لە کۆپا لیبەرتادۆرێسدا، فلامینگۆ یاری لوتکەی لە کۆرەنتیانس بردەوە و بەرەبەیانی سبەینێش دوو یاری تر دەکرێن.
لە یاری چوونی قۆناغی چارەکی کۆتایی خولی یانە پاڵەوانەکانی ئەمریکای باشور، کە بە کۆپا لیبەرتادۆرێس ناسراوە، یانەی کۆرەنتیانسی بەڕازیلی لە یاریگای خۆیدا لە شاری ساوپاولۆ، میوانداری یانەی فلامینگۆی هاونیشتیمانی کرد.
فلامینگۆی میوان باشتر بینرا و بە دوو گۆڵی بێ بەرامبەر یارییەکەی بردەوە و گۆڵەکانیشی لە خولەکەکانی 37 و 51دا لەلایەن جیۆرجیان دی ئەرایسکایتا و گابرێل باربۆساوە تۆمارکرد.
بڕیارە بەرەبەیانی 10ی مانگ یاری گەڕانەوەی نێوان ئەم دوو یانە بەڕازیلیە لە یاریگای ماراکانای بەناوبانگ بەڕێوەبچێت.
بەرەبەیانی سبەینێش دوو یاری تری قۆناغەکە ئەنجام دەدرێن، کاتژمێر سێ و 30 خولەک ئەتلەتیکۆ مینیرۆ و پاڵمێراسی بەڕازیلی ڕووبەڕووی یەکدەبنەوە و فیلیز سارسفیڵدی ئەرجەنتینیش میوانداری کۆردۆبای هاونیشتیمانی دەکات.
