گوتەبێژی پۆلیسی هاتوچۆی هەولێر رایگەیاند لە ئەنجامی پێشبڕكێی دوو شۆفێر لەسەر بەشێکی تەواونەکراوی شەقامی 150 لە هەولێر شۆفێرێک گیان لەدەستدەدات و ئەوی دیکەشیان بە سەختی بریندار دەبێت.
فازڵ حاجی، گوتەبێژی پۆلیسی هاتوچۆی هەولێر، ئەمڕۆ سێشەممە 16-11-2021، راگەیاند: “کاژێر 1ی بەرەبەیانی ئەمڕۆ سێشەممە لە شەقامی 150مەتری هەولێر شۆفێری دووئوتومبێلی تایبەت لە جۆرەکانی پاسات و نیسان پێشبڕکێ دەکەن کاتێک دەگەنە کۆتایی بەشی یەکەمی تەواوکراوی شەقامەکە چەند تاسەیەکی پلاستیکی دێتە پێشیان کە ئاگادارکردنەوەی شۆفێران لە تەواونەبوونی شەقامەکە و کۆتاییەکەی دانراوە، کەچی ئەو دوو شۆفێرە تاسەکان بەخێرایی دەبڕن و شۆفێرەکان هەر ناوەستن، تاوەکو دەگەنە کۆمەڵێک پارچەی کۆنکریتی کە لەکۆتایی شەقامەکە دانراون بۆ ئەوەی شوفێران لە شەقام دەرنەچن، کەچی خۆیان بەو کۆنکرێتانەشدا دەکێشن”.
گوتەبێژی پۆلیسی هاتوچۆی هەولێر، گوتیشی: “بەداخەوە لە ئەنجامی رووداوەکە شوفێری نیسانەکە هەر لەناو ئۆتۆمبێلەکەی سووتا و گیانی لە دەستدا کەنزیکەی 100مەتر لە شەقام دەرچوو بوو و دوورکەوتبووەوە، شوفێری ئۆتۆمبێلی پاساتەکەش زۆر بەسەختی بریندار بوو کە ئۆتۆمبێلەکەی ئەویش لە شەقام دەرچوبوو و زیانێکی زۆریش بەر ئۆتۆمبێلەکان کەوت”.
فازڵ حاجی ئاماژەی بەوەدا ئەوان رۆژانە دووبارەی دەکەنەوە کەوا شەقامە خێراکان بۆ پێشبڕکێ دروست نەکراون، بەڵکو بۆ گەیشتن بەزووتر و سەلامەتتر دروستکراون، کەچی کەس گوێیان لێناگرێت.
