وەزارەتی تەندروستی لەسەر بابەتی هێنانی دەرمانی ساختەی شێرپەنجە لەلایەن كۆمپانیایەكەوە بۆ ماوەی چەندین ساڵ رونكردنەوەیەكی بڵاوكردەوە و تێیدا هاتووە، نزیكەی ساڵێك لەمەوبەر ئاشكرا كراوە و رەوانەی دادگا كراوە.
وەزارەتی تەندروستی ئاماژەی بەوەداوە، بابەتی دەرمانێكی ساختە لەلایەن پەرلەمانتارێك بڵاوكرایەوە كە رەوانەی داواكاری گشتی كردووە، ئەم دۆسیەیە ماوەی نزیكەی ساڵێك بەر لە ئێستا ئاشكرا كرا و دەستبەجێ رێكارەكانی یاسایی و دەستبەسەرداگرتن و راگرتنی كۆمپانیا و لێكۆڵینەوە بە چاودێری دادوەری داواكاری گشتی ئەنجامدراوە و دۆسیەكە تەواو ساغ بووەتەوە كە دەرمانێكی ناڕەسەن و ساختەیە و رەوانەی دادگا كراوە.
ئەوەش هاتووە، دووپاتی دەكەنەوە ئەم رێكارە نوێ نییە بەڵكو زووتر جێبەجێ كراوە، ئومێدەواربوون ئەو پەرلەمانتارە و هەر كەس و لایەنێكی دیكە پێش نووسین و قسەكردنی لە سۆشیاڵ میدیا بانگەشەی ئاشكراكردنی بكات بەدوای راستی و دروستی رێكارەكان بووایە كە ئایا لە وەزارەتی تەندروستی هیچ ئیجرائاتێك كراوە یاخودنا نەوەك بەبێ گەڕانەوە بۆ پرسیاركردن بكرێتە بابەتی میدیایی.
وەزارەتی تەندروستی جەختی لەوەش كردووەتەوە، هاوڵاتیان دڵنیا دەكەنەوە كە ئەم كۆمپانیایە و چەند كۆمپانیایەكی دیكە كە كاری ساختەكردنی دەرمانی ئەنجامدابێت رێكاری یاسایی گیراوەتە بەر و سزای راگرتنی كار و هەڵوەشاندنەوەی كۆمپانیا و رەوانەكردنی دادگا كراوە.
