ده‌ستهه‌لاتێن بۆلگارى ئه‌ڤرۆ ئه‌ينيێ راگه‌هاندن كو ته‌رمێن 18 كۆچبه‌رێن نه‌ياسايى د بارهه‌لگره‌كێ دا هاته ديتن.
وه‌زاره‌تا ناڤخۆ يا بۆلگاريا راگه‌هاند؛ ته‌رمێن 18 كۆچبه‌ران د بارهه‌لگره‌كێ دا كو 40 كۆچبه‌ر تێدا بوون ل دويراتيا 20 كيلۆمه‌تران ژ سۆفيا يا پايته‌خت هاتنه ديتن.
ديار ژى كريه؛ وان كۆچبه‌ران خۆ دناڤ داران دا دناڤ بارهه‌لگرێ دا ڤه‌شارتبوون و ئه‌و ل وان قه‌چاغچيان دگه‌ڕن يێن ئه‌و كۆچبه‌ر كرينه د بارهه‌لگرێ دا.
“هه‌روه‌سا ژبلى كۆچبه‌رێن مرين، ژماره‌يه‌كا دى بريندار بووينه و بۆ نه‌خۆشخانه‌يان هاتينه ڤه‌گوهاستن”، ل گۆره‌ى ده‌ستهه‌لاتێن بۆلگارى.
تا نوكه ئه‌گه‌رێ مرنا وان كۆچبه‌ران ديار نه‌بوويه لێ ل گۆره‌ى گريمانه‌كا ده‌ستپێكى، مرنا وان نه ژبه‌ر رويدانه‌كا هاتنوچوونێ بوو.
بۆلگاريا بۆ كۆچبه‌ران وه‌ك ده‌رازينكا چوونێ بۆ دناڤ وه‌لاتێن ئێكه‌تيا ئه‌ورۆپى دا دهێته هژمارتن سه‌ره‌راى سيمه‌يێ ل سه‌ر سنوورێ وێ ل گه‌ل توركيا ب درێژيا 234 كيلۆمه‌تران.
