وەزارەتی بازرگانی عێراق ڕایگەیاند، بڕی 500 ملیار دیناری تەرخانکردووە، بۆ شایستە داراییەکانی جوتیاران، بۆ کڕینەوەی بەرھەمی دانەوێڵەی ئەمساڵ.
وەزارەتی بازرگانی عێراق لە ڕاگەیەندراوێکدا ئاماژەی بەوەکردووە، ئەو بودجەیە، کاریگەریی بەرچاوی دەبێت لەسەر وەرزی کڕینەوەی بەرھەمی دانەوێڵە لە ناوخۆ، و پاڵپشتێکی بەھێز دەبێت بۆ زیاتر فرۆشتنەوەی بەرھەمی دانەویڵە بە حکومەت لە ھەموو پارێزگاکانی عێراق.
وەزارەتی بازرگانی باسی لەوەشکردووە، پڕۆسەی کڕینەوەی بەرھەمی دانەوێڵە لە جوتیاران، وایکردووە ڕۆژانە بڕێکی زیاتر لە گەنم بگاتە دەستی حکومەت، کە ڕۆژانە بە 50 ھەزار تۆن مەزەندە کراوە.
بە گوێرەی لێدوانی وەزارەتی کشتوکاڵی عێراق، لە ساڵی ڕابردوودا بڕی بەرھەمی گەنمی بەرھەمھاتوو لە عێراق گەیشتە 4 ملیۆن تۆن، بەڵام ئەمساڵ چاوەڕوان دەکرێت بڕی بەرھەم بگاتە 3 ملیۆن تۆن.
محەممەد حەنون، بەڕێوەبەری گشتیی کۆمپانیای گشتیی بازرگانیی دانەوێڵەش راگەیاند، هەر جووتیارێک زووتر بەرهەمەکەی رادەست بکات، ئەوا پارەکەی زووتر پێدەدرێت، کە لە هەفتەیەک تێناپەڕێت.
عێراق بۆ دابینکردنی بەشە ئاردی ھاوڵاتیان لە فۆڕمی خۆراکدا، ساڵانە پێویستی بە 5 ملیۆن تۆن گەنم ھەیە.
