خۆڵبارین یەکێکە لەو دیاردانەی لە ئەنجامی کەش وهەوای گەرم و وشکەوە دروست دەبێت، خۆڵبارین مەترسی بۆ سەر جەستەی مرۆڤ هەیە و هەندێك رێگە هەیە بۆ خۆپارێزیکردن لێی.
- مەترسییەکانی خۆڵبارین چین؟
خۆڵبارین لەوانەیە سییەکان پڕبکاتەوە و تووشی هەوکردنییان بکات، لە نیشانە باوەکانیشی ئازاری سنگ و کۆکە و تا لێهاتن و ئەستەمی هەناسەدانە.
زۆرکات گەردیلەکانی خۆڵ دەچنە ناو چاوەوە، ئەمەش لەوانەیە زیان بە چاوەکان بگەیەنێت و کۆرینەی چاو بریندار بکات و کەسەکە نارەحەت بکات.
- چۆن خۆت لە خۆڵبارین دەپارێزیت؟
باشترین رێگە بۆ خۆپاراستن لە خۆڵبارین مانەوە لە ماڵ و داخستنی دەرگا و پەنجەرەیە، لەگەڵ ئەوەشدا دەبێت ماسک لەدەموچاو بکرێت.
یەکێکی دیکە لە رێگەکان خواردنی ئەو خۆراکانەیە کە سیستەمی بەرگری جەستە بەهێزدەکەن، وەک ئەو خواردنانەی دەوڵەمەندن بە ڤیتامینەکانی C و E و بێتا کارۆتین کە لە سەوزەواتەکان و بادەم و گێزەر و زۆری تریشدا بوونیان هەیە.
