لە چوارچێوەی بەرنامەی نەورۆزی ئەمساڵ، ئەمڕۆ شەممە لە 18 شوێنی باکووری کوردستان و تورکیا ئاگری نەورۆز دەکرێتەوە و ئاهەنگ سازدەکرێ.
ئەمڕۆ شەممە 19ی ئاداری 2022 کاتژمێر 10:00 لە شارۆچکەی قۆسەر سەربە پارێزگای مێردین، شارۆچکەی پاتنۆس سەر بە پارێزگای ئاگری و ناوەندی شاری ئیدر ئاگری نەورۆز دەکرێتەوە و ئاهەنگ سازدەکرێت.
کاتژمێر 11:00 لە ناوەندی شاری شرناخ، شاری دێرسم، شارۆچکەی پرسووس سەربە پارێزگای رووها، شارۆچکەکانی بیسمیل و گەرمووک سەربە پارێزگای ئامەد، شارۆچکەی دەپ سەربە پارێزگای خارپێت، شارۆچکەی کەربۆران سەربە پارێزگای مێردین، شارۆچکەکانی باسان و قلابان سەربە پارێزگای شرناخ؛ کاتژمێر 12:00 ـەش لە شارۆچکەی شەمزینان سەربە پارێزگای جۆلەمێرگ بە بەشداری ژمارەیەک هونەرمەند و بەرپرس و پەرلەمانتاری هەدەپە ئاگری نەورۆز دەکرێتەوە.
لە تورکیاش کاتژمێر 11:00 لە شاری مێرسین، کاتژمێر 12:00 لە ناوچەی گەبزەی کۆجائەلی لە پارێزگای کۆجائەلی و کاتژمێر 13:00 لە شارۆچکەکانی گەرمەنجیک، نازیلی و سۆکە سەربە پارێزگای ئایدن ئاگری نەورۆز دەکرێتەوە.
پارتی دیموکراتی گەلان – هەدەپە و پارتە کوردییەکان ئەمساڵ لە 29 شار و کۆی گشتی لە 75 شوێنی باکووری کوردستان و تورکیا لەگەڵ هاونیشتمانیان بەشداری ئاهەنگەکان دەکەن.
ئاهەنگە گەورەکەی نەورۆزی ئیستەنبووڵ رۆژی یەکشەممە 20ی ئادار بە بەشداری میدحەت سانجار، هاوسەرۆکی هەدەپە و ئاهەنگە گەورەکەی نەورۆزی ئامەدیش رۆژی دووشەممە 21ی ئادار بە بەشداری پەروین بوڵدان، هاوسەرۆکی هەدەپە بەڕێوەدەچێت.
بۆ نەورۆزی ئامەد لە 15 وڵاتی جیهان نزیکەی 100 سیاسەتڤان، نووسەر و رۆشنبیر بانگهێشتکراون.
