شێرپەنجەی سی و بۆڕیەكانی هەوا یەكێكە لە باوترین و كوشندەترین جۆرەكانی شێرپەنجە، هۆكاری ژمارەیەكی بەرچاوی مردنە لە سەرانسەری جیهاندا، بە جۆرێك كە هیچ شێرپەنجەیەك بەقەد ئەو شێرپەنجەیە خەڵك ناكوژێت. ژمارەی ئەوانەی بەو شێرپەنجەیە ئەمرن زیاترە لە كۆی ژمارەی ئەوانەی كە بە هەر سێ شێرپەنجەی مەمك و پڕۆستات و قۆڵۆن دەمرن.
گرنگە بزانین كە زوو دەستنیشانكردنی ئەو نەخۆشییە لە قۆناغێكی سەرەتایی دەبێتە هۆی كەمكردنەوەی ڕێژەی مردن بەو نەخۆشیە.
توێژینەوەكان ئاماژە بەوە دەكەن كە پشكنینی پێشوەختە بۆ شێرپەنجەی سیەكان بە بەكارهێنانی سیتی سكانێك كە تێیدا ژەمێكی كەمتر لە تیشك بەكاردێت بە بەراوەرد بە سیتی سكانی ئاسایی (Low dose CT) دەتوانێت یارمەتیدەر بێت لە دۆزینەوەی نەخۆشییەكە لە قۆناغێكی سەرەتایی، ئەو جۆرە پشكنینە زیاتر لەو كەسانە دەكرێت كە ئەگەری تووشبوونیان بەو نەخۆشیە زیاترە لە خەڵكی ئاسایی، بۆ نموونە ئەوانەی كە بڕێكی زۆر جگەرەیان كێشاوە بۆ ماوەیەكی زۆر.
ئەو پشكنینە پێشوەختەیە دەتوانێت ڕێژەی مردنی شێرپەنجەی سیەكان بەڕێژەی بیست لە سەد كەم بكاتەوە.
ئەوەمان لەبیر بێت كە باشترین جۆری بەرەنگاربوونەوە لەگەڵ ئەو شێرپەنجەیە، وە زۆرترین چانسی سەركەوتن لە شەڕكردن لەگەڵ شێرپەنجەی سیەكان لەڕێگەی زوو دەستنیشانكردنیەتی. بۆیە دەبێت ئەو كەسانەی كە ئەگەری تووشبوونیان بەو نەخۆشیە زۆرە، هانبدرێن بچن ئەو پشكنینە پێشوەختەیە بكەن.
تێبینی: پشكنینی پێشوەختە واتە پشكنینێك بۆ كەسێك بكرێت بۆ دۆزینەوەی نەخۆشیەك پێش ئەوەی هیچ نیشانەیەكی نەخۆشیەكە لە كەسەكە دەركەوتبن.
(د. سەركەوت مەجید خۆشناو – پزیشكی ڕاوێژكار بۆ چارەسەری گرێ و نەخۆشیەكانی شێرپەنجە)
