ئەنجوومەنی دادوەریی هەرێمی کوردستان راگەیێنراوێکی لەبارەی بڕیارەکەی دادگەی فیدراڵیی عێراق بڵاوکردەوە و دەڵێت، هەنگاوەکانی هەرێمی کوردستان لەبارەی نەوت و گاز پێچەوانەی دەستوور نین.
ئەمڕۆ سێشەممە، داداوەری هەرێمی کوردستان راگەیەنراوێکی بڵاوکردەوە و تیایدا هاتووە، بڕیاری ژمارەی ٢٢ی ساڵی ٢٠٠٧ کە لەلایەن پەرلەمانی کوردستانەوە دەرکراوە و تایبەتە بەفرۆشتنی نەوت و غاز لەلایەن حکومەتی هەرێمەوە، پێچەوانەی دەستوری عێراق نییە.
ئاماژەی بەوەشکردووە، ئەمەش وای کردووە کارکردن بەو بڕیارە بەردەوامبێت و ئەگەر بەگوێرەی ماددەی ١١٠ دۆسیەی نەوت و غاز نەکاتە بابەتێکی تایبەت بە دەسەڵاتەکانی حکومەتی فیدڕاڵی.
هەر بەگوێرەی راگەیەنراوەکە، بە لەبەرچاوگرتنی مادەی ١١٢ لە دەستوری عێراق، حکومەتی فیدڕاڵی بەرپرسە لە دۆسیەی نەوت و غازی دەرهێنراو و لەو کێڵگانەی لێیان بەرهەمدەهێنرێت لەگەڵ حکومەتەکانی هەرێمەکان و پارێزگاکان، بەشێوەیەک داهاتەکانیان بەشێوەیەکی بە ویژدانانە دابەشبکرێت بگونجێت لەگەڵ ژمارەی دانیشتوانی سەرتاسەری وڵاتدا. هاوکات، ئەو هەرێمانەی زیانیان بەرکەوتووە بۆ ماوەیەک پشکییان بۆ دەستنیشان بکرێت.
راگەیەنراوەکەی ئەنجومەنی دادوەری هەرێم ئاماژەی بەوەشداوە، هەر بەگوێرەی هەمان مادەی دەستوری پێویستە ئەو ناوچانەی لەلایەن دەسەڵاتی سەدامەوە لەمافەکانیان بێبەشکراون یان زیانیان پێگەیشتووە، پێویستە بودجەی گەشەپێدانیان بۆ تەرخانبکرێت لەناوچە جیاجیاکانی وڵاتدا.
راگەیەنراوەکەی سەرۆکی ئەنجومەنی دادوەری هەرێم دەڵێت، بەگوێرەی ئەم مادەیە ئەو کێڵگە نەوتییانەی دەکەونە هەریمەوە لەدوای ساڵی ٢٠٠٥ەوە، دەکەونە ناو بەشە پشکی هەرێمەوە و تایبەتن بەهەرێمەوە، چونکە مادە دەستورییەکە دەڵێت، ئەو کیڵگە نەوتییانەی لە ئێستادا هەن، واتە پێش ساڵی ٢٠٠٥ەوە هەن، بەمەش کێڵگە نەوتییەکانی هەرێم دوای ٢٠٠٥ ەوە هەن بەمەش دەکەونە ناو بەشە پشکی حکومەتی هەرێمەوە.
لەبەشێکی دیکە راگەیەنراوەکەیدا ئەوەش خراوەتەڕوو، بە پشت بەستن بەم مادە یاساییە، یاسای ژمارە ٢٢ی اڵی ٢٠٠٧ی نەوت و غازی هەرێمی کوردستان- عێراق هاوتایە لەگەڵ یاسای دەستورییەکانی عێراق و هیچ پێچەوانە نین.
ئەمە لەکاتێکدایە، لەماوەی رابردوودا، دادگای باڵای فیدڕاڵی عێراق بڕیاریدا فرۆشتنی نەوت لەلایەن هەرێمەوە و یاسای نەوت و غازی هەرێم نادەستورین و پێچەوانەی دەستورن.
دوا بەدوای بڕیارەکەی دادگای فیدڕاڵیش کۆمپانیای ئێکسۆن مۆبیلی ئەمریکی تایبەت بە وەبەرهێنانی نەوت کۆتایی بە کارەکانی لە هەرێم هێنا.
