مالپه‌ره‌كێ جیهانى ئاشكرا كریه كو ئه‌ڤ حه‌فتیه ب زه‌حمه‌تترین حه‌فتى بوو هه‌ر ژ ده‌مێ وه‌رگرتنا جۆ بایدن بۆ پۆستێ سه‌رۆكێ ئه‌مریكا و پێنج ئاریشه‌یێن د ئێك ده‌م دا كه‌فتینه به‌ر سینگێ كارگێریا بایدنى دیاركرینه.
مالپه‌رێ Axios یێ ئه‌مریكى ئه‌ڤرۆ ئه‌ینیێ دیاركریه؛ هه‌ر ژ ده‌مێ وه‌رگرتنا جۆ بایدن بۆ ده‌ستهه‌لاتێ به‌رى پتر ژ 1000 رۆژان، ژ به‌ر ژماره‌یه‌كا مه‌زن یا هه‌ڤڕكیێن ده‌ره‌كى د ئێك ده‌م دا، ئه‌ڤ حه‌فتیه ب زه‌حمه‌تترین حه‌فتى بوو بۆ كارگێریا جۆ بایدنى.
ئاشكرا ژى كریه؛ پێنج ئاریشه كه‌فتینه به‌ر سینگێ كارگێریا جۆ بایدن سه‌رۆكێ ئه‌مریكا.
ئاریشه‌یا ئێكێ یان قه‌یرانا ئێكێ، ل گۆره‌ى وێ مالپه‌رى، به‌رسڤدانا ئیسرائیلێ بۆ هێرشا حه‌ماسێ و ترسا ژ به‌رفره‌هبوونا شه‌ڕێ دناڤبه‌را حه‌ماس و ئیسرائیلێ دایه بۆ ده‌ڤه‌ره‌كا به‌رفره‌هتر كو هنده‌ك لایه‌نێن دى ژى وه‌كى ئیرانێ ب خۆڤه بگریت.
كۆمبوونا ڤلادیمیر پۆتین سه‌رۆكێ رۆسیا ل گه‌ل شى جینپینگ سه‌رۆكێ چینێ ل ڤێ حه‌فتیێ ژ بۆ بهێزكرنا هه‌ڤپه‌یمانیا وان ل دژى واشنتۆن ب ئاریشه‌یا دوێ بۆ ئه‌مریكا دهێته هژمارتن.
هه‌روه‌سا وى مالپه‌رێ زێده كریه “ئاریشه‌یا سیێ ئه‌وه؛ ئیران بوویه ئاریشه بوو ئه‌مریكا و به‌رپرسێن ئه‌مریكى لێكۆلینێ ل دۆر هاریكاریا ئیرانێ بۆ حه‌ماس دكه‌ن، هه‌روه‌سا به‌رپرسێن ئه‌مریكى ژ وێ چه‌ندێ دترسن كو حزبوللا یا ژ لایێ ئیرانێ ڤه پشته‌ڤانى لێ دهێته كرن، هێرشێ بكه‌ته سه‌ر ئیسرائیلێ ل ده‌مێ ئیسرائیل هێرشا ئه‌ردى بۆ كه‌رتێ غه‌زه ده‌ستپێبكه‌ت”.
ئاریشه‌یا چارێ بۆ كارگێریا ئه‌مریكى د ڤێ حه‌فتیێ دا ل گۆره‌ى راپۆرتا Axios، تاقیكرنێن كۆریا باكۆر بوون ژ بۆ مووشه‌كێن دویرهاڤێژ یێن شیانێن ناڤۆكی هه‌ین، خۆیا ژى كریه كو “رۆسیا، چین، ئیران و كۆریا باكۆر پێكڤه دشێن دو جاران هندى ئه‌مریكا د ده‌مێ دو سالان دا چه‌ك هه‌بن”.
ئاریشه‌یا پێنجێ بۆ كارگێریا ئه‌مریكى به‌لاڤبوونا هنده‌ك گرته‌یێن ڤیدیۆیى یێن سه‌خته‌یه یێن كو ده‌ستكارى تێدا دهێته كرن ژ بۆ یاریپێكرنێ ب وێ چه‌ندا مرۆڤ دبینن یان هزر تێدا دكه‌ن كو ل گۆره‌ى ئه‌ندازیارێن ته‌كنیكێن نوى یێن ل نزیك دێ دیار بن، گه‌له‌ك ب زه‌حمه‌ته ڤیدیۆیێن دروست ژ یێن سه‌خته بهێنه جوداكرن.
ئه‌ڤ پێنج ئاریشه پێكڤه ل گۆره‌ى مالپه‌رێ Axios بووینه ئه‌گه‌ر كو كارگێریا بایدنى ب زه‌حمه‌تترین حه‌فتى ده‌رباز بكه‌ت.
گاڤ
