نۆیەم ھەفتەیە خۆپیشاندانەکانی رۆژھەڵاتی کوردستان و ئێران بەردەوامن

رۆژھەڵاتی کوردستان و ئێران پێینایە نۆیەمین ھەفتەوە و تا دێت ژمارەی قوربانیانیش بەرزدەبێتەوە.

لە درێژی خۆپیشاندانەکانی رۆژھەڵاتی کوردستان و ئێران دژی گیان لەدەستدانی ژینا ئەمینی و رەوشی وڵاتەکە، شەوی رابردوو لە شارەکانی سنە و مھاباد و بۆکان و سەقز و خوڕەم ئاوا و تاران و چەند شارێکی تر خۆپیشاندان بەڕێوەچوو و خەڵک بە ئاگرکردنەوە لەسەر شەقامەکان ناڕەزاییان دەربڕی و دروشمەکانی دژی حکومەتیان وتەوە.

بەپێی ھەندێک لە راپۆرتەکان لە خۆپیشاندانەکانی رۆژی ھەینی شاری زاھیدان لە پارێزگای سیستان و بەلوچستان گرژی و ئاڵۆزیی لە نێوان ھێزە ئەمنییەکان و خۆپیشاندەران دروستبووە و دوو گەنجی تەمەن ٢٠ ساڵ و ٢٥ ساڵ بە تەقەی ھێزە ئەمنییەکان کوژراون.

وەک کاردانەوەیەک، رێکخراوی لێبوردنی نێودەوڵەتی لە راگەیەنراوێکدا داوای لە ئەنجومەنی ئاسایشی نێودەوڵەتی کرد، بە زووترین کات لێکۆڵینەوە لە توندوتیژییەکانی ئێران بەرامبەر خۆپیشاندەران بکات.

پەیوەندیدار