بەڕێوەبەری گشتیی ئاو و ئاوەڕۆ لە هەرێمی كوردستان رایگەیاند، كرێی مانگانەی نەبەستنی پێوەری ئاو لە 80 هەزار دینارەوە بۆ 45 هەزار دینار کەمدەکرێتەوە، بەڵام ئەوەی پێوەری نەبەستبێت بۆ ساڵەكانی 2021 و 2022 بۆ هەر مانگێك 80 هەزار دینارەکە دەبێت بدات.
رۆژی سێشەممە 10-01-2023، ئاری ئەحمەد، بەڕێوەبەری گشتیی ئاو و ئاوەڕۆ لە هەرێمی كوردستان رايگەیاند، بڕیاردراوە ئەوەی تائێستا پێوەری ئاوی نەبەستووە مانگانە لە جیاتی 80 هەزار دینار تەنیا 45 هەزار دیناری لێوەردەگرێت.
ئاری ئەحمەد رەتیکردەوە لە کرێی پێشووی ئاو خۆش بن یان کەمی بکەنەوە و گوتی: “ئەوانەی پێوەریان نەبەستووە و قەرزداری كرێی ئاوی ساڵەكانی 2021 و 2022ن مانگانە 80 هەزار دیناریان لێوەدەگیرێ، چونكە ئەو كاتە بڕیارەكە بەو جۆرە بوو.”
بەڕێوەبەری گشتیی ئاو و ئاوەڕۆ لە هەرێمی كوردستان ئاشکرایکرد، تادێت قەرزی ئاو زیاد دەبێت، ئێستا 400 ملیار دیناریان لەلای خەڵک و فەرمانگەکانە.
بە گوتەی ئاری ئەحمەد، 80%ی هاوبەشەكان پێوەری ئاویان بەستووە، ئەوانەشی پێوەریان نەبەستووە “بە زۆری لە هەڵەبجە، ئیدارەكانی گەرمیان و راپەڕینن.”
بەگوتەی بەڕێوەبەرایەتیی گشتیی ئاو و ئاوەڕۆ لە هەرێمی كوردستان، یەک ملیۆن و 56 هەزار هاوبەشی ئاوی هەن.
A: ZOZK
