عەمید ئاسۆ شێخ تەها بەڕێوەبەری پۆلیسی سلێمانی رایگەیاند، 16 كەس لە تۆمەتبارانی هێرشكردنە سەر كچێك لە گەڕەكی هوانە دەستگیر كراون و لێكۆڵینەوەكان بەردەوامن.
عەمید ئاسۆ شێخ تەها بۆ دەزگاكانی ڕاگەیاندن گوتی 16تۆمەتباری سەرەكی روداوەكەی رۆژی هەینی لە گەڕەكی هوانە كە هێرشیان كردبووە سەر كچێك دەستگیر كراون.
ئاماژەی بەوەشداوە، لێكۆڵینەوە و بەداوداچونەكان لە روداوەكە بۆ دەستگیركردنی تۆمەتبارەكانی دیكە بەردەوامن.
رۆژی هەینی لە گەڕەكی هوانە كە تێیدا گەنجان نمایشی ماتۆڕسكیل دەكەن، ژمارەیەك گەنج هێرشیان كردە سەر كچێك كە ئامادەی نمایشەكە بوو و ئازاری جەستەییاندا و دوای بڵاوبوونەوەی گرتەی ڤیدیۆیی روداوەكە، كاردانەوەی زۆری بەدوای خۆیدا هێنا.
