ئا : بێستون لەتیف – ئێستانیوز
فیفا بڕیاریدا بە دووبارەکردنەوەی یاریەکەی بەرازیل و ئەرجەنتین و سزای هەردوو هەڵبژاردەکەشی ئاشکرا کرد.
یەکێتی تۆپی پێی جیهان دوای چەندین کۆبونەوە و پێکهێنانی چەند لیژنەیەک و گوێگرتن لەسەرپەرشتیار و ناوبژیوانان، چەند بڕیارێکی دەرکرد لەسەر یاریەکەی نێوان هەردوو هەڵبژاردەی بەرازیل و ئەرجەنتین لە پاڵاوتنەکانی مۆندیالدا کە لە پێنجی مانگی نۆی ساڵی ڕابردوودا دوای تەنیا حەوت خولەک ڕاگیرا و تەواو نەکرا.
فیفا بڕیاریدا بە دووبارەکردنەوەی یاریەکە کە فیفا لە داهاتوودا کاتەکەی دیاریدەکات و ڕاگرتنی هەر چوار یاریزانی هەڵبژاردەی ئەرجەنتین ئیمیلیانۆ مارتینێزی گۆڵچی و ئیمیلیانۆ بویندیا و لۆ سێلسۆ و کریستیان ڕۆمێرۆ بۆ دوو یاری هەڵبژاردەکەیان بەهۆی پابەند نەبونیان بە پرۆتۆکۆلەکانی کۆرۆناوە.
بڕیاریشیدا بە سزادانی هەردوو یەکێتی تۆپی پێی بەرازیل و ئەرجەنتین بە بڕی 53 هەزار دۆلار بەهۆی جێهێشتنی یاریگا و تەواو نەکردنی یاریەکە.
فیفا سزای یەکێتی تۆپی پێی بەرازیلی بە بڕی 539 هەزار دۆلار داوە بەهۆی سەرپێچیکردنی ڕێنماییە ئەمنییەکانی یاریگاوە، وە سزادانی یەکێتی تۆپی پێی ئەرجەنتین بە بڕی 215 هەزار دۆلار بەهۆی پابەند نەبونیان بە یاساکان لە کاتێکدا پێشتر ئاگادار کرابوون بەشداری بە چەند یاریزانێک نەکەن بەڵام پێشێلی ئەو داواکاریەیان کردووە.
