سوپای تورکیا کوژرانی دوو سەربازی دیکەی لە رووبەڕووبوونەوەی گەریلاکانی پارتی کرێکارانی کوردستان – پەکەکە لە ئۆپەراسیۆنی ناسراو بە “چنگ – قوفڵ” لە هەرێمی کوردستان راگەیاند.
وەزارەتی بەرگریی تورکیا رۆژی یەکشەممە 6ی تشرینی دووەمی 2022 لە هەژماری فەرمیی خۆی لە تۆڕی کۆمەڵایەتیی تویتەر، کوژرانی دوو سەربازی وڵاتەکەی بە ناوەکانی فورات گونەر و خەلیل یڵدز و برینداربوونی دوو سەربازی دیکە لە رووبەڕووبوونەوەی گەریلاکانی پەکەکە لە ئۆپەراسیۆنی ناسراو بە “چنگ – قوفڵ” لە ناوچەی زاپ لە هەرێمی کوردستان راگەیاند.
وەکو لە راگەیێندراوەکانی وەزارەتی بەرگریی تورکیادا هاتووە، ژمارەی ئەو سەربازانەی سوپای تورکیا لە دەستپێکی ئۆپەراسیۆنەکەوە لە هەرێمی کوردستان کوژراون، گەیشتووەتە 65 سەرباز.
هەر ئەمڕۆ ناوەندی چاپەمەنی و راگەیاندنی هێزەکانی پاراستنی گەل – هەپەگە بڵاویکردەوە، لە ناوچەکانی ئاڤاشین و خواکوڕک دوو سەربازی تورکیا کوژراون و چوار سەربازی دیکەش بریندار بوون.
رۆژی 3ی تشرینی دووەمی 2022، وەزارەتی بەرگریی تورکیا گیانلەدەستدانی چوار گەریلای لە خاکی کوردستان بڵاوکردەوە و تێیدا رایگەیاند، گەریلاکان لە ناوچەی زاپ لە رێگەی فڕۆکەی بێفڕۆکەوانەوە کراونەتە ئامانج.
بەرەبەیانی رۆژی 18ی نیسانی 2022 ئۆپەراسیۆنی ناسراو بە “چنگ – قوفڵ” لەلایەن سوپای تورکیاوە لە ناوچەکانی ئاڤاشین، مەتین و زاپ لە خاکی هەرێمی کوردستان بۆسەر پێگەکانی پەکەکە لە هەرێمی کوردستان دەستیپێکرد.
وەزارەتی بەرگریی تورکیا گیانلەدەستدانی 446 گەریلا و کوژرانی 65 سەربازی سوپای وڵاتەکەیی راگەیاندووە؛ لە بەرامبەردا هەپەگە کوژرانی دوو هەزار و 198 سەربازی تورکیا و گیانلەدەستدانی 157 گەریلای راگەیاندووە.
