نرخی نه‌وت له‌بازاڕه‌كانی جیهان لە بەرز بونەوەدایە

ئه‌مڕۆ سێشه‌ممه‌ نرخی نه‌وتی خاوی برێنت به‌رزبونه‌وه‌ی به‌خۆیه‌وه‌ بینی و به‌ 79.2 دۆلار مامه‌ڵه‌ی پێوه‌ده‌كرێت، هه‌روه‌ها نه‌وتی خاوی ته‌كساسیش به‌ڕێژه‌ی 0.01% به‌رزبوه‌ته‌وه‌ گه‌یشته‌ 76.09 دۆلار.

ئاژانسی هه‌واڵی رۆیته‌رز بڵاویكرده‌وه‌، به‌هۆی ده‌ركه‌وتنی كاریگه‌رییه‌كانی ڤایرۆسی ئۆمیكرۆن به‌شێوه‌یه‌كی مه‌ترسیدارتر له‌وه‌ی پێشبینی ده‌كرا، به‌های نه‌وت به‌ڕێژه‌ی 0.05% به‌رزبوه‌وه‌ و به‌هاكه‌ی 0.04 دۆلار زیادی كرد، نرخه‌كه‌شی گه‌یشته‌ 79.2 دۆلار.

ئاماژه‌ی به‌وه‌شكردوه‌، نه‌وتی ته‌كساسش به‌هه‌مانشێوه‌ به‌رزبونه‌وه‌ی به‌خۆیه‌وه‌ بینیوه‌ به‌جۆرێك 0.01%ی به‌هاكه‌ی زیادی كردوه‌ و نرخه‌كه‌ی گه‌یشتوه‌ته‌ 76.09 دۆلار.

هه‌واڵه‌كانی په‌یوه‌ست به‌ بڵاوبونه‌وه‌ی جۆری ئۆمیكرۆنی ڤایرۆسی كۆرۆنا نرخی نه‌وتی له‌ مانگی 11 به‌ رێژه‌ی 10٪ دابه‌زاندبو، به‌ڵام تائێستاش ناوه‌نده‌ داراییه‌كان و ناوه‌نده‌كانی وزه‌ پێیانوایه‌ هێنده‌ مه‌ترسی دروستناكات له‌ كه‌مكردنه‌وه‌ی خواست بۆ به‌كارهێنانی نه‌وتی خاو.