بەمەبەستی زیاتر بایەخ و گرنگیدان بەبەرهەمی ناوخۆ، بڕیاردراوە قەدەغەكردنی هاوردەكردنی بەرهەمی پەتاتە درێژبكرێتەوە و هیچ وادەیەكیش بۆ رێگەپێدان بەهاوردەكردنی دیارینەكراوە.
لە ڕاگەیانراوێكی دەروازەی نێودەوڵەتی باشماخدا هاتووە، وەزارەتی كشتوكاڵی حكومەتی هەرێمی كوردستان لەبروسكەیەك بۆ بەڕێوەبەرایەتی گشتی گومرگ، ڕایگەیاندووە كە هەرچەند بڕیاربو لە رۆژی 15ی (تشرینی دوەم/11)ی 2021 قەدەغە لەسەر هاوردەكردنی پەتاتە هەڵگیرێت، بەڵام تا ماوەیەكی دیكەی دیارینەكراو قەدەغەی لەسەر هەڵناگیرێت و ڕێگە بەهاوردەكردنی نادرێت.
لەڕاگەیانراوەكەدا، بازرگانان ئاگاداردەكەنەوە تا ڕاگەیاندنی كاتی هەڵگرتنی قەدەغەی هاوردەكردنی هەوڵی هاوردەكردنی پەتاتە نەدەن چونكە ڕێگەی پێ نادرێت.
پێشتر وەزارەتی كشتوكاڵی هەرێم رایگەیاندبو، بەمەبەستی زیاتر بایەخ و گرنگیدان بەبەرهەمی ناوخۆ، بڕیاردراوە قەدەغەكردنی هاوردەكردنی بەرهەمی پەتاتە تاوەكو 15ی (تشرینی دوەم/11)ی 2021، بۆئەو مەبەستەش نوسراو ئاراستەی سەرجەم دەروازە سنورەكانی هەرێمی كوردستان كراوە.
