هەوڵەكانی یانەی پاریس سانجێرمان بۆ هێشتنەوەی مباپێ لە یانەكە بەردەوامە و ئەمجارە ئۆفەرێکی نوێی بە موچەی ساڵانەی 50 ملیۆن یۆرۆ پێشکەشکردووە.
ڕۆژنامەی لۆ پاریسیانی فەڕەنسی لە هەواڵێکدا ئاشکرایکردووە، کارگێڕی یانەی پاریس سان جێرمانی فەڕەنسی ئۆفەرێکی نوێی پێشکەش بە کیلیان مباپێی هێرشبەری لاوی یانەکەی کردووە، بەمەبەستی نوێکردنەوەی گرێبەستەکەی بۆ دوو وەرزی دیكە.
لۆ پاریسیان ڕوونیکردووەتەوە، موچەی ساڵانەی ئۆفەرەکەی یانە پاریسیەکە بۆ مباپێ دەگاتە 50 ملیۆن یۆرۆ، لەگەڵ هاندانی دارایی دیكەدا کە بەهاکەی 100 ملیۆن یۆرۆیە.
مباپێ لە هاوینی 2017 بەخواستن لەگەڵ کڕینەوەی ناچاری بە 180 ملیۆن یۆرۆ پەیوەندی بە پاریسەوە کرد و گرێبەستەکەی ئێستاشی لە کۆتایی ئەم وەرزەدا تەواودەبێت.
بەپێی ڕاگەیاندنەکان مباپێ لەلایەن یانەی ڕیاڵ مەدریدی ئیسپانییەوە گرنگییەکی زۆری پێدەدرێت، هاوکات یاریزانەکەش خەون یاریکردنە بۆ یانە مەدریدیەکە.
