لە گەڵ کردنەوەی بازاڕەکانی جیهان رۆژی شەممە نرخی نەوت بەراورد بە رۆژی رابردوو کەمێک دابەزی و هەر بەرمیلێک نەوتی برێنت بە 107 دۆلار مامەڵەی پێوەدەکرێت.
رۆژانی دووشەممە و سێشەممەی هەفتەی رابردوو نرخی نەوت بۆ خوار 98 دۆلار دابەزی، بەڵام رۆژی پێنجشەممە و هەینی نرخی بەرمیلێک نەوتی برێنت زیاتر لە دوو دۆلار بەرزبووەوە.
بەرزبوونەوەی نرخی نەوت لەکاتێکدایە رۆژی پێنجشەممە و بەهۆی کاریگەریی گفتوگۆکانی بەریتانیا و سعودیە و هۆشداریی ئاژانسی نێودەوڵەتیی وزە، لەچاو رۆژانی پێشتر دەستی بە بەرزبوونەوە کرد.
رۆژی شەممە 19-3-2022 نرخی یەک بەرمیل نەوتی برێنت بە 107 دۆلار و 9 سەنت مامەڵەی پێوەدەکرێت، هەروەها نرخی نەوتی سووکی تێکساسیش بە 104 دۆلار و 7 سەنتە. ئەمە لە کاتێکدایە رۆژی هەینی نرخی بەرمیلێک نەوتی خاوی برێنت بە 109 دۆلار و 26 سەنت بوو، نرخی بەرمیلێک نەوتی رۆژئاوای تێکساسیش بە 105 دۆلار و 56 سەنت مامەڵەی پێوەکرا.
هۆکاری دابەزینی نرخی نەوت لە چەند رۆژی رابردوودا دەگەڕێتەوە بۆ راگەیاندنی قەدەخەی هاتووچۆ لە بەشێک لە شارەکانی چین بەهۆی سەرهەڵدانی گۆڕاوی ئۆمیکرۆنی ڤایرۆسی کۆرۆنا و بەشێکی دیکەی پەیوەندی بە ئەگەری چارەسەری کێشەکانی نێوان رووسیا و ئۆکرایناوە هەبوو.
