ئەمڕۆ شەممە نرخی نەوت هەر بەرمیلێک نەوتی برێنت بە 122 دۆلار مامەڵەی پێوەکرا، لەکاتێکدا رۆژی هەینی نرخی نەوتی برێنت لە سەرووی 122 دۆلار بوو.
بەرەبەیانی رۆژی هەینی یەک بەرمیل نەوتی برێنت بەراورد بە رۆژی پێنجشەممە نزیکەی دۆلارێک دابەزی و بە 122 دۆلار و 15 سەنت مامەڵەی پێوەکرا. هەروەها نرخی نەوتی سووکی تێکساسی ئەمریکاش دوو دۆلار دابەزی و بە 120 دۆلار و 25 سەنت مامەڵەی پێوەکرا.
نرخی نەوت بۆ ئەمڕۆ شەممە 11-6-2022 بۆ هەر بەرمیلێک نەوتی برێنت بە 122 دۆلارە و نرخی یەک بەرمیل نەوتی سووکی تێکساس بە 120 دۆلار و 7 سەنتە.
لە نێوەڕاستی هەفتەی رابردوو، نرخی نەوتی سووکی تەکساس و برێنت لە ئاستێکدا مامەڵەیان پێوەکرا کە لە دوای 8ـی مانگی 3ـی ئەمساڵەوە بێوێنە بووە و بەرزترین ئاستیشیان لە دوای ساڵی 2008ـەوە بوو. بەڕێوەبەری کۆمپانیای تێرافیگۆرا، کە یەکێکە لە گەورەترین کۆمپانیاکانی پەیوەست بە بازرگانیی نەوت، لەبارەی نرخی نەوتەوە رایگەیاندووە، بەهۆی بەرزبوونەوەی خواست، نرخی بەرمیلێک نەوت لە ئەمساڵدا بەرزدەبێتەوە بۆ 150 دۆلار.
