ژمارەیەك هاوڵاتیی شەنگال شەوی ڕابردوو ڕێگرییان لە هەوڵێكی حكومەتی عێراق بۆ پەڕاندنەوەی خانەوادەكانی داعش لە كامپی هۆلەوە بۆ خاكی عێراق كرد و نەیانهێشت لە سنووری شەنگالەوە كەسوكاری چەتەكانی داعش بپەڕێندرێنەوە.
ئاژانسی ڕۆژنیوز بڵاویكردەوە شەوی ڕابردوو حكومەتی عێراق ٢٠ پاسی هێناوەتە سنووری شارەدێی سنوونێی شەنگالەوە هەوڵیانداوە لە گوندی بۆركێ-وە بپەڕنەوە بۆ ڕۆژئاوای كوردستان و خانەوادەی چەتەكانی داعشە عێراقییەكان بگەڕێننەوە بۆ عێراق، بەڵام لەلایەن خەڵكی ناوچەكەوە ڕێگرییان لێكراوە.
هاووڵاتیانی ناوچەكە ئەو هەوڵەی حكومەتی عێراقیان وەك “پیلان لەسەر شەنگال” لەقەڵەمداوە و ڕێگەیان نەداوە پاسەكان بپەڕنەوە، بەوهۆیەشەوە پاسەكان گەڕاونەتەوە.
هاشم حاجی، هاوسەرۆكی ئەنجومەنی خۆبەڕێوبەریی دیموكراتیی شەنگال لەبارەی هۆكاری ڕێگرییەكەوە ڕایگەیاندووە: شەنگال یەكێكە لە ناوچە ئارامەكانی عێراق و دەبێت ئەم هەوڵە ڕابگرن كە دەیانەوێت خێزانی چەتەكانی داعش لەم ناوچەیەوە بگوازنەوە.
ئەمە لەكاتێكدایە لە دوو هەفتەی ڕابردوودا هێرش و پەلامارەكانی چەتەكانی داعش لە ناوچەكانی كەركوك و مەخموور و سنووری گەرمیان زیادیكردووە و بەوهۆیەشەوە تائێستا ٢٢ پێشمەرگە و 3 هاوڵاتیی مەدەنی شەهیدبوون.
