ماوەی لێخۆشبوون لە 15%ی قەرزی ئاو درێژ كرایەوە

بەڕێوبەرایەتی ئاوی سلێمانی رایگەیاند، لێخۆشبوونی قەرزی ئاو لەسەر هاوڵاتیان تاوەكو بەرواری 19ی 4ی 2022 درێژ كراوەتەوە.
بەڕێوبەرایەتی ئاوی سلێمانی لە لاپەڕەی فەرمی خۆی لە تۆڕی كۆمەڵایەتی فەیسبوك لە بڵاوكراوەیەكدا ئاگاداری هاوڵاتیانی كردووەتەوە، لێخۆشبونی 15%ی قەرزی ئاو كە پێشتر بۆ بەكارهێنەرانی ئاوی ماڵان دەركرابوو تاوەكو بەرواری 19ی 4ی 2022 بەردەوام دەبێت.
لە ماوەی رابردوودا بە بڕیارێكی حكومەتی هەرێم قەرزەكانی ئاو بۆ هاوڵاتیان كرا بە قیست بۆ 12 مانگ بەمەبەستی ئاسانكاری لە دانەوەیان، ئەو بەكارهێنەرانەشی دەیانەوێت قەرزەكانیان بە یەكجار و بەبێ قیست بدەنەوە، داشكاندنی رێژەی 15%یان بۆ دەكرێت، بەڵام بە شێوەی قیست قەرزەكانیان بدەنەوە داشكاندنی ڕێژەی 15% نایانگرێتەوە.
هەمان بڕیار بۆ بەشدارانی كارەبا كە قەرزیان لابوو دەركرابوو، پێشتریش بەڕێوەبەرایەتی كارەبای سلێمانی رۆژی 28ی شوباتی وەك كۆتا وادە بۆ جێبەجێ كردنی ئەو بڕیارە دیاری كرد وادەكە كۆتایی هات.