ئێستانیوز دەقی رێنماییەكانی وەزارەتی پەروەردە بۆ ساڵی نوێی خوێندن بڵاودەكاتەوە

ئەمڕۆ سێشەممە، 13ی ئەیلوول، یەكەم زەنگی دەستپێكردنی ساڵی نوێی خوێندنی 2022-2023 لێدرا و دەرگای ناوەندەكانی خوێندن بە ڕووی خوێندكاراندا كرایەوە و بە هەڵكردنی ئاڵای كوردستان و وتنەوەی سرودی نیشتیمانی خوێندكاران دەستیان بە خوێندن كرد.
وەزارەتی پەروەردەی حكومەتی هەرێم، چەند رێنماییەكی نوێی بۆ ساڵی نوێی خوێندن بڵاوكردەوە و بەگوێرەی رێنماییەكانیش، سێ رۆژی سەرەتای دەستپێكردنی پرۆسەی خوێندن، رێنوێنی خوێندكاران دەكرێت، كار لەسەر پێدانی هۆشیاری و پاراستنی ژینگە و خۆشەویستی بۆ كوردستان دەكرێت.

بەگوێرەی رێنماییەكانی وەزارەتی پەروەردە، سێ رۆژی دەستپێكی دەوامی ساڵی نوێی خوێندن تەرخاندەكرێت بە چەند بابەتێك وەك رێنوێنیكردنی خوێندكاران و ئاشناكردنیان بە پۆل و هۆبەی خۆیان و پێدانی خشتەی وانەكانیان، لەو سێ رۆژەدا وانەكان تەرخاندەكرێن بۆ خۆشەویستی كوردستان و گەشەپێدانی كلتوری پێكەوەژیان، هەروەها هۆشیاری دەدرێتە خوێندكاران لەسەر لایەنە خراپەكانی بەكارهێنانی چەك و چەكی بێ مۆڵەت و ئامێرە برینداركەرەكان، لەگەڵئەوەشدا رێنمایی خوێندكاران دەكرێت بۆ پاراستنی ژینگە و ئاو وەك سامانێكی نیشتمانی و چۆنیەتی بەكارهێنانی.

هەر بەگوێرەی رێنماییەكان، یەكێكی دیكە لەوانەكانی سەرەتای دەستپێكردنی خوێندن، چۆنیەتی بەكارهێنانی تەكنەلۆژیا و ئامێرە ئەلیكترۆنییەكان و دوركەوتنەوە لەلایەنە خراپەكانیان دەبێت، هەروەها خوێندكاران جگە لە سود وەرگرتن لەو رێنماییانە پێویستە سود لە وانەكانی وەرزش و هونەر لەماوەی سێ رۆژی دەستپێكی دەوامیان وەربگرن.

پەیوەندیدار