سەرۆك وەزیرانی عێراق ڕایدەگەیەنێت: هیچ قەیرانێكی سیاسی لە نێوان هەرێم و بەغدا نییە، تەنها كێشەی دارایی هەیە ئەویش تێپەرێندراوە، دەستێوەردان بۆ كاری سیاسی عێراق لە هیچ لایەنێك قبوڵ ناكەن.
محەمەد شیاع سودانی سەرۆك وەزیرانی عێراق لە دیبەیتی ئەنجومەنی پەیوەندییەكانی سەر وەزارەتی دەرەوەی ئەمریكا رایگەیاند: لە سەرەتای هێرشەكانی داعش، عێراق بە ئەزمونێكی ئازاربەخشی بەرەنگاربونەوەی تیرۆردا رۆشت، بەڵام لە دوای سەركەوتن بەسەر داعشدا، عێراق سەرەتایەكی نوێی دەستپێكرد.
ئاماژەی بەوەشكرد: لە هیچ لایەنێكی دەرەكی قبوڵ ناكەن، ببێتە لایەنی سێیەم بۆ گۆڕانكاری سیاسی لە عێراق، لە دوای هەڵبژاردنەكانی ساڵی 2021 بە دۆخێكی قورسدا تێپەڕبون، بەڵام بە رێككەوتنی سیاسی بۆ پێكهێنانی حكومەت كۆتاییان پێهێنا، ئەوەش نیشانەی گەشەی كاری سیاسی عێراقە.
ئەوەشی خستەڕوو: پێویستە جیاوازی لە نێوان پەیوەندی ئەرێنی لەگەڵ وڵاتانی دراوسێ و پەیوەندی نەرێنی دەستێوەردانی سیاسی بكرێت، هەمو دەستێوەردانێك و زیادەڕەوییەك بۆ سەر عێراق رەتكراوەتەوە، جا لە هەر لایەنێكەوە بێت و دەشڵێت، “بڕیارەكانی عێراق بڕیاری نیشتمانین و لە بەرژەوەندی ئەمریكا و ئێران و توركیا نییە.”
باسی لەوەشكر: زۆربەی وڵاتان و ئەمریكاش، ئەگەر بیەوێت پەیوەندی لەگەڵ عێراق هەبێت، پێویستە سەرەتا رێز لە سەرەوەری وڵاتەكە و ئیرادەی گەلەكەی بگرێت.
ئەوەشی ئاشكرا كرد: پێویستییەكانی عێراق، لەگەڵ گەشەسەندنی دانیشتوانەكەی زیاد دەكات، ناتوانرێت تەنها بە داهاتی نەوت پێویستییەكان دابینبكرێت، بۆیە چەند تێڕوانینێكیان بۆ چاكسازی ئابوری هەیە، لە رێگەیەوە پڕۆژەی وەبەرهێنان وەك كشتوكاڵ، پیشەسازی، بازرگانی و گەشتیاری دادەمەزرێنن.
سەرۆك وەزیرانی عێراق ئاماژەی بەوەشكرد. هیچ قەیرانێكی سیاسی لە نێوان هەرێم و بەغدادا بونی نییە، تەنها چەند كێشەیەكی یاسایی دارایی هەیە، ئەویش لە رێگەی لێكتێگەیشتن و گفتوگۆوە تێپەڕێندراوە.
وتیشی:هەرێمی كوردستان بكەرێكی سەرەكی كاری سیاسی عێراقە، هەروەها بەشێكی گرنگی پڕۆژە ئابورییەكانە كە سودی بۆ هەمو عێراقییەكان هەیە.
