ئێكێ ئەیارێ روژا جیهانی یا پاڵان


بەیانناما لیژنا كارێ هەڤبەشێ چەپێ كوردستانی
ئەڤرو ل سەر ئاستێ جیهانێ ، بیرەوەری یا ( 137 ) سالروژا قوربانی و تێكوشانا پاڵان ل باژێرێ شیكاغو ل دژی سیستەمێ سەرمایەداری ساخ د كەنەڤە ، د هەڤدەمدا پاڵە و پارتێن چەپ و كومینیست جارەكا دی ، پەیمانا تێكوشانا چینایەتی دژی سیستەمێ سەرمایەداری ژبۆ بدەستڤەئینان و دانانابنیاتێ سوشیالزمێ ژ پێخەمەت مرووڤایەتیێ و ب ئارمانجگەهشتنا وەكهەڤیێ و دادپەروەری یا جڤاكی نوی دكەنەڤە .
بشتی دەربازبوونا نێزیكی ژ سەد و پێنجەه سالان ل سەر خونیشاندان و نەرازی یێن پاڵان ، چەوساندن و پەراوێسختن یا بەردەوامە و بەرامبەرێ وێ‌ تێكوشان ژ پێخەمەت بدەستڤەئینان جیهانەكا باشتر د پێشڤەچونێ دایە .
پاڵێن هزر و زەندان
ئەم هەمی دبینین حكومەتێن سەرمایەداری ب فورما لیبرالی یا نوی یێت بینە پاسەوانێن بەرژەوەندێن كومپانیا و سەرمایەداران لسەر حیسابا بەرژەوەندێن هەڤوەلاتیان و پاڵ
ان ، ئەڤە ژی خو دبینیت ب نەهێلانا خزمەتگوزاریێن گشتی و بلند كرنا باج و خوكان و كێمبوونا ئاستێ كرێیان و بەربەلاڤبوونا بێكاریێ و هەلكێشانا رێژا هەژاریێ د ئەنجامدا ئەڤرو كەمینەكا كێم لسەر ئاستێ كوردستانێ و ل وەلاتێن جیهانێ وەك ملیاردێر و ملیونێر پەیدابووینە ل بەرامبەردا پرانی یا خەلكێ د بارودوخەكێ پەراوێزخراو وداكێشانا ئاستێ داهاتی دا ژیانەكا خراب دبەنە سەر .
پاڵە و جوتیار و هەڤوەلاتیێن پەراوێزخراو
بارودوخێن پاڵێن كوردستانێ كو د دابری نینن ژ دوخا گشتی یا پاڵانێن جیهانێ سەرەرای تایبەتمەندی یا وان د كاودانەكێ دژوار دەرباز دبیت ، بەلاڤبوونا زێدەترا بێكاریێ و كێمبوونا كرێ یا كاری و دابینەكرنا مافێن گرەنتی یا سەرتایی وەكی كرەنتی یا ساخلەمیێ و جڤاكی و بێكاریێ یا بەردەوامە ، هەڤدەم چەوساندنا ژنان د زێدەبوونێ دایە ، ئەڤە هەمی د چوارچوڤێ‌ پێتر خراببوونا ژینگەها كاری و نەمانا باوەری یا جڤاكی دا دبیت ، ئەڤێ ژی رەنگێ دایە كو تاك و پرانی یا جڤاكی هەستێ ب ئارامی و ئاسایشا یا ئابوری و جڤاكی نەكەت و بەردەوام د دوخەكا دوودڵیێ و بێزاریێ و بەرزەبوونێ دایە ، و ژوێ خرابتر یا بوویە ئەگەرێ بەلاڤبوونا كەرستێن بێهووشیێ و بلند بوونا توندوتیژی یا خێزانی و نەهەڤسەنگی یا جڤاكی و هەڤدەم هندی وێڤەترە بازنێ بشكداری یا سیاسی یا هەڤوەلاتیان بەرتەنگتر لێدكەن ، هیج رامانەك بۆ جەمكێ هەڤوەلاتیێ كارا و مافێ بشكداری یا سیاسی یا زورینێ نەمایە و هیج ئیرادەك بۆ ئەنجامدانا هەلبژارتنان ددەمێ خودا ناهێتە دیتن ، ئەڤان هەمی دیاردان كاریگەری یا خراب ئێخستییە ل سەر پاشەروژا ئەزمونا هەرێما كوردستانێ .
جەماوەرێ خوراگرێ كوردستانێ
ئەم د لیژنا كارێ هەڤبەشێ چەپێ كوردستانێ ، سەرەرای هندێ كو تێكوشانا چینایەتی و بدەسڤەئینان دادپەروەری یا جڤاكی ب ئەركێ خو یێ روژانە دزانین ، لێ لدیف ژینوارێ جڤاكێ مە چەندین ئەركێن دی د بەرسینگێ پارتێن چەپ و بزاڤا جەماوەری و پاڵان دایە كو د تێكوشان بۆ كوردستانەكا ئازاد و سەربەخۆ دژی داگیركەران و تەمامكرنا قوناغا رزگاری یا نیشتمانی و تێكوشان بۆ وەك هەڤی یا ل ناف بەرا ژن و زەلامان و پاراستنا ژینگەها كوردستانێ و چەندین ئەركێن دی ل بەرا مەنە . هەروەسان دڤێ هەلكەفتنێ دا ئەڤان داخازیان بۆ رایا گشتی و لایەنێن پەیوەندی دار ڕادگەهینین :
1) نەهێلانا بێكاریێ و دەستەبەركرنا گرەنتی یا بێكاریێ و ساخلەمیێ و جڤاكی و دیاركرنا كرێ ب كێمی ژ ( 700000 ) هزار دینارێن عیراقی كێمتر نەبیت .
2) دەستەبەركرنا كار و ژیانا پاڵان بهێتە كرن .
3) دابینكرنا ساخلامی یا پیشەیی بۆ پاڵان و ئەگەرێن خۆپارێزیێ ل جهێ كاری بەرپرسایەتی یا حكومەتێ كومپانیا نە .
4) رێگریكرن ژ جوداهیێ ل ناف بەرا پاڵێن ژن و زەلام و بەرهنگاربوونا سێكسی .
5) مسوگەركرن و پارڤەكرنا موچەی ددەمێ خودا و ڤەگەراندنا پاشكەفتان .
6) دابینكرنا مافێ (دەستیری یا دایكینیێ) بۆ پاڵێن ژن ، و رێگریكرن ژ كاركرنا زاروكان .
7) كاراكرنا سەندیكا كرێكاران و دەستەبەركرنا بەرفرەهی و ئازادی یا خو رێكخستنێ .
8) كاراكرنا سندوقا خانەنشینیێ و گرەنتی یا پاڵان .
9) كاراكرنا یاسایا نوی یا كاری ل هەرێما كوردستانێ و راستڤەكرنا ئەوان مادێن د یاسایێدا كو ژینگەهەكا كونجا و رومەتا پالان دەستەبەر ناكەت .
10) پاراستنا ژینگەها كوردستانێ و بەرپرسیارەتی یا حكومەتێ دڤی باریدا و چاڤپوشی ل كومپانیان بدوماهی بهێت .

هەر بژی خەباتا نیفنەتەوەیی و هەڤبەشا پاڵان ل جیهانێ
هەربژی خەبات ژ پێخەمەت دادپەروەری یا جڤاكی و وەكهەڤیێ ل كوردستانێ

لیژنا كارێ هەڤبەشێ چەپێ كوردستانی
بزاڤا دیموكراتا گەلێ كوردستانی

حزبا زەحمەتكێشێن كوردستانی
حزبا شیوعی یا كوردستانی
ئەیارا 2023

پەیوەندیدار