ڕاگەیەنراوێک لە حزبی زەحمەتكێشانی كوردستانەوە

ئەمڕۆ دووشەممە، 18ی ئەیلوولی 2023، بە مووشەک هێرش کرایە سەر فڕۆکەخانەی کشتوکاڵی عەربەت لە پارێزگای سلێمانی، بەپێی ڕاگەیەندراوی دژەتیرۆری سلێمانی لەو هێرشەدا شەهید و بریندار هەیە، هاوکات هەر ئەمڕۆ لە شاری هەولێر دەنیز جەودەت بولبل لە ئۆفیسی KNK تیرۆر کرا، ئێمە لە حزبی زەحمەتکێشانی کوردستان بەتووندیی سەرکۆنەی ئەو دەستدرێژییە دەکەین کە ئەمڕۆ کرایە سەر فڕۆکەخانەی کشتوکاڵیی عەربەت و تیرۆرکردنی دەنیز جەودەت بولبل ئەندامی کۆنگرەی نەتەوەیی کوردستان KNK، هەر لەو پێوەندەدا داوا لە هەموو لایەنە پەیوەندیدارەکان دەکەین سنوورێک بۆ ئەو دەستدرێژییە بەردەوامانە بۆسەر باشووری کوردستان دابنێن.
ئەم دەستدرێژکاریانە بەشێکە لەو هەڕەشە و سیاسەتە دوژمنکارانەیەی کە ئاسایش و سەقامگیریی هەرێمی کوردستانی بە ئامانج گرتووە، لەو سۆنگەیەوە ئەوە بەبیر هەموو لایەنە سیاسییە کوردستانییەکان دەهێنینەوە کە بۆ بەرەنگاربوونەوەی ئاڵنگاریەکان و ئەم ڕەوشە ناهەموارە لە هەر کاتێکی دیکە زیاتر، باشووری کوردستان پێویستی بە یەکڕیزی و یەکخستنی ناو ماڵی کوردستانی هەیە.

مەکتەبی سیاسیی
حزبی زەحمەتكێشانی كوردستان
18ی ئەیلوولی 2023

پەیوەندیدار