وەزارەتی تەندروستی عێراق ڕایدەگەیەنێت، دەرمانی کۆڵد ئاوت کە لە تۆڕەکۆمەڵاتییەکاندا بڵاوبوەتەوە بەوەی کە کوشندەیە، لەلای ئەوان تۆمارنەکراوە.
سەیف بەدر، وتەبێژی وەزارەتی تەندروستی عێراق لە لێدوانێکی تایبەتیدا ڕایگەیاند: دەرمانی ”کۆڵد ئاوت” بەشێوەیەکی فەرمی لای ئێمە تۆمارنەکراوە و پێچەوانەی یاسایە و پێشتر وەزارەت هۆشداری داوە لەبارەی ئەو دەرمانەوە.
لە درێژەی قسەکانیدا، سەیف بەدر دەڵێت: ناکرێت دەرمانێك دروستبکرێت یاخود بنوسرێت بۆ نەخۆش کە پێشتر تۆمارنەکرابێت و پێچەوانەی یاساکانی وەزارەتی تەندروستی بێت.
وتەبێژی وەزارەتی تەندروستی عێراق ڕاشیگەیاند: تیمەکانی چاودێری تەندروستی بە بەردەوامی چاودێری سەرپێچیکاران دەکەن و هەر کەسێكیش سەرپێچی بکات سزای توند دەدرێت.
ئەوەش لەکاتێکدایە، دوێنێ هەیینی، ئاژانسی بلومبێرگ بڵاویکردەوە، شروبی (کۆڵد ئاوت)کە دەرمانێکی هندییە و بۆ چارەسەری پەتای منداڵان بەکاردەهێنرێت، لە مانگی ئازاری رابردوو لە یەکێک لە دەرمانخانەکانی شاری بەغداد کڕدراوە و دواتر لە لایەن تاقیگەی Valisure ی ئەمریکی سەربەخۆوە پشکنینی بۆ کراوە.
ئاماژەی بەوەشکردووە، بەپێی ئەنجامی پشکنینەکان لە هەر شوشەیەکی شروبەکەدا %2.1 ی ماددەی گیلاکۆڵ ئەسیلینی تێدایە کە ئەمە 21 هێندەی ئەو رێژە ئاساییەیە کە دەبێت لە شوشەیەکدا هەبێت و پێکهاتەکەی ژەهراوییە و کوشندەیە بۆ منداڵ.
ساڵی رابردوو بەهۆی دەرمانێکی کۆکەی منداڵان نزکەی 66 منداڵ لە وڵاتانی گامبیا گیانیان لەدەستدا.
