سەرۆکی هەرێمی کوردستان سەرەخۆشی لە خانەوادە و کەسوکاری ئەو پێشمەرگە شەهیدانە دەکات کە لە هێرشێکی داعشدا لە سنووری کوڵەجۆ شەهیدبوون. دەشڵێت، “فراوانبوون و بەردەوامیی پەلامار و هێرشەكانی داعش، پەیامی جیددیی ترسناكن و هەڕەشە و مەترسییەكی راستەقینە لە ناوچەكە دەهێنێتەوە ئاراوە
دەقی پەیامەکەی سەرۆکی هەرێمی کوردستان:
سەرەخۆشی و هاوخەمیی قووڵم پێشكەش بە خانەوادەی ئەو شەهیدە قارەمانانەی شەوی رابردوو دەكەم كە لە كاتی بەهانەوەچوونی هاوسەنگەرانی پێشمەرگەیاندا لە سنووری كوڵەجۆ، شەهید بوون و گیانیان بەخشی.
لە خوای مەزن داواكارم گیانیان بە بەزەیی و میهرەبانیی خۆی شاد بكات و سەبووری و ئارامی بە خانەوادە و كەسوكاری سەربەرزیان ببەخشێت. هیوای زووچاكبوونەوە بۆ پێشمەرگە بریندارەكان دەخوازم.
فراوانبوون و بەردەوامیی پەلامار و هێرشەكانی داعش، پەیامی جددیی ترسناكن و هەڕەشە و مەترسییەكی ڕاستەقینە لە ناوچەكە دەهێنێتەوە ئاراوە. بۆیە هاریكاری و هەماهەنگیی زیاتری نێوان پێشمەرگە و سوپای عێراق بە پشتیوانیی هێزەكانی هاوپەیمانیی نێودەوڵەتی، پێویستییەكی بەپەلەی هەنووكەیی و لەپێشینەیە.
داوا دەكەین میكانیزمی ئەو هەماهەنگییە لەنێوان لایەنە پەیوەندارەكانی هەرێمی كوردستان و حكوومەتی فیدراڵی عێراقدا بە هاوبەشی و پشتیوانیی هێزەكانی هاوپەیمانیی نێودەوڵەتی كاراتر و فراونتر بكرێت و پێكەوە بە هەموو هێز و توانایەكەوە بەرەنگاری تیرۆرستانی داعش و هەڕەشە و مەترسییەكانی ببینەوە.
نێچیرڤان بارزانی
سەرۆكی هەرێمی كوردستان
نێچیرڤان بارزانی: فراوانبوونی هێرشەكانی داعش پەیامی جدیی ترسناكن2021/11/28
