ئەمشەو لە چامیۆنز لیگ ئینتەر و لیڤەرپوڵ یاری لوتکە دەکەن و بایرن میونشن دەبێتە میوانی سالزبۆرگ
ئەمشەو کاتژمێر 11ی شەو لە یارییەکانی چوونی قۆناغی 16ی خولی یانە پاڵەوانەکانی ئەوروپا، لە یاریەکی بەهێزدا یانەی ئینتەرمیلانی دووەمی ڕیزبەندی خولی ئیتاڵیا لە یاریگای جیۆسێپی میاتزا میوانداری یانەی لیڤەرپوڵی دووەمی ڕیزبەندی پریمەرلیگ دەکات.
ئینتەر و لیڤەرپوڵ لە مێژوودا چوار جار لە چامپیۆنز لیگ رووبەڕووی یەکونەتەوە، لیڤەرپوڵ لە سێ یاریدا بردنەوەی بەدەستهێناوە و شەش گۆڵی تۆمارکردووە، ئینتەریش تەنیا یەک بردنەوەی هەبوە و چوار گۆڵی لە لیڤەرپوڵ کردووە.
کۆتا یاری نێوان ئەو دوو یانەیە لە قۆناغی 16ی هەمان خولدا بوە لە ساڵی 2008دا و لیڤەرپوڵ لە یاری چوون و گەڕانەوەدا بە ئەنجامی سێ گۆڵی بێبەرامبەر ئینتەری تێپەڕاندوە.
لە هەمان کاتدا و لە یاریەکی تردا، یانەی بایرن میونشنی ئەڵمانی لەدەرەوەی یاریگای خۆی رووبەڕووی یانەی رید بۆل سالزبۆرگی نەمساوی دەبێتەوە.
مایکل ئۆلیڤەری ئینگلیزی ناوبژیوانی ئەو یاریە دەبێت و وەرزی ڕابردووش هەردوو یانە لە یەک کۆمەڵەدا بوون، بایرن میونشن لە هەردوو یاریەکەدا بردنەوەی بەسەر سالزبۆرگ بەدەستهێنا.
