لە پارێزگای بۆرسای تورکیا ڕووداوێکی ئاگرکەوتنەوە ڕوویدا و بەهۆیەوە شەش منداڵ و دایکێک و دوو برازای سووتان.
میدیاکانی تورکیا بڵاویانکردەوە، ئاگرەکە لەو شوقەیەدا کەوتووەتەوە کە خێزانە پەنابەرە سورییەکەی تێدا نیشتەجێبووە لە ناوچەی یەڵدرم لە پارێزگای بۆرسا، هۆکارەکەشی لە زۆپاوە بووە، دایک و شەش منداڵی خێزانەکە و دوو برازای بەوهۆیەوە گیانیان لەدەستداوە.
بەپێی وتەی پارێزگاری بۆرسا، باوک و دوو ئەندامی دیکەی خێزانەکە بە برینداری گواستراونەتەوە بۆ نەخۆشخانە.
ئاگرەکە لە شەودا و لەکاتێکدا خێزانەکە نوستوون لە نهۆمی دووەمی باڵەخانەیەکی چوار نهۆمی کەوتووەتەوە، خێزانێکی سێ کەسی کە لە نهۆمی سەرووتربوون ڕزگارکراون.
تیمەکانی ئاگرکوژێنەوە دوای یەک کاتژمێر لە هەوڵدان توانیویانە ئاگرەکە کۆنترۆڵبکەن.
