌ ئه‌یانه‌وێت سودمه‌ن ببن له‌سه‌ر حسابی‌ خه‌ڵكی‌ خێر له‌خۆ نه‌دیو، به‌بێ ئه‌وه‌ی‌ توانیبێتیان ته‌به‌نی‌ بیرۆكه‌یه‌كی‌ وایان كردبێت كه‌ گه‌ل هه‌ست به‌ئاسوده‌یی بكات، ئه‌بوایه‌ له‌سه‌ر بچوكترین مافی هه‌ر هاو نیشتیمانیه‌ك سڵیان له‌ هیچ شتێك نه‌كردباوه‌، به‌ڵام به‌داخه‌وه‌ گه‌ر هه‌ڵگری‌ به‌رنامه‌یه‌كی‌ تۆكمه‌و ڕه‌نگ ڕێژكراوبانه‌ كه‌ وه‌ك ڤۆڵتێر ئه‌ڵێت(( هه‌ركه‌سێك شه‌ری‌ فیكری‌ بباته‌وه‌، ئه‌وا دواترو هه‌ركاتێك هه‌ڵومه‌رج له‌باربو، شه‌ڕی‌ سیاسیش ده‌باته‌وه‌و سه‌ركه‌وتووش ده‌بێت))، ژیانی‌ ئه‌م گه‌له‌ سه‌د پله‌ گۆڕانكاری‌ به‌خۆیه‌وه‌ بینی بو.

 

 

وتیان چاكی دەكەین كوێریان كرد

هیوا سەید سەلیم
ئەمەی سەرەوە كە ووتەیەكی ناوداری عەرەبیە رێك لەگەڵ ئەو هەموو ئیدیعایانەی بەرپرسانی هەرێمی كوردستان دێتەوە، ساڵێكە دەنگوباسی چاكسازی لە مووچەی خانەنیشینان و پۆستە باڵاكانی هەرێمی كوردستان مێشكیان كاس كردووین و بەربرسانی هەرێم سەری زار و بنی زاریان لەو ماوەیە بۆتە باس باسی ئەو چاكسازیە.

بەو دواییە لە لایەن بەرپرسانی حوكمەتی هەرێم ئەوە ئاشكرا كرا كە لەپاڵ زۆری مووچەی بۆستی باڵا كەسانێكی زۆریش هەن ئەو مووچە زۆرەیان پێدەدرێت كە رۆژێك ئەو پۆستەیان نەبینیەوە بۆیە پارەیەكی زۆر لەو پۆستە باڵایانە سەرف دەكرێت، كە لە ئێستای دۆخی هەرێمی كوردستان كە بەدەست قەیرانی ئابووری دەناڵێت بۆتە بارێكی یەكجار گران.

لە پێناو چارەسەری ئەو قەیرنە و كەمكردنەوەی خەرجیەكان و گیرانەوەی باڵانسی لاسەنگ لە نێوان داهات و خەرجیەكان كە دۆخی ئابووری كوردستاتنی تووشی هەڵئاوسانێكی زۆركردووە حكومەتی هەرێم پرۆژە بڕیارێكی ڕەوانەی پەرلەمانی كوردستان كرد كە بە پرۆژەی چاكسازی لە مووچەی مووچەخۆران ناسراوە.

ئەو پرۆژەیە لە پەرلەمانی كوردستان بە دوور لە چاوی كامیرا و بە دەنگدانی نەهێنی دەنگی لەسەر دراوە بۆیە دوای دەنگدانی هەر لایەن و فراكسیۆنە دەیەوەێت خۆی لە بەشێكی ئەو پرۆژە بڕیارە بێ بەری بكات.

خاڵی لاوازی پرۆژەكە بریتیە لە ئەو رێژە زۆرەی كە بۆ خانەنیشینی پلە باڵاكان لە هەرێمی كوردستان دیاری كراوە واتا هەموو پلە باڵاكان بەڵام چونكە دواجار یاساكە لە لایەن پەرلەمانی كوردستان و بە دەنگی پەرلەمانتاران تێپەڕیوە زۆربەی رەخنەكان روویان لە پەرلەمانی كوردستانە، ئەگیان پۆستی تریش هەیە كە لە شێوەی پەرلەمانتاران مووچەی زۆریان بۆ دەبڕێتەوە لە كاتی خانەیشین كردنیان بەڵام باس ناكرێن!!

لە زۆرێك لە وڵاتان كاتێك پەرلەمانتار كۆتایی بە كارەكەی دێت دەگەڕێتەوە سەر كاری پێش پەرلەمانتاری، وەیان بە مووچەیەكی رەمزی خانەنیشین دەكرێت، تەنانەت لە عێراقیش ئەو پرسە بەیاسا رێكخراوە بۆیە ئەو داوایەش رووبەرووی پەرلەمانی كوردستان كرایەوە، بەڵام ئەوەی لە پەرلەمانی كوردستان بە یاساكرا رەخنەی زۆر هەڵدەگرێت بە تایبەت لە ئێستادا كە زۆربەی چین و توێژەكانی كوردستان كێشەی مووچەیان هەیە لەسەرینی یاسای پاشەكەوت و دواكەوتنی مووچەكانیان.

دوو تێبینی زۆر گرنگ لەسەر مووچەی پلە باڵاكانی هەرێمی كوردستان هەیە، یەكەمیان ئەوەیە لە بنەڕەتدا مووچەكەیان بە بەراورد لەگەڵ مووچەخۆرانی ئاسایی زۆرە، واتا جیاوازیەكە زۆر زەقە، دووەمیش ئەوەی ئەمجارە بە یاساكرا بریتیە لەو رێژە زۆرەی كە پۆستە باڵاكان لە ناویشیاندا پەرلەمانتاران پێی خانەنیشین دەكرێن.

واتا رێژەیەكی زۆر لە بەرامبەر خزمەتێكی كەم، كە ئەمە رێك پێچەوانەی زۆرینەی مووچەخۆرانی ترە لە هەرێمی كوردستان، كە ئەوان بە خزمەتێكی زۆرەوە بە مووچەیەكی كەم خانەیشین دەكرێن، كە ئەمە بە یاسا كرا بە دڵنیایەوە ڕەخنەی لێدەگیرێت.

بۆ ئەوەی پەرلەمانی كوردستان خۆیان تووشی ئەو هەلەیە نەكەن دەبوو مووچەی پۆستە باڵاكان كەم بكەنەوە، واتا مووچەی سەرۆكایەتیەكانی هەرێم و حكومەت و جێگرەكانیان و سەرۆكایەتی پەرلەمان و جێگرەكانی تا راوێژكار و بەرێوەبەرە گشتیەكان، ئەگەر ئەم كارەیان بكردایە ئەوسا بۆ خانەنیشینی ئەمانە رەخنەیەكی ئەوتۆ نەدەگیرا، كە ئەوە نەكرا پەرلەمان بەرژەوەندی پەرلەمانتاران پۆست باڵاكانی خستە سەرووی زۆرینەی خەلك ئەم جۆرە كارانەوەی لێدەكەوێتەوە كە بینیمان، ئەویش دەبێتە هۆی ناشیرین كردنی كاری پەرلەمانتاری و بێ هەیبەت كردنی پەرلەمانی كوردستان.

لە ئێستادا كە یاساكە وێڕای ئەو ڕەخنە زۆرەی لێی دەگیرێت لە پەرلەمانی كوردستان بە بڕیاری زۆرینەی پەرلەمان تێپەڕیوە، بۆیە پێویستە لە پێناو بەهەند هەرگرتنی رەخنەكانی خەڵك و رای گشتی هەرچی زووە پەرلەمانی كوردستان بە یاسایەكی تازە موچەی پلە باڵاكان دیاری بكات لەسەر بنەمای كەمكردنەوەی جیاوازیەكان، ئەگینا دەبێت چاوەڕوانی كاردانەوەی توندتری خەڵك بن، چونكە ئەوەی كرا بریتیە لەوی لە شوێنی چاكی بكەن كویرتان كرد.

 

ڕژێمی سەهیۆنی ئیسڕائیل، مزایدەیەک لای گەلی عەرەبی...

حسن احمد

ساڵی (۲۰۰٤) لە ئوردن بەشدار بووین لە خولی ژمارە (۱)ی تائسیسی سوپای عێراق، (۷٥۰) عەرەب و (۲٥۰) کورد بووین، دابەشیان کردبووین بەسەر دوو مەدرەسەی دروع و مەشاد، ماوەی (۳) مانگ بوو لە سەربازگەی زەڕقای لە مەشق و ڕاهێنان و خوێندنی مەنهەجە سەربازیەکاندا بەدەوام بووین، جار و باریش سەردانی کولیە و مەدرەسە عەسکریەکانیان پێ دەکردین، چەند گەشتێکیشمان بۆ شوینەوارەکانی ئوردن و سنورەکانی ئیسڕائیل ئەنجام دا، هەندێک جاریش باسی برایەتی کورد و عەرەبیان بۆ دەکردین، دەیان ویست سۆزی ئێمە ڕابکێشن، باسی ئازایەتی صلاح الدینی ایوب یان بۆ دەکردین کە چۆن قودسی رزگار کردووە، ئێمەش گلەیمان لە بێ هەلویستی عەرەب دەکرد لە کاتی ئەنفال و کیمیاباران کردنی هەلەبجە، ئەوانیش چەند پاساوێکی لاوازیان دەهێنایەوە.

ڕۆژێک خویندکارێکی کورد کڵاوە سەربازیەکەی لە ناو کەتافەی سەر شانی لول دابوو، ئەفسەرە ئوردەنیەکانیش بانگیان کردوو زۆر لێی توڕە بوون، ئێمەش تەداخولمان کردوو بەرگریمان لە هاوڕێ کەمان کرد نەمان زانی مەوزوع چیە؟ گوتیان کاکە ئەوە عادات و تەقالیدی سوپای سەهیۆنی ئیسڕائیلە! چۆن دەبێ کەسێکی موسڵمان ئەو ڕەفتارە ناشیرینە دووبارە بکاتەوە، ئێمەش پێمان گوتن گەورەم، بەمەبەست نەبووە و نەیزایووە هەر چۆنێک بوو کێشەکە کۆتای هات.

کافتریایەکی گەورەشمان هەبوو (۲) تەلەڤیزیۆنی لێبوو، یەک بۆ عەرەبەکان و ئەویتریش بۆ ئێمە، ڕۆژێک چوومە کافتریا هیچ کورسیەک نەمابوو بۆ دانیشتن، سەیرم کرد عەرەبێکی ڕەشکە لە سەر شەش کورسی دانیشتووە، بەعەرەبیە شڕەکەی خۆم پێم گوت کاکە بێ زەحمەت کورسیەکم دەوێ، زۆر بە توڕەی ولامی دامەوە منیش لەگەلی بەشەڕ هاتم، عەرەبەکان لێم ئاڵان باش بوو برادەرانی کورد فریام کەوتن ئەگینا باشیان لێ ئەدام، خویندکارێکمان لەگەڵ بوو ناوی حسێن نەجم بوو گوتی ئەوانە کورسی دانیشتنمان نادەنێ چۆن کورسی حکوم مان ئەدەنێ، ئەوکات کێشەیەک لە مەجلیسی حکوم هەبوو، کاک مسعودیش ئالایەکی نوێی پێشنیار کردبوو بۆ ئەوەی شوێنی ئاڵای عیراق بگرێتەوە، ئەو عەرەبانەی لەگەڵمان بوون شێت و هار ببوون.

رۆژانە گویچکەیان پڕ کردبووین لە دژایەتی کردنی ئیسڕائیل، کەچی لە ژێریشەوە پەیوەندیەکی باشیان لەگەڵ یەکتر هەبوو، تەنانەت ئاوی خواردنەوەشیان لە ئیسڕائیلەوە بۆ هاتبوو، رۆژێک بەگەشتێکی سەربازی چوینە سنوری نێوان ئیسڕائیل و سوریا و ئوردن، بەلام سنورەکان ئاسایی بوون هیچی لێ نەبوو جگە لە چەند مانگایەک نەبێ، خوێندکارێکمان هەبوو ناوی صلاح پارێزانی بوو، کورێکی زمان زان و هوشیار بوو، لە ئەفسەرە ئوردنیەکانی پرسی ئەو دەبابە و مەدفعیانەتان لە بەرامبەر سوپای سەهیۆنی ئیسڕائیل لێرە جێگیر کردووە.

ئوردنیەکان سەریان سوڕما چاویان گێڕا هیچیان نەدی! گوتیان کوا هیچی لێ نیە؟ کاک صلاحیش گوتی مەبەستم ئەو مانگایانەیە! ئەفسەرەکان زۆر تێک چوون گوتیان چیە کاکە صلاح گالتەمان پێ دەکەی؟ صلاحیش گوتی نەخێر ئێوە گالتە بە ئێمە دەکەن، گوتیان بۆچی؟ گوتی ئەوە سێ مانگە مێشکی ئێمەتان برد، ئەوەندەی بە دووژمن و کافر باسی ئیسڕائیلمان بۆ بکەن، کەچی تاکە سەربازێکی ئێوە نابینین لە بەرامبەر سوپای ئیسڕائیل وەستابێ! ئەو چەواشەکاریە چیە دەیکەن، ئوردەنیەکان بێ دەنگ بوون هیچ وڵامێکیان پێ نەبوو، هاوڕێیانی ئازیز ئەوەی لە کوردستانیش دەگوزرێ زۆربەی چەواشەکاری و موزایدەی سیاسیە، دوور لەو واقیعەی تێی داین...

 

هەموویان وەكو یەكن

عومەرئاوارە

خەڵكی دووز خورماتوو لە ئێستادا زۆر دڵخۆشن بەوەی كە هێزێك لە بەغداوە هاتووە وماڵ وحاڵیان تا رادەیەك لە دەست پەلامارەكانی حەشدی شەعبی (توركمانی) دەپارێزێت وڕێگری لەو پێشێلكارییانە دەكەن كە لە دوای داگیركردنی شارۆچكەكە لە لایەن حەشدی شەعبییەوە لە سەر دەستی ئەو حەشدانە ئەنجامدرا، كەچی هێشتاكە تێنەگەیشتوون ئەوەی لە خورماتوو ئەنجامدرا چی حەشدی شەعبی ئەنجامیبدات وچی هیچزێكی دیكە ئەنجامی بدات هەموو یەك روون ویەك پاڵنەریان هەیە كە ئەویش حكومەتی عێراق وخودی حەیدەر عەبادی سەرۆك وەزیرانی عێراقە ئێتر پێویست ناكات هەر هێزێك بێتە شارۆچكەكە بێجگە لە هێزی پێشمەرگە دڵی پێخۆش بكەیت وچەپڵەی بۆ لێبدەێت وبە هێزێكی ڕزگار كەر وبەرگریكەر هەژماری بكەیت ، چونكە داگیر كەر هەر دەگیر كەرە بە چی ڕوو وشێوازێك بێت كە بە داخەوە هۆكاری سەرەكێی هێنانی ئەو هێزانە ئەوانەبوون كە لە كردارەكەی 16 ئوكتۆبەردا هەمێشە باس دەكران وناویان دەهێنرا.

پێش 16 ئوكتۆبەر، كورد لە خورماتوو خاوەن دەسەڵاتێكی مۆراڵ وبە هێز بوو ، خاوەن پێگەیەك بوو كە بۆخۆی توانی هاوتاییەك یاخود هاوسەنگییەك لە بەرامبەر نەیارانی دروست بكات ، هێزێك بوو هەرچەندێ‌ زۆرجار لایەنی بەرامبەر شەڕی پێدەفرۆشت بەڵام سڵی لێدەكردەوە بەڵام بەداخەوە بە هۆی ڕووداوە نەخوازراوەكەی 16 ئوكتۆبەر ڕەنجی چەندان ساڵ لەو شارۆچكەیە لە دەستدراو ودوژمنێك لەو شارۆچكەیە كرایە خاوەن ماڵ كە نەك بە كاری خاوەن ماڵدارێتی نایەت بگرە بە كەڵك ئەوەش نایەت كە بكرێتە میوان بەڵام ئێتر كاڵفامێتی هەندێ‌ كەس وایكرد كە ئەوان بەڕە لە ژێر پێی كورد لە خورماتوو دەربهێنن ونەك بیكەنە میوان كە خۆی خاوەن ماڵ بوو بگرە لەو شارۆچكەیە دەربەدەریان كرد وشارەكەیان لە دەستی دەركرد.

كورد لە پێش 16 ئوكتۆبەر لە شارۆچكەی دووز خورماتوو لە زۆر شیتدا هاوتاوهاوسەنگ بوو ، هەر ئەوەیش نەهێشت شارۆچكەكە بكەوێتە دەست داعش وئەو كاتەش ئەو بەرگری لێدەكرد ئەمانەی ئێستا كە بونەتە دوژمنی سەرسەختی كورد لە ئێستاكە كونە مشكیان لێببوە قەیسەری وهیچ وجودێكیان نەبوو وئەو توركمانانەی كە لە پێشتادا كەوتونەتە ویزەی كوردانی ئەم شارۆچكەیە وماڵ ودوكانی كورد دەسوتێنن وتاڵانی دەكەن هەر كە داعش پەلاماری شارۆچكەكەی بدابایە ئێتر ئەوان ترس هەموو جەستیانی دەتەنی وپەنایان بۆ كوردو هێزی پێشمەرگە دەهێنا ، بەڵام بە هۆی كاڵفامەكانی كوردو 16 ئوكتۆبەر ئەوان بونە دڕندەو خاوەن ماڵ لە خورماتوو وكوردیش سەرگەردان ودەربەدەر وئاوارە.

گریمان ئەو هێزە لە ئێستادا لە خورماتوو جێگیربوونە ئەوان هاتوون ئارامی بۆ نێو شارۆچكەكە بگەڕێننەوە وڕێگری لە دەستدرێژییەكانی حەشدی شەعبی بكەن  نەهێڵن جاریكی دیكە پێشێلكارییەكان دووبارە ببنەوە ،بەڵام كێی دەڵێت ئەمان لە ئەوان باشتر دەبن ، چونكە دوژمن هەر دوژمنە هەرچۆنێك بێت ،راستە ئەوانە لە ئێستادا كەمێك ئارامییان بۆ خورماتوو گەڕاندۆتەوە بەڵام لە گەڕەكە كوردییەكان چەندەها خانووی كوردییان بە بیانووی جۆراوجۆر داگیر كردووەو ڕێگە نادەن خاوەن ماڵەكە بگەڕێتەوە وتێدا جێگیر بێت كە ئەمیش ناچارە جارێكی دیكە سەر خۆی وماڵ ومنداڵی هەڵبگرێت وخورماتوو بەجێبهێڵت وڕوو لەو شوێنە بكات كە تێدا ئاوارەیە لە ئێستادا.

ئەوەی دەگوترێت ئەمە لە لەوەی دیكە باشترە لە خورماتوو وانییە، دەبێت كورد لە بەرامبەر خورماتوو بە خویدا بچێتەوە هەرچەندە دڵنیام وا ناكات چونكە گەر وایبكردابایە ئەوا نەیدەهێڵا 16 ئوكتۆبەر ڕووبدات ، بەڵام هێشتاكە كات وكارتی بە دەستەوە ماوە بۆ ئەوەی ڕوحی كوردبون وكوردایەتی لەو شارۆچكەو كەركوك وشارەكانی دیكەش زیندو بكاتەوە ئەو قوناغەی كە لە 16 ئوكتوبەردا دروستبوو بە سیاسەتی یەك ماڵی ویەك هێزی بیگوڕێت ، چونكە بەرامبەرەكەی هیچی پێنییە وتانوانێت بەرگەی كورد بگرێت بەڵام ئەم سیاسەتەی ئێستای كوردی قواستۆتەوەو هەنگاوی ناڕەوابەرامبەر بە كورد بە تایبەت لە ناوچە جێناكۆكەكان دەهاوێت.

قسه‌یه‌ك له‌باره‌ی بڵاوكردنه‌وه‌ی گرته‌ ڤیدیۆییه‌كه‌وه‌

ژاوین شاڵى
له‌هه‌ر كوێیه‌كی دنیا هه‌ندێك بابه‌تی رۆژانه‌ رووده‌ده‌ن كه‌ شه‌قام و رای گشتی له‌لایه‌ك و مێدیا و چه‌ناڵ و تۆڕه‌ كۆمه‌ڵایه‌تییه‌كان له‌لایه‌كیتره‌وه‌ ده‌وروژێنن، بڵاو بوونه‌وه‌ی ئه‌و گرته‌ ڤیدیۆییه‌ش كه‌ پێویست ناكات بچینه‌ بنی كوله‌كه‌كه‌ له‌لایه‌كی تره‌وه‌، چونكه‌ پێموابێت هه‌مووان ده‌زانن و دڵنیان باس له‌چی ده‌كه‌م ئه‌مه‌ له‌لایه‌ك، له‌لایه‌كیتریشه‌وه‌ ناكرێت شوێن ئه‌و مێگه‌له‌ كه‌وم كه‌ هه‌موو ئۆبجێكته‌كه‌ له‌ وشه‌ و ده‌لاله‌ی (له‌شفرۆش)دا چڕ ده‌كاته‌وه‌. چونكه‌ له‌سه‌ر ئه‌وه‌ قسه‌ی زێده‌ترم هه‌یه‌ و له‌ شوێنێكیتر و له‌كاتێكی نزیكدا به‌ چڕی باس له‌ له‌شفرۆش و له‌شكڕ نه‌ك له‌ كوردستان به‌ڵكو له‌ته‌واوی دونیادا ده‌كه‌م.

لێره‌ به‌كورتی و ته‌نێ ده‌مه‌وێت تیشك بخه‌مه‌ سه‌ر ئه‌و شۆك و ده‌م داچه‌قین و هه‌راو زه‌نایه‌ی له‌ پاش روودانی گرته‌ ڤیدیۆییه‌كه‌وه‌ كه‌وته‌وه‌، من ته‌نیاو ته‌نیا واق وڕماوو ده‌م داچه‌قیوم به‌رامبه‌ر به‌ بوومه‌له‌رزه‌كردنی ئه‌و بابه‌ته‌ و له‌نێو زمانمدا پرسیاری بۆچیییییه‌كی گه‌وره‌ خۆی ده‌ته‌قێنێته‌وه‌؟؟؟

مه‌گه‌ر له‌ وڵاتی ئێمه‌ هه‌میشه‌ چاو ده‌م له‌سه‌ر گۆشت و ناوگه‌ڵی ئافره‌ت نییه‌؟ مه‌گه‌ر له‌ مه‌لا مه‌زهه‌رته‌وه‌ بیگریت تا دنیا دیده‌ و به‌ناو رۆشنبیر و خاوه‌ن ئه‌زموونه‌كانه‌وه‌ هه‌میشه‌ كه‌ بیانه‌وێت ئافره‌تێك بخه‌ن و به‌ ڕای خۆیان بیكه‌ن به‌ په‌نگ په‌نا بۆ ئه‌خلاق و رووتیی و پیرۆزییه‌كانی نابه‌ن؟

من ماوه‌یه‌ك به‌ر له‌ ئێستا به‌ دیار ڤیدیۆیه‌كی ئه‌و مه‌لا گه‌مژه‌یه‌وه‌ كه‌ ناوی مه‌زهه‌ره‌ و مێگه‌لێكی زۆر له‌ هه‌وادار و به‌ناو بڕواداری به‌دیار خۆیه‌وه كۆكردۆته‌وه‌ قێزم هاته‌وه‌ كه‌ ده‌ڵێی له‌ سه‌حرا لێی قه‌وماوه‌ به‌ هه‌موو هێزی خۆی هاوار ده‌كات و ده‌ڵێت خوایه‌ ئه‌وه‌ی بڕوای به‌ ئیسلام نییه‌ و كوفر به‌و دینه‌ ده‌كات و له‌مجۆره‌ قسانه‌ ده‌ڵێت خوایه‌ له‌ڕێی ژنه‌كه‌یه‌وه‌ سووكی بكه‌یت و تۆڵه‌ی لێ بكه‌یته‌وه... ئه‌مه‌ یه‌ك

پاشان به‌ ڕێكه‌وت بۆ سبه‌ی ئێواره‌كه‌ی له‌گه‌ڵ هاوڕێیه‌ك به‌ر خوێنه‌وار و خاوه‌ن بڕوانامه‌یه‌كی كورد كه‌وتین لێره‌ له‌ ئه‌مریكا، باس هاته‌ سه‌ر ئه‌و ژنانه‌ی كه‌ له‌ بواری ئیعلام و نوسین و راگه‌یاندنه‌وه‌ ده‌رده‌كه‌ون و به‌تایبه‌تتر ئه‌وانه‌ی كه‌ له‌ سه‌ر به‌ بزوتنه‌وه‌ی فێمینیستی و داكۆكیكار له‌ مافه‌كانی ئافره‌ت ئه‌ژمار ده‌كرێن، به‌ڕاده‌یه‌ك ئه‌حمه‌ق بوو ته‌نانه‌ت كورد وته‌نی نه‌یوت له‌گه‌ڵ رێزم بۆ ژاوێن خان وتی هه‌مووان ماڵی پیاو وێران ده‌كه‌ن و ساقیته‌ن؟ ئه‌مه‌ دوو

سێ، خۆم كێشه‌ی كۆمه‌ڵایه‌تیم له‌گه‌ڵ هه‌ر كه‌س و لایه‌نێك دروست بووبێت هه‌ڕه‌شه‌ له‌لایه‌نی ئه‌خلاق و كه‌رامه‌ت و كه‌سێتیم لێكێراوه‌، به‌ڵێ له‌م نزیكانه‌ و پێشتر و هه‌ر مه‌پرسه‌ چۆن و كێ..

ئه‌مانه‌و ده‌یه‌ها و سه‌ده‌ها چیرۆكی سه‌یر و سه‌مه‌ره‌ی تر له‌وباره‌یه‌وه‌ كه‌ به‌كورتی ده‌بێت وات لێبكات تووشی شۆك و ڕاچه‌نینت نه‌كات و بڕوا بكه‌یت هه‌ر شتێك له‌و په‌روه‌رده‌ بارگاوی به‌ ئیسلام و عورف و عاداتی سه‌له‌فیزمه‌وه‌ كه‌ ئێستا كوردستان باوه‌شێكی گه‌وره‌ی بۆ بانگخوازانی كردۆته‌وه‌ رووده‌دات.
زۆری تر و جارێ ئه‌منه‌ به‌سه‌.

zhawen shali
oshkosh, wi