هەرچەندە بڕیاربوو ئەمڕۆ سێشەممە مووچەی دەزگای گشتی ئاسایش و خاوەن پێداویستی تایبەت دابەش بکرێت، بەڵام سەرچاوەیەک لە وەزارەتی دارایی رایگەیاند، ئەمڕۆ تەنها مووچەی دەزگای گشتی ئاسایش دابەشدەکرێت و سبەی چوارشەممەش خاوەن پێداویستیە تایبەتییەکان مووچەی مانگی 11 وەردەگرن.
سەرچاوەیەک لە وەزارەتی دارایی و ئابوری هەرێمی کوردستان راگەیاند بڕیاربوو ئەمڕۆ موچەی دەزگای گشتی ئاسایش و خاوەن پێداویستی تایبەت دابەش بکرێت، بەڵام ئەمڕۆ تەنھا موچەی دەزگای گشتی ئاسایش دابەش دەکرێت و سبەینێش خاوەن پێداویستی تایبەت موچە وەردەگرن.
پەیوەست بەم بابەتەش فارس عیسا سەرۆکی نوێنەرایەتیی حکومەتی ھەرێم لە بەغدا ئەوەی خستوەتەڕو، بەغدا بڕیاری ناردنی 200 ملیارەکەی بۆ ھەرێم داوە و تەنھا رێکارەکانی وەزارەتی دارایی ماون. بۆیە “چاوەڕوانین بەمنزیکانە ئەو بڕە پارەیە بۆ ھەرێمی کوردستان بنێردرێت و بخرێتە سەر ھەژماری بانکی ھەرێمی کوردستان.”
پێشووتر جوتیار عادل، وتەبێژی حکومەتی هەرێم رایگەیاندبوو، ئەوان زانیارییان داوە بەهاوڵاتیان و فەرمانبەران کە کاری لەپێشینەی حکومەت لەم کاتەدا دابەشکردنی مووچەیە بەبێ لێبڕین و هەمو هەوڵێک دەدەن بۆ دابینکردنی موچە.
ئاماژەی بەوەشکردبو، 25ی مانگ دەست بە دابەشکردنی مووچە دەکرێت، هەروەها تا ئەو کاتەی بەغدا بەردەوام بێت لەناردنی 200 ملیارەکە، مووچەش بەبێ لێبڕین دابەش دەکەن.
