ئەندامێکی پەرلەمانی عێراق رایگەیاند، واژۆ بۆ گەڵاڵەکردنی پێشنیازەیاسایەک کۆدەکەنەوە بۆ قەدەخەکردنی هاوڕەگەزخوازی لە عێراق و دەشڵێت: “بڕواناکەم هیچ پەرلەمانتارێک هەبێت دەنگ بەو پێشنیازەیاسایە نەدات.”
عارف حەمامی، ئەندامی لیژنەی یاسایی پەرلەمانی عێراق رایگەیاند: گفتوگۆ لەنێو ئەندامانی لیژنەی یاسایی کراوە بۆ ئەوەی لەگەڵ دەستپێکردنی کۆبوونەوەکانی وەرزی دووەمی یاسادانانی پەرلەمانی عێراق واژۆ کۆبکەینەوە بۆ گەڵاڵەکردنی پێشنیازەیاسایەک بۆ قەدەخەکردنی هاوڕەگەزخوازی لە عێراق.
حەمامی گوتی: “هۆکاری ئەو هەنگاوە دوورخستنەوەی عێراقە لەو دیاردەیە کە نامۆیە بە کۆمەڵگە و لە هەندێک لە کۆمەڵگەکانی جیهاندا هەیە.”
بەگوێرەی مادەی 60ـی دەستووری عێراق 10 پەرلەمانتار دەتوانن واژۆ کۆبکەنەوە بۆ گەڵاڵەکردنی پێشنیازەیاسایەک لەنێو پەرلەمان بەمەمەستی تاوتوێ و پەسندکردنی.
عارف حەمامی کە ئەندامی فراکسیۆنی دەوڵەتی یاسایە ئاماژەی بەوە دا کە گفتوگۆی بەراییان لەگەڵ زۆرێک لە پەرلەمانتاران کردووە و دەڵێت: “پێناچێت هیچ پەرلەمانتارێک هەبێت کە لەدژی ئەو پێشنیازەیاسایە بێت و دەنگی پێنەدات.”
A : zozk
