ڕۆژی 16ی ئایار 83ـەمین دانیشتنی دادگاییکردنی 108 پەرلەمانتار و سیاسەتوانی باکووری کوردستان و تورکیا لە دۆسیەی کۆبانی، لەلایەن دادگەی سزا قورسەکانی سینجان لە ئەنقەرە بەڕێوەچوو.
لە دانیشتنەکەدا، دەستەی دادوەران سزای چەندین ساڵ زیندانیان بەسەر سەلاحەدین دەمیرتاش، سیاسەتوانی کورد و هاوسەرۆکی پێشووی هەدەپە،
فیگەن یوکسەکداغ، ئەحمەد تورک و بەشێکی زۆر لە هاوڕێکانیان سەپاند.
ئەو شێوازە سیاسییەی لە تورکیا دژ بە خەباتکارانی ئازادیخوازی کورد پیادە دەکرێت و لە ڕێی دادگا بە کۆمەڵ ڕاپێچی زیندان دەکرێن، ئەوە ڕوون نیشان دەدات کە دەزگای دادوەری لایەنێکە لە شەڕی سیاسی بۆ قەدەغەکردن و ئاستەنگکردنی خەباتی سیاسی و مەدەنی گەلی کورد لە تورکیا.
ئێمە لە کاتێکدا کە سیاسەتی نکۆڵیکردن لە گەلی کورد و سزادان و زیندانیکردنی سەرکردە و سیاسەتوانانی کورد لە تورکیا ڕەتدەکەینەوە، هاوکات پێمان وایە کە ئەو سیاسەتە پێچەوانەی بنەماکانی دیموکراسی و برایەتی و پێکەوەژیانی ئاشتیانەی گەلانی تورکیایە و دۆزی گەلی کورد بە ڕێگەی سیاسی و دیالۆگ چارەسەر دەکرێت، نەک پەنابردن بۆ زیندان و شەڕ و ئۆپەڕاسیۆنی سەربازی.
مەکتەبی سیاسیی
حزبی زەحمەتكێشانی كوردستان
17ی ئایاری 2024
