ئۆکرانیا رایگەیاند بۆ جاری سێیەم هەستاون بە هەڵمەتی گۆڕینەوەی دیلەکانیان لەگەڵ روسیا و جەختیشیکردەوە، توانیویانە 12 سەرباز و 14هاوڵاتی مەدەن رزگاربکەن.
ئیرینا فێرشچۆک، جێگری سەرۆکی ئۆکرانیا بڵاویکردوەتەوە، لەسەر بڕیاری سەرۆکی ئۆکرانیا بۆ جاری سێیەم ئاڵوگۆڕی دیل لەگەڵ روسیادا کراوە و توانراوە 26 هاوڵاتی ئۆکرانی رزگاربکرێن کە پێکهاتبون لە 12سەرباز کە ژنیشیان تێدابوە لەگەڵ 14 هاوڵاتی مەدەنی.
هاوکات، تاتیانا مۆسکالکۆڤا، بەرپرسی کاروباری مافی مرۆڤی روسیا لای خۆیەوە رایگەیاند، 14 سەربازی دەریاوانی رزگارکراون و بەڕێوەن بۆ لای خێزانەکانیان.
لەدوای دەستپێکردنی هێرشەکانی روسیا بۆ سەر ئۆکرانیا لە 24ی شوباتی رابردوەوە، چەند جارێک ئاڵوگۆڕ بەدیلەکان کراوە، بەڵام تائێستا زانیاری تەواو نییە لەبارەی ژمارەی تەواوی دیلەکانەوە.
هەفتەی رابردو وێنەی چەند ژنە سەربازێکی ئۆکرانیا دوای رزگارکردنیان لە دەستی هێزەکانی روسیا بڵاوکرایەوە کە بە وتەی میدیاکانی وڵاتەکە سەریان تاشراوە پاشان رادەست کراونەتەوە.
