لە ڕۆژی 5ی ئادار، تا 21ی ئادار ، چین و توێژەکانی خەڵکی کوردستان بە شانازییەوە یادی ڕۆژانی ڕاپەڕینی ئاداری ساڵی 1991دەکەنەوە، ڕاپەڕین نیشانیدا ئەستەمە ویستی خەڵک بۆ ئازادیی و ڕزگاریی و بەدیهێنانی ماف و داخوازییە ڕەواکانی ، پێشی پێ بگیرێ، ڕاپەڕین نیشانیدا ئیرادەی گەلی كوردستان لە هێزی بێ شوماری داگیرکەرانی کوردستان بەهێزترە، ڕاپەڕین نیشانیدا کە ستەمکاریی و چەوساندنەوە سنوورێکی هەیە، بۆیە شانازییەکی گەورەیە کە لە ڕاپەڕیندا هەموو خاکی باشووری کوردستان لە سوپا و هێزە سەرکوتکەرەکانی ڕێژیمی بەعس پاک کرایەوە . لەم بۆنە مێژوویی و شکۆدارەدا، سڵاو بۆ گیانی پاکی شەهیدانی ڕاپەڕین و تێکڕای شەهیدانی ڕێگای ڕزگاریی و سەرفرازی کوردستان.
خەڵکی ئازادیخوازیی کوردستان!
ئێستا کە یادی 33 ساڵەی ڕاپەڕینە، شەڕ و ناسەقامگیریی باڵی بەسەر جیهان و رۆژهەڵاتی ناوەڕاست کێشاوە، ئەم ڕەوشە کارتێکردنی لەسەر زیاتربوونی ئاڵۆزییەکانی ناوخۆی عێراق هەیە و بەو هۆیەوە عێراق بووە بە بەشێک لە ململانێ و مەیدانی شەڕەکە ، هاوکات ئەم ڕەوشە کاریگەری لەسەر پەیوەندی و کێشە چارەسەرنەکراوەکانی نێوان حکومەتی عێراق و هەرێمی کوردستانیش هەیە، ئەمە لەلایەک و لەلایەکی دیکەشەوە لە ئاستی عێراقدا بە بەرنامە سیاسەتی پاشگەزبوونەوە لە سیستەمی فیدراڵی و بێ ناوەڕۆککردنی کیانی هەرێمی کوردستان پیادە دەکرێت. سەرەڕای نەبوونی کارنامە و بەرنامەیەکی بابەتیانە بۆ بەرەنگاربوونەوەی ئاڵنگاریەکانی ئەم ڕەوشە مەترسیدارە، کێشە ناوخۆییەکانی هەرێمی کوردستان لە زیادبووندایە و هەرێم لە بۆشایی دەسەڵاتی یاسادانان دایە، بە کەلک وەرگرتن لەو ڕەوشە ناهەموارە ناوەخۆییەی، کە هەرێمی کوردستانی پێدا تێپەڕ دەبێت، بەغدا لە ڕێگەی فشاری سیاسی و ئابووری و بەکارهێنانی چەکی مووچەی مووچەخۆرانی هەرێم ، بە عەمەلی سیاسەتی کەمکردنەوەی دەسەڵاتی دەستووری و لاوازکردنی کیانی هەرێمی کوردستان جێبەجێ دەکات. بە دەرککردن و تێگەیشتن لەو ڕاستییانە، دەردەکەوێت کە مەترسی ناکۆکییە لاوەکیە ناوخۆییەکان و زەقبوونەوەی لێکترازانی سیاسی لە هەرێم، لە مەترسییە دەرەکییەکان لەسەر ئێستا و داهاتووی هەرێم زیاترە، بۆیە بەرپرسایەتی ئەم ڕەوشە مەترسیدارە و لێکەوتەکانی لە ئەستۆی لایەنەکانی ئیئتلافی دەسەلاتداری هەرێمی کوردستان دایە.
حزبی زەحمەتکێشانی کوردستان لە یادی ڕاپەڕین، وەکوو بەرپرسیارێتی خۆی ئەوە بەبیر هەموو لایەك دەهێنێتەوە کە کیانی هەرێمی کوردستان لە هەموو کاتێک زیاتر لە بەردەم مەترسی دایە ، بۆیە بانگ لە تاک بە تاکی خەلکی کوردستان دەکات، کە دەبێ بە هەستیاریی و هۆشیارییەوە مامەلە لەگەڵ ئەو ڕەوشە بکرێت و پێویستە کیانی هەرێمی کوردستان وەکوو بەرهەمی خەبات و قوربانیدانی خەلکی کوردستان، لە دەسەلات و لە شێوازی حوکمڕانی لە هەرێمی کوردستان جیا بکرێتەوە، پارێزگاریکردن لە مافە دەستوورییەکان و دەستکەوتەکانی گەلەکەمان ئەرکی هەموو نیشتمانپەروەرێکە، هەر لەو پێناوەشدا داوا دەکەین :
یەکەم : بۆ سەقامگیریی و ئارامی هەرێمی کوردستان و سەلامەتی خەڵکەکەی، پێویستە حکومەت و لایەنە سیاسییەکانی کوردستان داوای(ضمانات) پاراستن لە کۆمەڵگەی نێودەوڵەتی بکات.
دووەم: هەولبدرێ کێشەکانی نێوان هەرێم و حکومەتی بەغدا بەپێی دەستوور چارەسەر بکرێ، بەر لە هەر شتێک بە شێوەیەکی بنبڕ کێشەی مووچەی مووچەخۆرانی هەرێم لە ململانێی سیاسی جیابکرێتەوە، وەکوو مافێکی ئاسایی مانگانە مووچەیان پێ بدرێت و دەبێ دەستەبەری شەفافیەت لە کۆی داهات و خەرجییەکانی هەرێمی کوردستان بکرێت.
سێیەم : دەبێ لە ئاستی کێشە و داخوازییەکانی خەڵک و کێشە سیاسییە نێوخۆییەکانی هەرێمی کوردستان بە جدی هەڵوەستە بکرێت ، دەبێ کێشەکانی هەرێم لە ڕێگەی دیالۆگ و گەڕانەوە بۆ ڕای خەڵک، بە ڕەچاوکردنی بەرژەوەندییەکانی خەڵکی کوردستان، لە هەرێم چارەسەر بکرێن.
چوارەم : بۆ دەربازکردنی هەرێمی کوردستان لە تەنگژە سیاسییەکانی و گێڕانەوەی متمانەی خەڵک بە پرۆسەی سیاسی و هەڵبژاردن، دەبێ هەڵبژاردنی پەرلەمانی کوردستان بە شێوەیەکی پاک و بێگەرد و دادپەروەرانە بکرێ، چونکە بە دیدی ئێمە لە پرسی هەڵبژاردندا ، کێشەی سەرەکی بەڕێوەبردنی هەڵبژاردنێکی پاک و بێگەرد و دەستاودەستكردنی دەسەڵاتە لە کوردستان.
پێنجەم : دەبێ ڕێ لە پێشێلکردنی ئازادی و مافە چەسپاوە یاساییەکانی ژنان و ئازادییە سیاسییەکان بگیرێ.
شەشەم : دەبێ کۆتایی بە پاوانکردنی دەسەڵات، زۆنی زەرد وکەسک، هەبوونی دوو ئیدارەیی و ناعەدالەتی لە حوکمڕانی بهێنرێ، هەموو هێزە چەکدارەکان لە دوور لە هەژموونی حزب، رێکبخرێن. پتر لە 30 ساڵە ئەو شێوازە دەسەڵاتدارێتییە حزبیە بەردەوامە، کە گەندەلی و ناعەدالەتی و بێکاری و نەداری لێکەوتووەتەوە و سەرچاوەی بێ ئومیدبوونی خەڵکە، بۆیە هەتا درەنگتر نەبووە دەبێ هەم وەڵامی داخوازییەکانی خەڵک بدرێتەوە، هەم ناوماڵی کوردی رێکبخرێتەوە.
مەکتەبی سیاسیی
حزبی زەحمەتكێشانی كوردستان
4ی ئاداری 2024
