بەڕێوەبەرایەتی خۆسەری باکوور و ڕۆژهەڵاتی سووریا داوا لە کۆمەڵگەی نێودەوڵەتی دەکات هێرشەکانی تورکیا بۆ سەر ژێرخانی هەرێمەکە ڕابگرن و ڕایدەگەیەنێت کە تورکیا دەیەوێت قەیرانێکی مرۆیی دروست بکات و پەیامی ئەوە بگەیەنێتە داعش کە پشتیوانییان دەکەن.
بەڕێوەبەرایەتی خۆسەر ڕاگەیەندراوێکی دەربارەی هێرشەکانی تورکیا و میلیشیاکانی بۆ سەر ڕۆژئاوای کوردستان بۆ ڕای گشتی بڵاوکردەوە و تێیدا هاتووە: “تورکیای داگیرکەر و میلیشیاکانی بە ئامانجی پەکخستنی خزمەتگوزارییە ژیارییەکان و کەرتەکانی خزمەتکردنی هاووڵاتییانی باکوور و ڕۆژهەڵاتی سووریا بەردەوامن لە بەئامانجگرتنی بنکە و ژێرخانەکان”.
ڕاشیگەیاند ئامانی تورکیا دروستکردنی پشێوی و نەهێشتنی سەقامگیریی و ناردنی پەیامی ئەوەیە بۆ گروپە تیرۆریستییەکان و لەسەرووی هەمووشیانەوە داعش، کە تورکیا پشتیوانیی هەوڵەکانی گەڕانەوە و زیندووبوونەوەیان دەکات،
بەڕێوەبەرایەتی خۆسەر ڕاشیگەیاند، هێرشەکانی تورکیا بە تایبەتیش بۆ سەر بەنداوی تشرین و شارەوانیی لە جورنیە و بەئامانجگرتنی ناوەندی کارەبا تاوانێکی ڕوون و پێشێلکردنی هەموو ڕێککەوتننامە و بەڵگەنامە نێودەوڵەتییەکانە.
بەڕێوەبەرایەتی خۆسەر ڕایگەیاند، هاوکات لەگەڵ ئیدانەکردنی تاوانەکانی تورکیا، داوش لە کۆمەڵگەی نێودەوڵەتی و دامەزراوەکانی و هەموو ئەو هێزانەی پەرۆشن بۆ کەمکردنەوەی گرژییەکانی سووریا دەکات سنوور بۆ ئەو کارانەی تورکیا دابنێن.
