ئەمڕۆ سەرۆکی حکومەتی هەرێمی کوردستان و حەییان عەبدولغەنی، جێگری سەرۆکوەزیران و وەزیری نەوتی فیدراڵ و شاندێکی یاوەری کە لە بریکار و بەڕێوەبەرە گشتییەکانی وەزارەت و بەڕێوەبەری گشتیی کۆمپانیای (سۆمۆ) پێکهاتبوون، پاش کۆبوونەوەیان بیروڕا لەبارەی ڕێکار و هەنگاوەکانی هەناردەکردنەوەی نەوتی هەرێمی کوردستان ئاڵوگۆڕ کراوە.
ئەمڕۆ لە هەولێر دوای گەیشتنی حەییان عەبدولغەنی، وەزیری نەوتی فیدراڵ و شاندی یاوەری لەگەڵ سەرۆکی حکومەتی هەرێم لەبارەی هەناردەکردنەوەی نەوتی هەرێمی کوردستان گفتوگۆ کراوە و بەپێی دەرەنجامی کۆبوونەوەکە، حکومەتی هەرێم ئامادەیی خۆیان بۆ دەستپێکردنەوەی نەوتی هەرێم دووپات کردووەتەوە و بڕیار دراوە کۆبوونەوەی زیاتر لەو بارەیەوە ئەنجام بدرێت.
لە ڕاگەیەنراوێکدا دەرەنجامی کۆبوونەوەی سەرۆکی حکومەتی هەرێم و وەزیری نەوتی فیدراڵ ئاشکرا دەکرێت و ڕایانگەیاند، سەرۆکی حکومەت ئامادەیی هەرێمی کوردستانی بۆ دەستپێکردنەوەی هەناردەکردنی نەوتی هەرێم دووپات کردووەتەوە، لە چوارچێوەی هێنانە کایەی لە یەک تێگەیشتنێکی هاوبەش بە ئاراستەی بە جێ گەیاندنی پێداویستییە دارایی و تەکنیکییەکانی پرۆسەی هەناردەکردن و لە چوارچێوەی بنەما دەستووریی و گرێبەستەکان و ڕێزگرتن لە دەسەڵات و مافە دەستوورییەکانی سەرجەم لایەنەکان، و دۆزینەوەی چارەسەری گونجاو بۆ دەستەبەرکردنی خەرجیی شایستەی بەرهەمهێنان و گواستنەوەی نەوتی هەرێم، کە لەناو بودجەی حکومەتی فیدراڵ تەرخانکراویی پێویستی بۆ دانراوە.
ئاماژەیان بەوەش داوە، کە وەستانی هەناردەکردنی نەوتی هەرێم، زیانی چەندین ملیار دۆلاری بە گەنجینەی گشتی گەیاندووە، و پێویستە لە زووترین کاتدا هەناردەکردن دەست پێ بکاتەوە.
هاوکات وەزیری نەوتی فیدراڵ، خواستی حکومەتی فیدراڵی بۆ دەستپێکردنەوەی هەناردەی نەوت دەربڕیوە و داواکراوە، دەستەبەرکردنی زەمینەیەکی لەباری هاوبەش لە چوارچێوەی دەستوور و لابردنی ئاستەنگ و لەمپەرەکانی بەردەم پرۆسەکە دروست بکرێت.
لە کۆتاییدا بڕیار درا کە هەر دوو وەزارەت درێژە بە گفتوگۆ و ڕا گۆڕینەوەکان لەسەر وردەکارییە یاسایی و دارایی و تەکنیکییەکان بدەن تاکوو بە لە یەک تێگەیشتنێکی هاوبەشەوە، چارەسەرەکان بخرێنە ڕوو، بە ئامانجی ئەوەی لە زووترین کاتدا، هەناردەکردنەوەی نەوتی هەرێم دەست پێ بکاتەوە کە ڕۆڵێکی بەرچاوی لە زیادکردنی سەرچاوەی داهاتی گشتی بۆ عێراق و هەرێمی کوردستان و خەرجکردنەوەی بۆ بەرژەوەندی گشتی دەبێت.
