بەپێی فەرمانێکی فەرمانگەی لێکۆڵینەوەکان لە دەستەی دەسپاکی ھەرێم، دوای فەرمانی سەرۆکی دەستە سەبارەت بە پێکھێنانی لیژنەی لێکۆڵینەوەی کارگێڕی بۆ ووردبینیکردن لە فۆڕمی ئاشکراکردنی بەرژەوەندییە داراییەکانی ھەموو لێکۆڵەرانی دەستە و لەژێر رۆشنایی راپۆرتی لیژنەی وردبینی، بڕیاردرا بەلابردنی لێکۆڵەری دەسپاکی لە پۆستی بەڕێوەبەری لێکۆڵینەوەی ھەولێر بە وەکالەت.
ھەروەھا رەوانەکردنی کۆنووسی لیژنەی تایبەت بەناوبراو بۆ بەڕێوەبەرایەتی لێکۆڵینەوەی ھەولێر و تۆمارکردنی وەک داوایەکی سزایی بەپێی ماددەی ١٩ لە یاسای دەستەی دەسپاکی، بخرێتە بەردەستی دادوەری لێکۆڵینەوەی دەسپاکی ھەولێر بۆ لێکۆڵینەوە و یەکلاییکردنەوەی دۆسیەکەی.
سەرچاوەیەکیش لە دەستەی دەسپاکی ھەرێم بە کوردسات نیوزی راگەیاند، بە گومانی زیادبوونی نائاسایی موڵک و ماڵی دارایی ئەو بەرێوبەرە دۆسیەکەی رەوانەی دادگاکراوە بۆ لێکۆڵینەوە بۆ ئەوەی رێڕەوی یاسایی وەربگرێت، ھەتاکو لێکۆڵینەوەکان تەواونەکرێن قسە لەسەر ئەو پرسە ناکەن.
