بەڵێن عەبدولڵا سکرتێری حزبی زەحمەتکێشانی کوردستان لە میانەی پێشوازی لە ھاوسەرۆکی کۆنگرەیی نەتەوەیی کوردستان ووتی:
” حزبی زەحمەتکێشانی کوردستان بە نیگەرانی زۆرەوە لە پەرتەوازیی نێوماڵی کوردی دەڕوانێت و ئەو بارودۆخە بە مەترسیکی جدی دەبینێت، بۆیە ئێمە پێشوازی لەھەر ھەوڵێک دەکەین کە ئامانج لێی کارکردن بێت بۆ یەکڕیزی نیشتمانی و کۆبوونەوە لە چوارچێوەی پڕۆژەیەکی کوردستانی”
ئێوارەی رۆژی 15ی تەمووز بەڵێن عەبدولڵا، سکرتێری حزبی زەحمەتکێشانی کوردستان بە ئامادەبوونی (نیشتمان کەمال، شاخەوان عەبدولڵا، ھیوا سەید سەلیم) ئەندامانی مەکتەبی سیاسی لە بارەگای مەکتەبی سیاسی پێشوازیکرد لە ئەحمەد قەرەموس، ھاوسەرۆکی کۆنگرەی نەتەوەیی کوردستان و شاندێکی ھاوڕێی.
لە دیدارێکی دۆستانەدا کۆمەڵێک پرسی پەیوەست بە یەکڕیزی لایەنە سیاسەکان و ھاوھەڵوێستی بۆ رووبەڕووبوونەوەی ئاڵانگاریەکان، گفتوگۆیان لەبارەیەوە کرا.
بەڵێن عەبدوڵڵا، بە شاندی میوانی ڕاگەیاند ئێمە لە حزبی زەحمەتکێشانی کوردستان لەو مەترسیانە تێدەگەین کە بەرۆکی خەباتی گەلەکەمانیان گرتووە، دواینیان ئۆپراسیۆنی سوپای تورکیایە بۆسەر خاکی ھەرێمی کوردستان، بۆیە بۆ تێپەراندنی ئەو بارودۆخە ھەستیارە پێویست دەکات لایەنەکان لە چوارچێوەی پڕۆژەیەکی نیشتمانی کۆببنەوە، لەوبارەیەوە حزبی زەحمەتکێشانی کوردستان پێی وایە بارودۆخەکە لە ھەمووان دەخوازێت بە ھەستیاریەوە مامەڵە لەگەڵ پێشھاتەکان بکەین.
لە لایەن خۆیەوە ئەحمەد قەرەموس ھاوسەرۆکی کۆنگرەیی نەتەوەیی کوردستان ھەڵوێستی حزبی زەحمەتکێشانی کوردستانی لە مەڕ پرسە نەتەوەیی و نیشتمانیەکان بەرزنرخاند.
