فەرید عەتی، ھاوسەرۆکی ئەنجومەنی گەلانی رۆژئاوای کوردستان رایگەیاند، ئەنجومەنەکەیان لەئێستادا کار لەسەر دەرچواندنی دوو یاسای گرنگ دەکات کە بەگوێرەی دەستور دەھێندرێنە کایەوە و پێویستن بۆ سەرپەرشتیکردنی ھەڵبژاردن و پەسەندکردنی ئەنجامەکان، ئەوانیش بریتین لە یاسای کۆمسیۆنی باڵای ھەڵبژاردنەکان و یاسای دادگای دەستوری.
ئاماژەی بەوەشکردووە، ھەردوو یاساکە و چەند یاسایەکی دیکەش لە مانگی ئاداردا پەسەنددەکرێن و ئیدارەی خۆسەریش پلانی وایە لەکۆتایی مانگی نیسانی ئەمساڵدا یەکەمین ھەڵبژاردن ئەنجامبدات کە ئەویش ھەڵبژاردنی شارەوانییەکان دەبێت.
جگە لەو دوو یاسایە ئەنجومەنی گەلانی رۆژئاوای کوردستان دەیەوێت پێش مانگی ئادار، یاسای ھەڵبژاردن و یاسای ئەنجومەنی کانتۆنەکانیش پەسەندبکات کە بەشێکن لە ھەنگاوەکانی جێبەجێکردنی ئەو دەستورەی رۆژی ١٢-١٢-٢٠٢٣ پەسەندکرا.
